ລ໋ອບສະເຕດ້ຽມ ຝຶກຊ້ອມກຽມພ້ອມ ບານເຕະກະຊັບມິດທ້າຍອາທິດນີ້
ນັກກິລາຮຸ່ນອາຍຸບໍ່ເກີນ 10 ຫລື U10 ຂອງອາຄາເດມີ ລ໋ອບສະເຕດ້ຽມ ຝຶກຊ້ອມກຽມຄວາມພ້ອມ ເພື່ອລົງສະໜາມບານເຕະກະຊັບມິດກັບອາຄາເດມີ ນິວຟຸດບອນຄັບ ຈາກປະເທດໄທ ໃນວັນທີ 13 ຕຸລານີ້ ເວລາ 16:00 ໂມງ ທີ່ສະໜາມກິລາລ້ານຊ້າງ ສະເຕດ້ຽມ ບ້ານໜອງໄຮ ເມືອງຫາດຊາຍຟອງ ນະຄອນຫລວງວຽງຈັນ.
ທ່ານ ອາລ໋ອບ ມະນີບົດ ປະທານ ອາຄາເດມີ ລ໋ອບສະເຕດ້ຽມ ໃຫ້ສໍາພາດວ່າ: ພາຍຫລັງໄດ້ຮັບຈົດໝາຍເຊີນຈາກອາຄາເດມີ ນິວຟຸດບອນຄັບ ຈາກປະເທດໄທ ວ່າຈະເຕະບານກະຊັບມິດເພື່ອສ້າງຄວາມສໍາພັນລະຫວ່າງສອງອາຄາເດມີ ເວົ້າສະເພາະ, ເວົ້າລວມແມ່ນສ້າງຄວາມຜູກພັນໄມຕີຈິດທີ່ດີລະຫວ່າງ 2 ປະເທດບ້ານໃກ້ເຮືອນຄຽງ. ດັ່ງນັ້ນ, ອາຄາເດມີຂອງພວກເຮົາຈຶ່ງໄດ້ຕອບຮັບ ແລະ ຝຶກຊ້ອມບັນດານັກກິລາທີ່ຢູ່ໃນຕົ້ນສັງກັດ ພ້ອມທັງຄັດເລືອກເອົານັກກິລາທີ່ມີພອນສະຫວັນເຂົ້າຝຶກຊ້ອມ ເພື່ອກຽມຄວາມພ້ອມເຂົ້າໃນນັດກະຊັບມິດຄັ້ງນີ້.
ອາຄາເດມີ ລ໋ອບສະເຕດ້ຽມ ຝຶກຊ້ອມທຸກໆວັນເສົາ-ທິດ ເວລາ 8:00-11:00 ໂມງ ທີ່ເດີ່ນລ໋ອບສະເຕດ້ຽມ ບ້ານຊ້າງຄູ້ ເມືອງໄຊທານີ ນະຄອນຫລວງວຽງຈັນ.
