2 ນັກເຕະອັງກິດເຈັບຖອນເກມ ພົບ ໂຄຣເອເຊຍ-ສະເປນ
ອາເລັກ ແມັກຄາທີ ຜູ້ຮັກສາປະຕູ ເຊົາແຮມຕັນ ແລະ ແດນນີ ໂຣສ ແບັກຊ້າຍ ທ໊ອດແນມ ຮ໊ອດສະເປີ ພ້ອມໃຈກັນຖອນຕົວຈາກທີມຊາດອັງກິດ ຊຸດລົງຫລິ້ນ ຢູຟາ ເນຊັນ ລີກ ກັບ ໂຄຣເອເຊຍ ວັນທີ 12 ຕຸລານີ້ ແລະ ສະເປນ ວັນທີ 15 ຕຸລານີ້ ເນື່ອງຈາກມີອາການບາດເຈັບລົບກວນ.
ລາຍງານລະບຸວ່າ: ແມັກຄາທີ ມີອາການບາດເຈັບເລັກໜ້ອຍ ແລະ ຂໍຖອນຕົວ ເພື່ອປ້ອງກັນໄວ້ກ່ອນ. ຂະນະທີ່ ໂຣສ ບາດເຈັບຕົ້ນຂາ ແລະ ເວລານີ້ນັກເຕະທັງ 2 ໄດ້ເດີນທາງກັບສະໂມສອນຕົ້ນສັງກັດແລ້ວ. ເຖິງຢ່າງໃດກໍຕາມ, ແກເຣັທ ເຊົາເກດ ຜູ້ຈັດການທີມຊາດອັງກິດ ຍັງບໍ່ໄດ້ເອີ້ນໃຜມາແທນ.
ກ່ອນໜ້ານີ້ ລຸກ ຊໍ ແບັກຊ້າຍ ແມນເຊັສເຕີ ຢູໄນເຕັດ ກໍໄດ້ຖອນຕົວ ເພາະມີບັນຫາບາດເຈັບລົບກວນເຊັ່ນກັນ ໂດຍ ເຊົາເກດ ໄດ້ເອີ້ນ ເບນ ຊິລເວລ ກອງຫລັງ ເລສເຕີ ຊິຕີ້ ມາແທນ.
