ແມ່ຍິງອວບຄວນຫລີກເວັ້ນ 4 ຮູບແບບການແຕ່ງກາຍນີ້

ໃຜວ່າແມ່ຍິງອວບຫາເຄື່ອງນຸ່ງງາມໆນຸ່ງບໍ່ໄດ້ ພຽງແຕ່ຮູ້ຈັກເລືອກເຄື່ອງນຸ່ງໃຫ້ເໝາະສົມກັບຮູບຮ່າງຂອງເຮົາ ເທົ່ານີ້ກໍງາມໄດ້ບໍ່ໜ້ອຍກ່ວາຄົນຈ່ອຍແລ້ວ. ມີແມ່ຍິງອວບຈຳນວນບໍ່ໜ້ອຍທີ່ຍັງບໍ່ສາມາດເລືອກເຄື່ອງນຸ່ງທີ່ເໝາະສົມກັບຮູບຮ່າງຂອງໂຕເອງໄດ້ ແລ້ວມັກຈົ່ມວ່ານຸ່ງຫຍັງກໍບໍ່ງາມ ເຊິ່ງຂໍບອກວ່າມັນບໍ່ແມ່ນຄວາມຈິງ. ມື້ນີ້ພວກເຮົາມີເຄັດລັບການນຸ່ງເຄື່ອງໃຫ້ງາມສຳລັບແມ່ຍິງອວບວ່າແມ່ຍິງອວບນັ້ນຄວນຈະຫລີກເວັ້ນການແຕ່ງກາຍຮູບແບບໃດແດ່ເພື່ອບໍ່ໃຫ້ເບິ່ງອວບຫລາຍຂຶ້ນກ່ວາເກົ່າມາແນະນຳທ່ານ.

1. ບໍ່ຄວນນຸ່ງກະໂປ່ງຍາວ : ກະໂປ່ງຍາວກັບແມ່ຍິງອວບເປັນສິ່ງທີ່ບໍ່ເຂົ້າກັນ ເພາະຍິ່ງທ່ານນຸ່ງກະໂປ່ງຍາວມັນຍິ່ງເຮັດໃຫ້ທ່ານເບິ່ງເຕ້ຍ ແລະ ອວບຫລາຍຂຶ້ນກ່ວາເກົ່າ ຍິ່ງຖ້າແມ່ນກະໂປ່ງທີ່ມີລັກສະນະເປັນສຸ່ມບານອອກຈາກໂຕຫລາຍເທົ່າໃດກໍຍິ່ງເຮັດໃຫ້ພາກສ່ວນລຸ່ມຂອງທ່ານນັ້ນເບິ່ງກ້ວາງຫລາຍຂຶ້ນເທົ່ານັ້ນ. ທາງທີ່ດີຫາກຕ້ອງນຸ່ງກະໂປ່ງກໍຄວນເລືອກແບບທີ່ຍາວພໍດີກັບຫົວເຂົ່າ ຫລື ກາຍຫົວເຂົ່າຂຶ້ນໜ້ອຍໜຶ່ງ.
2. ບໍ່ຄວນເລືອກເສື້ອຄໍມົນ : ເພາະຍິ່ງຈະເຮັດໃຫ້ເບິ່ງອວບຍິ່ງຂຶ້ນ ເພາະແມ່ຍິງອວບມັກຈະຄໍສັ້ນ ເມື່ອນຸ່ງເສື້ອຄໍມົນກໍຍິ່ງເຮັດໃຫ້ບໍ່ເຫັນພາກສ່ວນຄໍ ແລະ ບ່າໄຫລ່. ສະນັ້ນ ຄວນເລືອກນຸ່ງເສື້ອຄໍວີຈະຊ່ວຍອຳພາງຄໍໃຫ້ເບິ່ງຄືຍາວຂຶ້ນ.
3. ຫລີກເວັ້ນການນຸ່ງເຄື່ອງຮັດໆ : ການນຸ່ງເຄື່ອງຮັດໆແບບຕິດຜິວໜັງຈະຍິ່ງເຮັດໃຫ້ເບິ່ງເຫັນຂາ ແລະ ແຂ່ງໃຫຍ່ໆໄດ້ຢ່າງຈະແຈ້ງຂຶ້ນ. ຫາກຢາກໃຫ້ຂາເບິ່ງສົມສ່ວນຄວນຈະເລືອກນຸ່ງໂສ້ງຍີນຊົງຂາຊື່ແບບປົກກະຕິດີກ່ວາຈະນຸ່ງໂສ້ງຮັດໆຈົນຕິດຜິວໜັງ.
4. ຫລີກເວັ້ນການນຸ່ງໂສ້ງຂາສັ້ນແບບພັບຂາ : ເພາະມັນຈະເຮັດໃຫ້ທ່ານເບິ່ງອວບຫລາຍຂຶ້ນກ່ວາເກົ່າ ເພາະມັນເຮັດໃຫ້ເບິ່ງ ຂາສັ້ນ ແລະ ຂາໃຫຍ່ຫລາຍຂຶ້ນ. ຫາກຢາກຈະນຸ່ງໂສ້ງຂາສັ້ນແທ້ໆ ຂໍແນະນຳວ່າຄວນເປັນຂາສັ້ນປົກກະຕິທີ່ມີຄວາມຍາວຢູ່ເໜືອຫົວເຂົ່າໜ້ອຍໜຶ່ງ, ແຕ່ບໍ່ຄວນສັ້ນຫລາຍເກີນໄປ ຈຶ່ງຈະເຮັດໃຫ້ເບິ່ງສົມສ່ວນ ແລະ ໜ້າຮັກຂຶ້ນ.