ລາວຈະສະເຫລີມສະຫຼອງວັນອາຫານໂລກ-ວັນສາກົນ ແລະ ສັບປະດາແຫ່ງຊາດ ເພື່ອຫຼຸດຜ່ອນຄວາມທຸກຍາກ ໃນວັນທີ 16 ຕຸລານີ້

ທ່ານ ລຽນ ທິແກ້ວ ລັດຖະມົນຕີກະຊວງກະສິກໍາ ແລະ ປ່າໄມ້ໄດ້ຖະແຫຼ່ງຕໍ່ສື່ມວນຊົນໃນວັນທີ 10 ຕຸລາ ນີ້ວ່າ: ລາວຈະສະເຫລີມສະຫຼອງວັນອາຫານໂລກ, ວັນສາກົນ ແລະ ສັບປະດາແຫ່ງຊາດ ເພື່ອລົບລ້າງຄວາມທຸກຍາກ ຂຶ້ນໃນວັນທີ 16 ຕຸລານີ້, ທີ່ສະຖາບັນຄົ້ນຄວ້າກະສິກໍາ-ປ່າໄມ້ ແລະ ພັດທະນາຊົດນະບົດແຫ່ງຊາດ ນະຄອນຫຼວງວຽງຈັນ. ສໍາລັບວັນອາຫານໂລກ ຄົບຮອບ 38 ປີ ຈະມີຄໍາຂວັນ “ການກະທໍາຂອງພວກເຮົາຄືອະນາຄົດຂອງພວກເຮົາ, ໂລກທີ່ປາສະຈາກຄວາມອຶດຫິວ ພາຍໃນປີ 2030 ແມ່ນມີຄວາມເປັນໄປໄດ້” ສ່ວນວັນສາກົນເພື່ອລົບລ້າງຄວາມທຸກຍາກ ຄົບຮອບ 32 ປີ ແລະ ສັບປະດາແຫ່ງຊາດ ເພື່ອລົບລ້າງຄວາມທຸກຍາກ ຄົບຮອບ 15 ປີ ພາຍໃຕ້ຄໍາຂວັນ “ມາຮ່ວມມືກັນ ຊ່ວຍເຫຼືອກຸ່ມຄົນທີ່ດ້ອຍໂອກາດທີ່ສຸດ ເພື່ອພ້ອມກັນສ້າງໂລກທີ່ມີການເຄົາລົບກຽດສັກສີ ແລະ ສິດທິມະນຸດຢ່າງທົ່ວເຖິງ” ແລະ ຈະມີກິດຈະກໍາຕ່າງໆຄື: ສໍາມະນາວິທະຍາສາດ, ການວາງສະແດງຜະລິດຕະພັນກະສິກຳ, ຫັດຖະກຳ, ອາຫານ, ວາງສະແດງຮູບພາບ ແລະ ກິດຈະກໍາອື່ນໆ ຊຶ່ງຈະເລີ່ມແຕ່ວັນທີ 15-19 ຕຸລາ 2018. ເພື່ອເຮັດໃຫ້ການສະເຫລີມສະຫຼອງ ວັນປະຫວັດສາດສໍາຄັນດັ່ງກ່າວເປັນຂະບວນຟົດຟື້ນ, ມີເນື້ອໃນ ແລະ ທັງເປັນການຊຸກຍູ້ສົ່ງເສີມການຜະລິດກະສິກໍາ ປູກຝັງ-ລ້ຽງສັດ, ແນໃສ່ຄໍ້າປະກັນຄວາມໝັ້ນຄົງດ້ານສະບຽງອາຫານ, ເຮັດກະສິກໍາສະອາດຕາມທິດສີຂຽວຍືນຍົງ, ຊຸກຍູ້ການຜະລິດເປັນສິນຄ້າ ສ້າງລາຍຮັບໃຫ້ແກ່ຄອບຄົວ ກໍຄືການຮ່ວມກັນເຮັດວຽກເພື່ອຫຼຸດພົ້ນອອກຈາກຄວາມທຸກຍາກ, ທຸກຄົນສາມາດເຂົ້າເຖິງອາຫານທີ່ມີໂພຊະນາການ ແລະ ຕັ້ງໜ້າເຂົ້າຮ່ວມປະຕິບັດສອງໜ້າທີ່ຍຸດທະສາດຂອງຊາດຄື: ປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມັ່ງຄັ່ງເຂັ້ມແຂງ.