ຮອງນາຍົກຮຽກຮ້ອງໃຫ້ບໍລິສັດຜູ້ຮັບເໝົາກໍ່ສ້າງໂຄງການສາຍສົ່ງ-ສະຖານີ-ເຂື່ອນໄຟຟ້າ ປະກອບສ່ວນເສຍພັນທະອາກອນ
ໃນຫວ່າງບໍ່ດົນມານີ້, ກົມສ່ວຍສາອາກອນ ກະຊວງການເງິນ ໄດ້ຈັດກອງປະຊຸມປຶກສາຫາລືກັບລັດວິສາຫະກິດໄຟຟ້າລາວ ແລະ ບັນດາບໍລິສັດຜູ້ຮັບເໝົາກໍ່ສ້າງບັນດາໂຄງການສາຍສົ່ງ-ສະຖານີ ແລະ ເຂື່ອນໄຟຟ້າ, ໂດຍການໃຫ້ກຽດໂອ້ລົມຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງເງິນ ໂດຍໄດ້ຮຽກຮ້ອງໃຫ້ຜູ້ຮັບເໝົາໂຄງການດັ່ງກ່າວປະກອບສ່ວນເສຍພັນທະອາກອນໃຫ້ລັດຖືກຕ້ອງຕາມລະບຽບກົດໝາຍ.
ໃນກອງປະຊຸມໄດ້ພ້ອມກັນປຶກສາຫາລືກ່ຽວກັບການເສຍພັນທະອາກອນກຳໄລ 1% ຂອງມູນຄ່າກໍ່ສ້າງຕົວຈິງໃນໂຄງການກໍ່ສ້າງສາຍສົ່ງ-ສະຖານີໄຟຟ້າ ແລະ ເຂື່ອນໄຟຟ້າ ຊຶ່ງອີງຕາມການເຫັນດີໃຫ້ເກັບຕາມມະຕິຕົກລົງຂອງຄະນະປະຈໍາສະພາແຫ່ງຊາດເລກທີ 0163/ຄປຈ, ລົງວັັນທີ 14 ທັນວາ 2014 ກ່ຽວກັບການອະນຸຍາດເກັບອາກອນກຳໄລຂອງມູນຄ່າຮັບເໝົາກໍ່ສ້າງໂຄງການສາຍສົ່ງ ແລະ ເຂື່ອນໄຟຟ້າ ຊຶ່ງໃນໄລຍະຜ່ານມາບັນດາໂຄງການທີ່ເຊັນສັນຍາຮັບເໝົາກໍ່ສ້າງ (EPC) ກັບ ຟຟລ ແມ່ນໄດ້ລະບຸເສຍແຕ່ອາກອນລາຍໄດ້ຈາກເງິນເດືອນ ແລະ ໃຫ້ມີການຍົກເວັ້ນ: ອາກອນກຳໄລ, ອາກອນມູນຄ່າເພີ່ມ ແລະ ອາກອນຊົມໃຊ້ ແລະ ໃນສັນຍາເງິນກູ້ລະຫວ່າງລັດຖະບານຂອງສປປ ລາວ ແລະ (EXIM BANK) ຂອງຈີນແມ່ນໄດ້ລະບຸວ່າ: ຖ້າຕ້ອງໄດ້ຈ່າຍອາກອນຕ່າງໆແມ່ນໃຫ້ເປັນພາລະຂອງຜູ້ກູ້ຢືມ.
ສະນັ້ນ, ນິຕິກຳດັ່ງກ່າວແມ່ນບໍ່ສອດຄ່ອງຕາມກົດໝາຍວ່າດ້ວຍສ່ວຍສາອາກອນທີ່ກຳນົດວ່າ: ການຍົກເວັ້ນພັນທະອາກອນແມ່ນຕ້ອງໄດ້ຜ່ານການຮັບຮອງເຫັນດີຈາກສະພາແຫ່ງຊາດ ແລະ ບໍ່ສອດຄ່ອງກັບຂໍ້ຕົກລົງຂອງກະ ຊວງການເງິນ ສະບັບເລກທີ 2695/ກງ, ລົງວັນທີ 1 ຕຸລາ 2010 ມາດຕາ13 ທີ່ກຳນົດວ່າ: ຖ້າສັນຍາກູ້ຢືມເງິນໄດ້ລະບຸໃຫ້ມີການຍົກເວັ້ນອາກອນຕ່າງໆແມ່ນຕ້ອງໃຫ້ເສຍອາກອນກຳໄລ ແລະ ອາກອນເງິນເດືອນ, ສ່ວນອາກອນມູນຄ່າເພີ່ມ ແລະ ອາກອນຊົມໃຊ້ແມ່ນຍົກເວັ້ນ.
ມາຮອດປັດຈຸບັນໄດ້ມີຜູ້ຮັບເໝົາຈໍານວນ 3 ບໍລິສັດຍິນດີປະກອບສ່ວນຈ່າຍອາກອນກຳໄລ 1% ຂອງມູນຄ່າກໍ່ສ້າງຕົວຈິງໃຫ້ລັດຖະບານ ເປັນຈຳນວນເງິນຫລາຍກວ່າ 9,82 ລ້ານໂດລາສະຫະລັດ ໃນນີ້ມີສອງບໍລິສັດຈະຈ່າຍພາຍໃນປີ 2018 ເປັນຈຳນວນເງິນ 6,86 ລ້ານກວ່າໂດລາສະຫະລັດ. ສໍາລັບບໍລິສັດຮັບເໝົາອື່ນໆແມ່ນຍັງຈະໄດ້ສົມທົບກັບພາກສ່ວນກ່ຽວຂ້ອງສືບຕໍ່ລະດົມຕື່ມ ເພື່ອໃຫ້ມີຄວາມຍຸຕິທຳ ແລະ ປະຕິບັດພັນທະອາກອນກຳໄລໃຫ້ຖືກຕ້ອງຕາມລະບຽບກົດໝາຍຄືກັນກັບໂຄງການທີ່ໄດ້ຈ່າຍຜ່ານມາ.
