U19 ຍິງ ກຽມເຂົ້າແຂ່ງຂັນຊີງແຊ້ມອາຊີ ຮອບຄັດເລືອກທ້າຍເດືອນຕຸລານີ້

ນັກກິລາທີມຊາດຍິງ ຮຸ່ນອາຍຸບໍ່ເກີນ 19 ປີ ຫລື U19 ກຽມຄວາມພ້ອມເຂົ້າຮ່ວມການແຂ່ງຂັນບານ​ເຕະຍິງຊີງແຊ້ມອາຊີ ຮຸ່ນອາຍຸບໍ່ເກີນ 19 ປີ ຮອບຄັດເລືອກ 2019 (AFC U-19 WOMEN’S CHAMPIONSHIP 2019) ທີ່ປະເທດມຽນມາ ທ້າຍເດືອນຕຸລານີ້.

ທ່ານ ວົງມີໄຊ ສຸບົວຄໍາ ຫົວໜ້າຄູຝຶກທີມຊາດຍິງ U19 ລາວ ໃຫ້ສໍາພາດວ່າ: ການແຂ່ງຂັນບານ​ເຕະຍິງ ຊີງແຊ້ມອາຊີ ຮຸ່ນອາຍຸບໍ່ເກີນ 19 ປີ ຮອບຄັດເລືອກ 2019 (AFC U-19 WOMEN’S CHAMPIONSHIP 2019) ທີ່ປະເທດມຽມາ ໃນລະຫວ່າງວັນທີ 24-28 ກັນຍາ 2018 ໂດຍ ທີມຊາດລາວ ຢູ່ຮ່ວມກຸ່ມ F ປະກອບມີ: ມຽນມາ (ເຈົ້າພາບ), ອີຣານ ແລະ  ປາແລັສຕິນ ເຊິ່ງເປັນກຸ່ມທີ່ບໍ່ທໍາມະດາ ໂດຍສະເພາະ ທີມຊາດມຽນມາ ເປັນທີມທີ່ມີນັກກິລາຫລິ້ນດີຫລາຍຄົນ ແລະ ປີຜ່ານມາພວກເຂົາກໍສາມາດສ້າງຜົນງານໄດ້ຢ່າງໂດດເດັ່ນ. ແນວໃດກໍຕາມ ການແຂ່ງຂັນຄັ້ງນີ້ພວກເຮົາຈະເຮັດໃຫ້ດີທີ່ສຸດເພື່ອຜ່ານເຂົ້າຮອບດັ່ງກ່າວໃຫ້ໄດ້.