ຊົກບໍ່ສົມສັກສີກໍ່ຕ້ອງລົງຈາກສັງວຽນ
ໂດຍ: ທິດກໍ່າ
ຫວ່າງທິດຫລັງມານີ້, ທິດກໍ່າເຫັນແຫລ່ງຂ່າວໃນສື່ວ່າທາງນະຄອນຫລວງເຮົາໄດ້ປະຕິຮູບລະບົບການຈັດຕັ້ງໃນຖັນແຖວຂະແໜງການເງິນຢ່າງຈິງຈັງ ແລະ ເດັດຂາດ. ການປັບປຸງຄັ້ງນີ້ແມ່ນນັບແຕ່ຂັ້ນພະແນກການເງິນລົງໄປຮອດບັນດາຫ້ອງການ, ໜ່ວຍງານ ແລະ ຂະແໜງການຂັ້ນເມືອງທີ່ຂຶ້ນກັບພະແນກຕາມສາຍຕັ້ງ. ກ່ຽວກັບຮູບການປັບປຸງນີ້ກໍແມ່ນສັບປ່ຽນຕໍາແໜ່ງເອົາຜູ້ເກົ່າອອກເອົາຜູ້ໃໝ່ຂຶ້ນແທນ ຫລື ຖ້າຈະປຽບທຽບໃສ່ກໍແມ່ນຜູ້ໃດຫາກເຫັນວ່າໄດ້ຄອງຕໍາແໜ່ງມາຫລາຍປີແດ່ເບິ່ງຜົນງານບໍ່ໄປບໍ່ມາ, ບໍ່ສົມນ້ຳສົມຕ່ອນກໍຕ້ອງໄດ້ສັບປ່ຽນປຽບເໝືອນກັບນັກມວຍ ໃນເມື່ອຂຶ້ນສັງວຽນໄປແລ້ວຊົກບໍ່ສົມສັກສີກໍຈໍາເປັນຕ້ອງເຊີນເພິ່ນລົງສັງວຽນ ເພາະຖ້າປະປ່ອຍໃຫ້ເພິ່ນຊົກຕໍ່ໄປກໍຢ້ານມວນຊົນເຂົາຈະພາກັນເຫ່ ທັງເສຍໜ້າເສຍຕາ ແລະ ເສຍສັກສີຂອງການເປັນນັກມວຍຮຸ້ນອາຊີບ.
ຕາມທິດກໍ່າຄິດ, ການທີ່ທາງນະຄອນຫລວງມີການປັບປຸງລະບົບການຈັດຕັ້ງຢ່າງເດັດຂາດຈິງຈັງຄືດັ່ງວ່າມານີ້ ບໍ່ພຽງແຕ່ຈະມີຜົນດີຕໍ່ຊາດບ້ານເມືອງ, ຕໍ່ກົມກອງ ແລະ ຕໍ່ຂະແໜງການຂອງຕົນເທົ່ານັ້ນ, ແຕ່ມັນຍັງສະແດງໃຫ້ເຫັນເຖິງຄວາມເດັດຂາດ, ຄວາມຮັບຜິດຊອບສູງຕໍ່ພາລະກິດ ແລະ ຊະຕາກໍາຂອງບ້ານເມືອງ ແລະ ທັງໄດ້ຮັບການສະໜັບສະໜູນຈາກມະຫາຊົນທົ່ວໄປໃນສັງຄົມຢ່າງກວ້າງຂວາງ. ເປັນຫຍັງຈຶ່ງວ່າແນວນັ້ນ ? ເພາະຢູ່ພາຍໃນຂອງຂະແໜງການກ່ຽວຂ້ອງເອງກໍອາດຈະຮູ້ດີກວ່າທິດກໍ່າເກີນ 100 ເປີເຊັນແລ້ວ. ແຕ່ສະເພາະທິດກໍ່າເອງຄິດ ຕໍ່ບັນຫາດັ່ງກ່າວເທົ່າທີ່ເຄີຍເຫັນຜ່ານມາບາງກໍລະນີໃນຂັ້ນແກນນໍາ-ການນໍາໃນຂະແໜງການເງິນບາງບ່ອນ ບໍ່ວ່າໃນຄະນະນໍາ ກໍຄືບຸກຄົນທີ່ຮັບຜິດຊອບໃນໜ້າທີ່ຄອງຕໍາແໜ່ງເປັນຫ້າປີສິບປີກໍມີ. ອັນສອງມາເວົ້າເຖິງຜົນງານເພິ່ນກໍບໍ່ທັນມີອັນໃດໂດດເດັ່ນພໍຈະໃຫ້ການຈັດຕັ້ງ ແລະ ມະຫາຊົນເຂົາຍົກຍ້ອງ. ການເຮັດວຽກງານກໍບໍ່ໄດ້ຕາມແຜນທີ່ຄາດກະ, ເວົ້າແຈ້ງສະເພາະແຕ່ບັນຫາການເກັບລາຍຮັບເຂົ້າງົບປະມານແຕ່ລະປີກໍໄດ້ພຽງ 60-70% ຂອງແຜນການ, ແຕ່ມາເບິ່ງໃນດ້ານຊີວິດການເປັນຢູ່ສ່ວນຕົວເພິ່ນພັດປາກົດວ່າມີຄວາມແຕກໂຕນກັບພະນັກງານທົ່ວໄປ ຄືດັ່ງເຂົາວິຈານກັນໃນທົ່ວສັງຄົມວ່າຜູ້ຢູ່ການເງິນໂດຍສະເພາະໃນຂະແໜງພາສີ-ອາກອນເຮັດວຽກບໍ່ພໍສອງສາມປີກໍມີລົດໃຫຍ່ຂີ່, ມີເຮືອນຫລາຍຫລັງ, ມີດິນຫລາຍຕອນ ວ່າຊັ້ນ ! ນີ້ຄືສຽງຈົ່ມຂອງສັງຄົມທີ່ສະແດງໃຫ້ເຫັນເຖິງຄວາມບໍ່ໂປ່ງໃສໃນກົມກອງ ຫລື ໃນຕົວບຸກຄົນ. ອີກອັນໜຶ່ງກໍສະແດງໃຫ້ເຫັນວ່າມີການສໍ້ລາດບັງຫລວງຂອງພະນັກງານທີ່ຢູ່ໃກ້ກັບເງິນ. ສ່ວນວ່າເຫດຜົນຕ່າງໆອັນສຸດທ້າຍກໍອາດຈະມີຫລາຍແງ່ມຸມທີ່ສົມເຫດສົມຜົນທາງຂັ້ນນໍານະຄອນຫລວງເພິ່ນຈຶ່ງມີຄວາມຈໍາເປັນຕ້ອງໄດ້ປັບປຸງແກ້ໄຂໃນຂະແໜງການດັ່ງກ່າວໃຫ້ມີຄວາມເຂັ້ມແຂງ ແລະ ປອດໃສຂາວສະອາດໃນຕໍ່ໜ້າ.
ເຖິງຢ່າງໃດກໍດີ, ຕາມທິດກໍ່າວ່າຜ່ານກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ 8 ນີ້, ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ສົມດີ ດວງດີ ກໍໄດ້ລາຍງານຕໍ່ກອງປະຊຸມດັ່ງກ່າວວ່າ: ສະເພາະລາຍຮັບລວມຂອງທ້ອງຖິ່ນຈໍານວນ 794 ກວ່າຕື້ກີບນັ້ນ ເຖິງວ່າຈະບໍ່ສາມາດປະຕິບັດໄດ້ຕາມແຜນການ, ແຕ່ຜ່ານການໄລ່ລຽງກັບບັນດາແຂວງເຫັນວ່າມີ 7 ແຂວງທີ່ສາມາດປະຕິບັດລາຍຮັບໄດ້ເກີນແຜນການຈໍານວນ 33 ຕື້ກວ່າກີບ. ນອກນັ້ນຍັງມີ 10 ແຂວງ ແລະ ນະຄອນຫຼວງວຽງຈັນທີ່ບໍ່ສາມາດປະຕິບັດໄດ້ຕາມແຜນລວມມີມູນຄ່າຫລາຍກວ່າ 69 ຕື້ກີບ. ນີ້ແມ່ນເຫດຜົນໜຶ່ງທີ່ເຮັດໃຫ້ການນໍານະຄອນຫລວງຕ້ອງໄດ້ເລັ່ງປັບປຸງ ແລະ ປະຕິຮູບກົງຈັກໃນລະບົບການເງິນຂອງຕົນໃຫ້ໄປຕາມປ່ອງລ່ອງຕາມແປວ ແລະ ໃຫ້ມີຄວາມໂປ່ງໃສເຂັ້ມແຂງຂຶ້ນເລື້ອຍໆ. ຖ້າບໍ່ດັ່ງນັ້ນສະຫລຸບຍາມໃດກໍມີແຕ່ຄໍາວ່າ “ເປິະ” ຢ້ານວ່າບັນດາຫົວທັງຫລາຍພາກັນຕູດລົງຕັ່ງ ! ນະຄອນຫລວງເຮັດແລ້ວ 10 ແຂວງນັ້ນເດຈະເອົາຈັ່ງໃດກັນ !.
