ກະຊວງສຶກສາ ແລະ ລຸກຊໍາບວກ ຫາລືສືບຕໍ່ສ້າງຄວາມເຂັ້ມແຂງດ້ານການສຶກສາການທ່ອງທ່ຽວ ແລະ ໂຮງແຮມໃນລາວ
ເມື່ອທ້າຍອາທິດຜ່ານມາ, ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ໄດ້ຕ້ອນຮັບການເຂົ້າພົບປະຂອງທ່ານ ແຊມ ເຊີເນີ ອຸປະທູດແຫ່ງຣາຊະອານາຈັກ ລຸກຊໍາບວກ ປະຈໍາ ລາວ ໃນໂອກາດມາດໍາລົງຕໍາແໜ່ງເປັນອຸ ປະທູດຄົນໃໝ່ ປະຈໍາລາວ, ພ້ອມທັງປຶກສາຫາລືສືບຕໍ່ພັດທະນາວຽກງານການສຶກສາ ໂດຍສະເພາະແມ່ນການເຝິກອົບຮົມທັກສະທາງດ້ານການທ່ອງທ່ຽວ ແລະ ການໂຮງແຮມ, ເພື່ອສ້າງຄວາມເຂັ້ມແຂງໃຫ້ແກ່ພະນັກງານ, ຄູ-ອາຈານ ແລະ ນັກສຶກສາທາງດ້ານທັກສະການທ່ອງທ່ຽວ ແລະ ໂຮງແຮມໃນລາວ.
ໃນໂອກາດດຽວກັນ, ທ່ານ ນາງ ແສງເດືອນ ຫຼ້າຈັນທະບູນ ກໍໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ກ່າວສະແດງຄວາມຂອບໃຈ, ທີ່ລັດຖະບານລຸກຊໍາບວກໄດ້ໃຫ້ການຊ່ວຍເຫຼືອສ້າງຄວາມເຂັ້ມແຂງຕໍ່ກັບວຽກງານດັ່ງກ່າວໃນໄລຍະຜ່ານມາ ພ້ອມທັງຮຽກຮ້ອງໃຫ້ເພີ່ມທະວີຮັດແໜ້ນຄວາມສາມັກຄີລະຫວ່າງສອງປະເທດ ໃຫ້ດີຂຶ້ນເລື້ອຍໆ.
