ທ່ານ ນາງ ຊູຈີ ໃຫ້ຄຳໝັ້ນເລື່ອງ ຄວາມປອດໃສໃນກໍລະນີໂຣຮິງຢາ
ທ່ານ ນາງ ອອງຊານ ຊູຈີ ທີ່ປຶກສາແຫ່ງລັດຂອງມຽນມາ ກ່າວໃນວັນທີ 8 ຕຸລານີ້ ໃຫ້ຄຳໝັ້ນວ່າ: ລັດຖະບານມຽນມາຈະເພີ່ມຄວາມປອດໃສໃຫ້ຫລາຍຂຶ້ນໃນການແກ້ໄຂວິກິດການໂຣຮິງຢາ.
ທ່ານ ນາງ ຊູຈີ ກ່າວປາໄສຕໍ່ນັກທຸລະກິດຍີ່ປຸ່ນ ທີ່ນະຄອນຫລວງໂຕກຽວ ໃນວັນທີ 8 ຕຸລາວ່າ: ນາງຮູ້ດີວ່າ: ມຽນມາກຳລັງຜະເຊີນຄວາມທ້າທາຍ ໂດຍສະເພາະກໍລະນີເລື່ອງລັດຍະໄຂ່ ເຊິ່ງເປັນທີ່ຢູ່ຂອງຊາວໂຣຮິງຢາ ແລະ ມຽນມາບໍ່ໄດ້ພະຍາຍາມປິດບັງຄວາມຈິງໃນເລື່ອງນີ້. ນາງ ຊູຈີ ກ່າວວ່າ: ສັນຕິພາບ ແລະ ສະຖຽນລະພາບໃນປະເທດຂອງນາງມີຄວາມຈຳເປັນສຳລັບການເຊີນຊວນໃຫ້ຕ່າງປະເທດເຂົ້າມາລົງທຶນ, ນາງປາຖະໜາທີ່ຈະເປີດກວ້າງ ແລະ ເຮັດໃຫ້ເກີດຄວາມປອດໃສໃຫ້ບັນດາມິດປະເທດໄດ້ເຫັນ ເຊິ່ງຖ້າຍັງມີຄວາມກັງວົນ ຫລື ບໍ່ສະບາຍໃຈ ຂໍໃຫ້ເຈລະຈາຢ່າງເປີດເຜີຍກັບມຽນມາໄດ້.
