ສົງຄາມການຄ້າ ອາເມລິກາ-ຈີນ ກະທົບເສດຖະກິດໂລກຕໍ່ເນື່ອງ
ລາຍງານວິເຄາະສະບັບຫລ້າສຸດຂອງ IMF ລະບຸວ່າ: ການຕັ້ງກຳແພງພາສີຕອບໂຕ້ກັນ ລະຫວ່າງ ອາເມລິກາ ກັບ ຈີນ ສົ່ງຜົນກະທົບຕໍ່ທິດທາງການເຕີບໃຫຍ່ຂອງເສດຖະກິດໂລກ ເຊິ່ງຂະຫຍາຍຕົວຊ້າເຫລືອ 3,7% ໃນປີນີ້ ແລະ ປີໜ້າ.
A cycle of retaliatory trade tariffs hurts many countries and lowers long-term global GDP, as explained in the latest #WEO https://t.co/u79dahmCzo pic.twitter.com/YZASTBtzzJ
— IMF (@IMFNews) October 9, 2018
ສຳນັກຂ່າວຕ່າງປະເທດລາຍງານວ່າ: ກອງທຶນການເງິນສາກົນ (IMF) ອອກລາຍງານວິເຄາະສະຖານະການເສດຖະກິດໂລກປະຈຳໄຕມາດສຸດທ້າຍຂອງປີນີ້ ລະຫວ່າງກອງປະຊຸມປະຈຳປີຂອງ IMF ແລະ ທະນາຄານໂລກ (WB) ຢູ່ເກາະບາຫລີ ປະເທດອິນໂດເນເຊຍ ຕີລາຄາການເຕີບໃຫຍ່ຂອງເສດຖະກິດໂລກຢູ່ທີ່ 3,7% ໃນປີນີ້ ແລະ ປີໜ້າ, ຫລຸດລົງຈາກການຄາດຄະເນໃນລາຍງານເດືອນກໍລະກົດ ເຊິ່ງລະບຸໄວ້ທີ່ 3,9% ສຳລັບທັງສອງປີ.
ທັງນີ້, ປັດໄຈທີ່ສົ່ງຜົນຕໍ່ການປັບຫລຸດທ່າອ່ຽງການຂະຫຍາຍຕົວຂອງເສດຖະກິດໂລກຕາມທັດສະນະຂອງ IMF ຍັງລວມເຖິງການຕັ້ງກຳແພງພາສີຕອບໂຕ້ກັນລະຫວ່າງ ອາເມລິກາ ກັບ ຈີນ ເຊິ່ງ IMF ເນັ້ນວ່າຈະສົ່ງຜົນກະທົບເປັນຕ່ອງໂສ້ໄປທົ່ວໂລກ. ຕົວເລກທາງເສດຖະກິດຂອງກຸ່ມ 19 ປະເທດສະມາຊິກເຂດໃຊ້ເງິນເອີໂຣທີ່ຫລຸດລົງ, ສະພາບເບຣັກຊິດ, ນະໂຍບາຍອາເບະໂນມິກ ແລະ ການເພີ່ມອັດຕາດອກເບ້ຍນະໂຍບາຍແບບກ້າວກະໂດດຂອງກຸ່ມຕະຫລາດເກີດໃໝ່ຫລາຍປະເທດ ເພື່ອຫວັງຢັບຢັ້ງຄວາມປັ່ນປ່ວນຂອງເງິນທຶນໄຫລອອກ ໂດຍສະເພາະອາກຊັງຕິນ, ເບຣຊິນ, ຕວກກີ ແລະ ອາຟຣິກາໃຕ້.
Global growth is relatively strong but has plateaued at 3.7 percent as risks have started to materialize #WEO https://t.co/JKkxD3d32u pic.twitter.com/DZvvW8rLb1
— IMF (@IMFNews) October 9, 2018
ລາຍງານວິເຄາະຂອງ IMF ລະບຸອີກວ່າ: ຜົນກະທົບຈາກສົງຄາມການຄ້າລະຫວ່າງ ອາເມລິກາ ກັບ ຈີນ ຈະແກ່ຍາວໄປຈົນຮອດປີໜ້າ ສົ່ງຜົນຕໍ່ທ່າອ່ຽງການຂະຫຍາຍຕົວຂອງເສດຖະກິດອາເມລິກາ ເຊິ່ງຈະຫລຸດລົງຈາກ 2,7% ລົງມາຢູ່ 2,5% ແລະ ຂອງຈີນຈາກ 6,4% ລົງມາຢູ່ 6,2%. ເຖິງຢ່າງໃດກໍຕາມ, ຄາດຄະເນການເຕີບໃຫຍ່ທາງເສດຖະກິດຂອງອາເມລິກາ ແລະ ຈີນໃນປີນີ້ຍັງບໍ່ປ່ຽນແປງ ນັ້ນຄືຢູ່ 2,9% ແລະ 6,6% ຕາມລຳດັບ.
ຂະນະທີ່ສະຖານະການທາງເສດຖະກິດຂອງອິນໂດເນເຊຍ, ມາເລເຊຍ, ຟີລິບປິນ, ສິງກະໂປ ແລະ ໄທ ຄາດວ່າຈະເຕີບໃຫຍ່ໃນລະດັບ 5,3% ໃນປີນີ້ ແລະ 5,2% ໃນປີ 2019.
