ທ່ານ ຮຸນເຊນ ກ່າວວ່າ ບໍ່ຢ້ານ EU ຂູ່ຂວ້ຳບາດການຄ້າ
ນາຍົກລັດຖະມົນຕີ ຮຸນເຊນ ຂອງກຳປູເຈຍ ປະກາດປົກປ້ອງອະທິປະໄຕຂອງປະເທດເປັນຫລັກ, ບໍ່ສົນໃຈຄຳຂູ່ຂອງສະຫະພາບເອີຣົບ ທີ່ອາດຈະຕັດສິດທິເສດທາງການຄ້າຂອງກຳປູເຈຍ ຈາກຄວາມກັງວົນດ້ານສິດທິມະນຸດ.
ສຳນັກຂ່າວຣອຍເຕີລາຍງານວ່າ: ສະຫະພາບເອີຣົບ (EU) ແຈ້ງລັດຖະບານກຳປູເຈຍ ໃນວັນທີ 5 ຕຸລາວ່າ: ກຳປູເຈຍອາດສູນເສຍສິດພິເສດການເຂົ້າເຖິງຕະຫລາດ EU ເຊິ່ງເປັນກຸ່ມການຄ້າຂະໜາດໃຫຍ່ທີ່ສຸດໃນໂລກ ແລະ EU ກຳລັງພິຈາລະນາຂວ້ຳບາດທາງການຄ້າແບບດຽວກັນກັບມຽນມາ ໂດຍ EU ພ້ອມຈະລົງໂທດທັງ 2 ປະເທດ ຈາກການລະເມີດສິດທິມະນຸດ.
EU ເຕືອນວ່າ: ໄດ້ເລີ່ມທົບທວນເປັນເວລາ 6 ເດືອນ ການເຂົ້າເຖິງຕະຫລາດ EU ໂດຍບໍ່ຕ້ອງເສຍພາສີຂອງສິນຄ້າຈາກກຳປູເຈຍ ເຊິ່ງເປັນຂະບວນການທີ່ຈະເຮັດໃຫ້ຜະລິດຕະພັນເຄື່ອງນຸ່ງຫົ່ມ, ນ້ຳຕານ ແລະ ສິນຄ້າສົ່ງອອກອື່ນໆຂອງກຳປູເຈຍ ຕ້ອງເສຍພາສີພາຍໃນ 12 ເດືອນ.
ທ່ານ ຮຸນເຊນ ກ່າວຕໍ່ກຸ່ມນັກສຶກສາກຳປູເຈຍໃນຍີ່ປຸ່ນ ຢູ່ນະຄອນຫລວງໂຕກຽວ ໃນວັນທີ 7 ຕຸລາ ສ່ວນໜຶ່ງຂອງການຢ້ຽມຢາມຍີ່ປຸ່ນເພື່ອເຂົ້າຮ່ວມກອງປະຊຸມພາກພື້ນວ່າ: ກຳປູເຈຍຕ້ອງປົກປ້ອງອະທິປະໄຕຂອງຕົນ.
EU ເຕືອນກຳປູເຈຍໃນເດືອນກໍລະກົດຜ່ານມາວ່າ: ກຳປູເຈຍອາດສູນເສຍສະຖານະພິເສດທາງການຄ້າ ຫລັງການເລືອກຕັ້ງທົ່ວໄປເທື່ອຫລ້າສຸດ ໃນວັນທີ 29 ກໍລະກົດ ເຮັດໃຫ້ທ່ານ ຮຸນເຊນ ໄດ້ຄອງອຳນາດຕໍ່ໄປອີກ, ພາຍຫລັງຄອງອຳນາດມາ 33 ປີ ເຊິ່ງກຸ່ມສິດທິມະນຸດກ່າວວ່າ: ການເລືອກຕັ້ງຄັ້ງນີ້ບໍ່ຍຸຕິທຳ ເນື່ອງຈາກຂາດຝ່າຍຄ້ານທີ່ເຊື່ອຖືໄດ້.
