ສາເຫດແລະວິທີແກ້ອາການເຫງົານອນໃນຍາມເຮັດວຽກ ແລະ ຮຽນໜັງສື
ສາເຫດຂອງການເຫງົານອນເລື້ອຍໆນັ້ນເກີດໄດ້ຈາກຫລາຍປັດໄຈ ເຖິງວ່າເຮົາຈະນອນຫລາຍຊົ່ວໂມງຕໍ່ຄືນແລ້ວກໍຕາມ.
– ເກີດຈາກການນອນຫລັບ ຫລື ພັກຜ່ອນບໍ່ພຽງພໍ ເຊັ່ນ : ນອນເດິກ ບໍ່ສາມາດເຂົ້າສູ່ໄລຍະຫລັບເລິກໄດ້, ນອນໂກນສຽງດັງ, ຫລັບແລ້ວຕື່ນຫລາຍເທື່ອຈາກອາການຢຸດຫາຍໃຈຂະນະຫລັບ ຫລື ຖືກລົບກວນຢູ່ເປັນໄລຍະໆ, ບໍ່ຕໍ່ເນື່ອງໝົດຄືນ ສົ່ງຜົນເຮັດໃຫ້ອ່ອນເພຍ ແລະ ເຫງົານອນຕອນກາງເວັນ.
– ເກີດຈາກຄວາມຜິດປົກກະຕິຂອງລະບົບປະສາດທີ່ເຮັດໃຫ້ກົນໄກຄວບຄຸມຜິດປົກກະຕິ ເຊັ່ນ : ຄົນທີ່ເຄີຍໄດ້ຮັບອຸປະຕິເຫດທາງສະໝອງ, ພະຍາດຫລອດເລືອດສະໝອງ, ຊີ້ນປົ່ງໃນສະໝອງ ຈະນອນຫລາຍກ່ວາປົກກະຕິ. ນອກຈາກນີ້, ໃນທາງການແພດມີພະຍາດທີ່ເຮັດໃຫ້ມີອາການເຫງົານອນຫລາຍຜິດປົກກະຕິອື່ນໆນຳ.
– ສາເຫດຈາກເລືອດໄປລ້ຽງສະໝອງໄດ້ໜ້ອຍ ເຊິ່ງມີຫລາຍສາເຫດດັ່ງນີ້ : ກະດູກຄໍຂໍ້ທີໜຶ່ງເຄື່ອນໄປທັບເສັ້ນປະສາດ ຫລື ເສັ້ນເລືອດທີ່ໄປລ້ຽງສະໝອງ, ກິນອາຫານທີ່ຂົ້ວໃສ່ນຳ້ມັນຫລາຍເປັນປະຈຳ ແລ້ວເກີດໄຂມັນຈັບຈົນຂຸ້ນໜຽວສະສົມໃນລຳໄສ້ ກໍມີໂອກາດ ເຮັດໃຫ້ເລືອດໄປລ້ຽງສະໝອງໄດ້ໜ້ອຍ ເພາະລະບົບດູດຊຶມເສື່ອມ ແລະ ຖົງນຳ້ບີຂຸ້ນ, ມີແມ່ທ້ອງໃນລຳໄສ້ ຫລື ພະຍາດຢູ່ຜິວໜັງຈະກັດກິນເລືອດໃນຮ່າງກາຍ, ບໍ່ກິນເຂົ້າເຊົ້າເປັນສາເຫດໃຫ້ເລືອດບໍ່ລ້ຽງສະໝອງ ແລະ ຄວນສັງເກດອາການເລືອດໄປລ້ຽງສະໝອງບໍ່ພໍ ຫລື ເລືອດໄປລ້ຽງສະໝອງໄດ້ໜ້ອຍ ຈະເລີ່ມມີອາການດັ່ງຕໍ່ໄປນີ້ ເຊັ່ນ : ຜົມຫລົ່ນ, ໜ້າເຖົ້າໄວ, ຄໍ ອັກເສບງ່າຍ, ນອນບໍ່ຄ່ອຍຫລັບ, ນອນບໍ່ເຕັມອີ່ມ ແລະ ຝັນຫລາຍ.
– ການເຮັດວຽກຂອງໂມງຊີວິດ ຫລື ໂມງຊີວະພາບຢູ່ໃນເວລາຫລັບ : ມີແຮງຊຸກຍູ້ເຮັດໃຫ້ຫລັບຕະຫລອດເວລາ ເຊັ່ນ : ໂມງຊີວິດຢູ່ໃນເວລາຫລັບ, ແຕ່ຈຳເປັນຕ້ອງຕື່ນຍ້ອນພາລະໜ້າທີ່ວຽກງານ, ຢາກຫລັບກໍຕ້ອງຕື່ນ, ເຂົ້ານອນ ແລະ ຕື່ນນອນບໍ່ເປັນເວລາ.
– ກົນໄກຂອງການຫາວ : ຮ່າງກາຍຂອງຄົນເຮົາມີອາຍກາກໂບນິກ ແລະ ກົດແລັກຕິກຢູ່ໃນກ້າມຊີ້ນ ແລະ ກະແສເລືອດສູງ ຮ່າງກາຍບໍ່ສາມາດໄລ່ອອກທາງລົມຫາຍໃຈເຂົ້າອອກໄດ້ທັນ ຈຶ່ງມີການສືບລົມຫາຍໃຈທີ່ຍາວຂຶ້ນ ແລະ ການປ່ອຍລົມອອກດົນກ່ວາເກົ່າ ຫລື ເຮົາເອີ້ນວ່າຫາວນອນ. ສ່ວນການຫາວນອນແລ້ວມີນຳ້ຕາໄຫລອອກມານັ້ນ ເປັນຍ້ອນເຮົາຫາວນອນແລ້ວກ້າມຊີ້ນບໍລິເວນໃບໜ້າຈະເຄັ່ງ ແລະ ດຶງກ້າມຊີ້ນບໍລິເວນຕ່ອມນຳ້ຕາ ເຮັດໃຫ້ຕ່ອມນຳ້ຕາບີບໂຕ ແລະ ນຳ້ຕາທີ່ບັນຈຸຢູ່ພາຍໃນກໍຈະອອກມາໃນເວລາກ່ອນເຮົາຈະຫາວນອນແລ້ວ ບໍ່ແມ່ນວ່າເຮົາເຫງົານອນຈຶ່ງຫາວ, ແຕ່ເຮົາຫາວນອນຍ້ອນຮ່າງກາຍໄດ້ເຮັດວຽກໜັກຈົນຮ່າງກາຍມີການສະສົມຂອງອາຍກາກໂບນິກ ເຮັດໃຫ້ເຮົາຫາວ ແລະ ຮູ້ສຶກຢາກຈະພັກຜ່ອນ. ສ່ວນເວລາທີ່ເຮົາຕື່ນນອນຂຶ້ນມາເຮົາກໍຫາວນອນຄືກັນ ຍ້ອນຂະນະຫລັບນັ້ນເຮົາຈະຫາຍໃຈໃນປະລິມານໜ້ອຍກ່ວາເວລາຕື່ນເຖິງ 50 ເທົ່າ, ແຕ່ເມື່ອເຮົາຕື່ນຈາກການນອນຫລັບຂຶ້ນມາແລ້ວ ອະໄວຍະວະຕ່າງໆໃນຮ່າງກາຍເລີ່ມເຮັດວຽກກໍຕ້ອງການອົກຊີແຊນຫລາຍຂຶ້ນເຮົາຈຶ່ງຫາວນອນ.
– ຂາດວິຕາມິນບາງຊະນິດ ຈຳພວກວິຕາມິນເບຊະນິດຕ່າງໆ ຖ້າທ່ານມີອາການເຫງົານອນຢູ່ຕະຫລອດເວລາ ຫລື ຮູ້ສຶກວ່ານອນເທົ່າໃດກໍໍບໍ່ພໍ ຄວນເອົາໃຈໃສ່ທັນທີວ່າອາດມີສາເຫດມາຈາກປັດໄຈຕົ້ນຕໍດັ່ງການຂາດວິຕາມິນ ຄວນໄປກວດຮ່າງກາຍໃຫ້ຮູ້ສາເຫດ ເພາະການນອນຫລັບ ຫລື ພັກຜ່ອນບໍ່ພຽງພໍອາດເຮັດໃຫ້ເກີດພະຍາດຕ່າງໆຕາມມາໄດ້.
ສ່ວນວິທີແກ້ອາການເຫງົານອນ ຫລື ຫາວນອນໃນເວລາເຮັດວຽກ ຫລື ຮຽນໜັງສືມີດັ່ງນີ້ :
- ກິນເຂົ້າເຊົ້າຫລາຍຂຶ້ນ ແລະ ກິນເຂົ້າສວາຍໃນປະລິມານທີ່ພໍດີພໍງາມ ບໍ່ກິນຫລາຍຈົນເກີນໄປ
- ອອກກຳລັງກາຍທຸກມື້ ເພາະການອອກກຳລັງກາຍຈະເຮັດໃຫ້ການລຳລຽງອົກຊີແຊນໄປທົ່ວຮ່າງກາຍໄດ້ຄ່ອງແຄ້ວ ຈຶ່ງ ເຮັດໃຫ້ອາການເຫງົານອນຫລັງກິນເຂົ້າສວາຍຫລຸດລົງໄດ້.
- ເຮັດວຽກທີ່ຕ້ອງໃຊ້ສະມາທິ ແລະ ຄວາມຄິດໃນຕອນເຊົ້າ.
- ຖ້າບໍ່ໄຫວແທ້ໆກໍໃຫ້ເຊືອບຫລັບຈັກໜ້ອຍກ່ອນຈະລົງມືເຮັດວຽກ.
- ຝຶກສະມາທິໃຊ້ເວລາປະມານ 5 ນາທີຫລັງກິນເຂົ້າສວາຍນັ່ງສະມາທິ ກຳນົດລົມຫາຍໃຈ ພ້ອມເປີດເພງບັນເລງຄ່ອຍໆກໍສາມາດເຮັດໃຫ້ອາການເຫງົານອນຫລຸດລົງໄດ້.
- ເຫງົານອນຫລາຍກໍລຸກຂຶ້ນມາຍ່າງເລາະ.
- ລ້າງໜ້າກໍຊ່ວຍໃຫ້ເຊົາເຫງົານອນໄດ້.
- ສ້າງອາລົມຂັນ.
- ຈັດເວລາການນອນ ເພາະການນອນຫລັບພັກຜ່ອນໃຫ້ພຽງພໍ ແລະ ເປັນເວລາຈະຊ່ວຍຫລຸດບັນຫາການເຫງົານອນໃນຍາມເຮັດວຽກ ຫລື ຮຽນໜັງສືໄດ້.
- ເຄື່ອງດື່ມກໍຊ່ວຍຫລຸດອາການເຫງົານອນໄດ້ ເຊັ່ນ : ດື່ມກາເຟ ຫລື ນຳ້ໝາກໄມ້ຫາກຈຳເປັນ.
- ງົດດື່ມເຄື່ອງດື່ມທີ່ມີອານກໍຮໍ, ງົດກິນຢານອນຫລັບ ຫລື ຢາກ່ອມປະສາດ, ຫລີກເວັ້ນການດື່ມນຳ້ຊາ ຫລື ກາເຟ.
