ທ່ານນາຍົກສະເໜີໃຫ້ທະນາຄານແຫ່ງ ສປປ ລາວ ເອົາໃຈໃສ່ຫຼາຍບັນຫາສໍາຄັນ ເພື່ອຮັບມືກັບສິ່ງທ້າທາຍໃນຕໍ່ໜ້າ
ເນື່ອງໃນໂອກາດເຂົ້າຮ່ວມພິທີສະຫຼອງວັນສ້າງຕັ້ງທະນາຄານແຫ່ງ ສປປ ລາວ ຄົບຮອບ 50 ປີ ໃນວັນທີ 6 ຕຸລານີ້, ທີ່ຫໍປະຊຸມແຫ່ງຊາດ, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ເນັ້ນໃຫ້ທະນາຄານແຫ່ງ ສປປ ລາວ ສືບຕໍ່ແກ້ໄຂ ແລະ ຕິດຕາມ ສິ່ງທ້າທາຍຕໍ່ວຽກງານເງິນຕາຢ່າງໃກ້ຊິດ ເປັນຕົ້ນແມ່ນ ສະພາບການເງິນທີ່ບໍ່ໝັ້ນທ່ຽງ, ສົງຄາມການຄ້າກໍາລັງກໍ່ຕົວຂຶ້ນ; ການແຂ່ງຂັນທາງດ້ານເສດຖະກິດ ທີ່ອາດຈະກະທົບເຖິງການພັດທະນາເສດຖະກິດ-ສັງຄົມຂອງປະເທດເຮົາ, ສະນັ້ນ, ເພື່ອຮັບມືກັບບັນຫາທີ່ກ່າວມານັ້ນ ຂໍໃຫ້ຄະນະພັກ-ຄະນະນໍາ ແລະ ພະນັກງານໃນຂະແໜງທະນາຄານເອົາໃຈໃສ່ ຄື: (1) ຕ້ອງສ້າງສະຕິຕື່ນຕົວທາງການເມືອງທີ່ວ່າ ທຫລ ເປັນທະນາຄານຂອງລັດ, ຕ້ອງເຮັດທຸລະກິດເງິນຕາຢ່າງມີຄວາມຮັບຜິດຊອບຕໍ່ລັດ, ຕໍ່ປະຊາຊົນ ແລະ ຕໍ່ລູກຄ້າຢ່າງແທ້ຈິງ, ການເຮັດວຽກຂອງພະນັກງານການນໍາ ແລະ ພະນັກງານຂອງໜ່ວຍງານຕ່າງໆ ຕ້ອງໃຫ້ມີປະຊາທິປະໄຕລວມສູນ, ຕ້ານພະຍາດອາດຍາສິດ, ພະຍາດເອກະຊົນ, ຕ້ອງໂປ່ງໃສ ແລະ ຊື່ສັດບໍລິສຸດ, ຕ້ອງສ້າງໃຫ້ໄດ້ກໍາລັງແຮງສັງລວມ ເພື່ອເຮັດໃຫ້ທະນາຄານມີຄວາມເຂັ້ມແຂງຂຶ້ນເລື່ອຍໆ. (2) ຕ້ອງເຮັດທຸລະກິດການເງິນ ຢ່າງມີຄວາມເປັນມືອາຊີບ ມີຫຼັກວິທະຍາສາດ ແລະ ມີຫຼັກວິຊາການຢ່າງແທ້ຈິງ ເພື່ອໃຫ້ທັນກັບສະພາບການທີ່ມີຄວາມປ່ຽນແປງຕະຫຼອດເວລາ. (3) ຕ້ອງເຂັ້ມງວດໃນການປະຕິບັດພາລະບົດບາດ ແລະ ໜ້າທີ່ຂອງຕົນໃນຖານະເປັນຜູ້ຄຸ້ມຄອງມະຫາພາກດ້ານເງິນຕາ; ເອົາໃຈໃສ່ປະຕິບັດ 8 ມາດຕະການ ໃນການຊຸກຍູ້ການເຕີບໂຕຂອງເສດຖະກິດທີ່ລັດຖະບານໄດ້ວາງອອກ, ໂດຍສະເພາະມາດຕະການທີ່ພົວພັນໂດຍກົງກັບການຮັກສາສະຖຽນລະພາບເງິນຕາແຫ່ງຊາດໃຫ້ໝັ້ນທ່ຽງ, ສະກັດກັ້ນໄພເງິນເຟີ້, ປັບປຸງນະໂຍບາຍເງິນຕາ, ຄວບຄຸມປະລິມານເງິນ M2 ໃຫ້ຢູ່ໃນກອບທີ່ກໍານົດໄວ້ ແລະ ວຽກງານອື່ນໆ. (4) ຮີບຮ້ອນຜັນຂະຫຍາຍ ຄໍາສັ່ງ 02/ນຍ ວ່າດ້ວຍການປັບປຸງລະບຽບການ ແລະ ກົນໄກການປະສານງານໃນການດໍາເນີນທຸລະກິດຢູ່ລາວ ເພື່ອປັບປຸງຕົວຊີ້ວັດທີ 5 (ການເຂົ້າເຖິງສິນເຊື້ອ) ແລະ ຕົວຊີ້ວັດທີ 6 (ການປ້ອງກັນການລົງທຶນຂະໜາດນ້ອຍ ແລະ ຜູ້ຖືຮຸ້ນສ່ວຍນ້ອຍ) ໃຫ້ຢູ່ໃນອັນດັບທີ່ດີຂຶ້ນກວ່າເກົ່າ ແນໃສ່ເຮັດໃຫ້ອັນດັບລວມຂອງການດໍາເນີນທຸລະກິດຢູ່ລາວ ຢູ່ໃນສອງຕົວເລກ. (5). ເອົາໃຈໃສ່ຄວບຄຸມອັດຕາແລກປ່ຽນໃຫ້ມີຄວາມສະຫງົບ ແລະ ເໜັງຕີງຕາມຂອບເຂດທີ່ກໍານົດໄວ້ ໂດຍໃຫ້ທົບທວນະໂຍບາຍ ແລະ ກົນໄກການກໍານົດອັດຕາແລກປ່ຽນທີ່ ທຫລ ຈັດຕັ້ງປະຕິບັດຜ່ານມາ, ພ້ອມນີ້, ຕ້ອງຄຸ້ມຄອງ, ຊຸກຍູ້, ຊ່ວຍເຫຼືອທະນາຄານທຸລະກິດ ແລະ ລົງຕິດຕາມກວດກາຢ່າງໃກ້ຊິດການເຄື່ອນໄຫວທຸລະກິດຂອງຮ້ານແລກປ່ຽນເງິນຕາຢ່າງເຂັ້ມງວດ ເພື່ອຈໍາກັດຊ່ອງຫວ່າງ ແລະ ປະກົດການຫຍໍ້ທໍ້ຕ່າງໆ, ພ້ອມທັງຄວບຄຸມສ່ວນຕ່າງອັດຕາແລກປ່ຽນລະຫວ່າງທະນາຄານ ແລະ ຕະຫຼາດບໍ່ໃຫ້ຫ່າງກັນເກີນຄວນທີ່ຈະເປັນການກະທົບຕໍ່ໄພເງິນເຟີ້. (6). ເພີ່ມທະວີຄຸ້ມຄອງເງິນຕາຕ່າງປະເທດໃຫ້ຮັດກຸມ ແລະ ເຄື່ອນໄຫວຢູ່ພາຍໃຕ້ລະບຽບກົດໝາຍຢ່າງເຂັ້ມງວດ, ຊຸກຍູ້ສົ່ງເສີມການຊໍາລະສະສາງໂດຍນໍາໃຊ້ເງິນກີບຢູ່ພາຍໃນປະເທດໃຫ້ຫຼາຍຂຶ້ນ, ສົ່ງເສີມໃຫ້ມີການຊໍາລະເປັນເງິນສົດໜ້ອຍລົງ ແລະ ຊໍາລະຜ່ານລະບົບທະນາຄານໃຫ້ຫຼາຍຂຶ້ນ. (7). ຄຸ້ມຄອງອັດຕາສ່ວນຕ່າງໆຂອງອັດຕາດອກເບ້ຍເງິນຝາກ ແລະ ເງິນກູ້ ໃຫ້ແທດເໝາະກັບສະພາບຈິງຂອງຕະຫຼາດ. (8). ຄຸ້ມຄອງການເຄື່ອນໄຫວຂອງບັນດາທະນາຄານທຸລະກິດໃຫ້ມີຄວາມໝັ້ນຄົງ; ເຂັ້ມແຂງ ສາມາດປະຕິບັດບົດບາດເປັນສາຍເລືອດຫຼໍ່ລ້ຽງເສດຖະກິດຂອງປະເທດ, ມີການຕິດຕາມກວດກາ ໃຫ້ເຄື່ອນໄຫວຕາມລະບຽບການຢ່າງເຂັ້ມງວດ ແລະ ສິ່ງສໍາຄັນແມ່ນຕ້ອງຄຸ້ມຄອງສິນເຊື່ອໃຫ້ຮັດກຸມ, ຄຸ້ມຄອງຄວາມສ່ຽງສິນເຊື່ອ ເພື່ອບໍ່ໃຫ້ອັດຕາສ່ວນໜີ້ບໍ່ເກີດດອກອອກຜົນສູງເກີນໄປ. (9). ເລັ່ງປັບປຸງທະນາຄານທຸລະກິດ ໃຫ້ຄົບເງື່ອນໄຂ ແລະ ມາດຖານ ກ່ອນການຊອກຫາຄູ່ຮ່ວມທຶນ ເພື່ອການດໍາເນີນກິດຈະການໃຫ້ມີປະສິດທິຜົນກວ່າໄລຍະຜ່ານມາ. (10). ຕ້ອງຄຸ້ມຄອງສະຖານບັນການເງິນທີ່ບໍ່ແມ່ນທະນາຄານໃຫ້ດີ, ບໍ່ໃຫ້ເກີດມີບັນຫາການຂາດສະພາບຄ່ອງ, ຂາດຄວາມເຊື່ອຖືຂອງສັງຄົມ ເພາະຈະສ້າງຜົນເສຍຫາຍໃຫ້ແກ່ປະຊາຊົນ, ພ້ອມນີ້, ກໍຕ້ອງຕິດຕາມການເຄື່ອນໄຫວຂອງຫົວໜ່ວຍທຸລະກິດທີ່ໄປເຄື່ອນໄຫວບໍ່ສອດຄ່ອງກັບລະບຽບກົດໝາຍ, ຖ້າເກີດມີໝໍ່ແໜງຕ້ອງແກ້ໄຂແຕ່ຫົວທີ, ບໍ່ໃຫ້ເກີດມີສະພາບຄືຜ່ານມາ ເຊັ່ນ (ບໍລິສັດພີເອັດສ, ອາຊຽນເຟັສ ແລະ ກໍລະນີອື່ນໆເປັນຕົ້ນ). (11). ພັດທະນາຕະຫຼາດທຶນ ແລະ ຊຸກຍູ້ຕະຫຼາດຫຼັກຊັບລາວ ໃຫ້ຂະຫຍາຍຕົວ ເພື່ອເປັນບ່ອນລະດົມທຶນຂະຫຍາຍທຸລະກິດ ແລະ ມີການເຄື່ອນໄຫວທຸລະກິດຫຼາຍຂຶ້ນ. (12). ສືບຕໍ່ຫັນເປັນທັນສະໄໝລະບົບການຊໍາລະສະສາງຂອງທະນາຄານ. (13). ສ້າງ ແລະ ປັບປຸງນິຕິກໍາຕ່າງໆ ເພື່ອຮັບໃຊ້ຂະແໜງການທະນາຄານໃຫ້ຄົບຖ້ວມ ແລະ ຮັດກຸມ, ໃນນັ້ນ, ໃຫ້ສຸມໃສ່ຈັດຕັ້ງປະຕິບັດ ແລະ ຜັນຂະຫຍາຍ ກົດໝາຍວ່າດ້ວຍ ທະນານຄານແຫ່ງ ສປປ ລາວ ທີ່ຫາກໍໄດ້ຮັບຮອງການປັບປຸງໃໝ່, ກົດໝາຍລະບົບການຊໍາລະ ແລະ ກົດໝາຍກ່ຽວຂ້ອງອື່ນໆ; ພ້ອມນີ້, ກໍໃຫ້ສ້າງນິຕິກໍາລຸ່ມກົດໝາຍ ເພື່ອເປັນບ່ອນອີງໃນການປະຕິບັດຕົວຈິງ ແລະ (14). ໃຫ້ສືບຕໍ່ປັບປຸງ ແລະ ແກ້ໄຂອຸປະສັກອັດຕັນອື່ນໆ ໃນຂະແໜງທະນາຄານ ເພື່ອສ້າງທ່ວງທ່າໃໝ່ໃຫ້ແກ່ການພັດທະນາເສດຖະກິດ-ສັງຄົມ ຕາມຄາດໝາຍທີ່ກໍານົດໄວ້ໃຫ້ທັນເວລາ ແລະ ສອດຄ່ອງກັບສະພາບການຕົວຈິງ, ບໍ່ອະນຸຍາດໃຫ້ພະນັກງານສວຍໃຊ້ ເພື່ອຜົນປະໂຫຍດສ່ວນຕົວ ແລະ ຕ້ານການສໍ້ລາດບັງຫຼວງໃນຖັນແຖວຂອງທະນາຄານທຸກລະບົບ.
