ຮ້ານຄຳພູວົງ ເປີດສາຂາໃຫມ່ຢູ່ຕະຫລາດໂພນໂຮງແຂວງວຽງຈັນ
ໃນວັນທີ 6 ຕຸລານີ້, ຮ້ານຄຳພູວົງ ໄດ້ຈັດພິທີເປີດສາຂາໃໝ່ຮ້ານຂາຍຄຳຂອງຕົນຢູ່ຕະຫລາດໂພນໂຮງແຂວງວຽງຈັນ, ເພື່ອເປັນການຂະຫຍາຍທຸລະກິດ ແລະ ສະໜອງຜະລິດຕະພາບຄໍາຮູບປະພັນ ແລະ ອັນຍະມະນີທີ່ມີຄຸນນະພາບແກ່ລູກຄ້າໄດ້ທົ່ວເຖິງ, ໂດຍມີທ່ານນາງ ສິງຄໍາ ພົງສະຫວັນ ຮອງເຈົ້າແຂວງວຽງຈັນ, ພ້ອມດ້ວຍລູກຄ້າເຂົ້າຮ່ວມເປັນຈໍານວນຫລາຍ.
ທ່ານ ພູວົງ ພະມີສິດ ເຈົ້າຂອງຮ້ານຂາຍຄຳພູວົງ ໄດ້ໃຫ້ຮູ້ວ່າ: ການເປີດສາຂາແຫ່ງນີ້, ເພື່ອອຳນວຍຄວາມສະດວກແກ່ລູກຄ້າ ແລະ ທັງເປັນການຂະຫຍາຍທຸລະກິດອອກສູ່ຕ່າງແຂວງ, ຊຶ່ງເປັນສາຂາທີ 6, ປັດຈຸບັນ, ຮ້ານພວກເຮົາມີຢູ່ນະຄອນຫລວງວຽງຈັນ 4 ສາຂາ, ແຂວງຈຳປາສັກ ແລະ ແຂວງ ວຽງຈັນແຂວງລະ 1 ສາຂາ ແລະ ໃນອານາຄົດອັນໃກ້ນີ້, ພວກເຮົາຈະເປີດເພີ່ມຕື່ມອີກ 1 ຂາສາຢູ່ແຂວງໄຊຍະບູລີ ແລະ ຫລວງພະບາງ.
ທ່ານ ພູວົງ ພະມີສິດ ໃຫ້ຮູ້ວ່າ: ຮ້ານຄຳພູວົງ, ສ້າງຕັ້ງຂຶ້ນມາຫລາຍກວ່າ 10 ປີ ແລະ ໄດ້ຮັບຄວາມນິຍົມຈາກສັງຄົມນັບມື້ຫລາຍຂຶ້ນ, ໂດຍການສະໜອງເຄື່ອງປະດັບອັນຍະມະນີ ແລະ ຄຳຮູບປະພັນທີ່ມີຄຸນນະພາບ, ນອກນີ້, ຍັງໄດ້ບໍລິການອອກແບບເຄື່ອງປະດັບທີ່ມີຮູບຊົງສວຍງາມຕາມຄວາມຕ້ອງການຂອງຂອງລູກຄ້ານໍາອີກ ແລະ ຄຽງຄູ່ການດໍາເນີນທຸລະກິດແລ້ວ, ຮ້ານຄຳພູວົງ ຍັງໄດ້ມີການປະກອບສ່ວນຊ່ວຍສັງຄົມໃນດ້ານຕ່າງໆ, ໂດຍສະເພາະການສະໜັບສະໜູນມົງກຸດການປະກວດນາງສາວລາວ ແລະ ກິດຈະກຳອື່ນໆ.
ຜູ້ບໍລິກຫານຮ້ານຄຳພູວົງ ສາຂາໂພນໂຮງ ໃຫ້ຮູ້ວ່າ: ໃນໂອກາດເປີດສາຂາຢູ່ ໂພນໂຮງ ນີ້, ຍັງພົບການເປີດໂຕປະຕິທິນໃຫມ່ຂອງຮ້ານຄຳພູວົງ ແລະ ຍັງມີການເດີນແບບຈາກຫນຸ່ມຫຼໍ ສາວງາມ ທີ່ສຳຄັນຍັງຈັບສະຫຼາກແຈກຂອງລາງວັນປະຈຳເດືອນ 9 ມີກິດຈະກຳອີກຫຼາກຫຼາຍ ເພື່ອເປັນການຄືນກຳໄລແກ່ລູກຄ້າ, ພ້ອມດຽວກັນນັ້ນ ຍັງມີສິດຮັບບັດຊີງໂຊກ ເພື່ອຈະມີການຈັບສະຫລາກປະຈຳປີຂອງຮ້ານ ຄຳພູວົງ ເຊິ່ງເປັນລາງວັນຊຸດສາຍຄໍຄຳ ໜັກ 35 ບາດ ແລະ ລາງວັນອື່ນໆ ໃນທ້າຍປີນີ້.
