ຄວາມຮູ້ກ່ຽວກັບວັນເດືອນປີໝົດອາຍຸຂອງຢາ

ໃນການກິນຢາ ສິ່ງສຳຄັນທີ່ຄວນຄຳນຶງຫລາຍກໍແມ່ນການສັງເກດວ່າຢາໝົດອາຍຸຫລືຍັງ, ຢາຍັງຢູ່ໃນສະພາບດີຫລືບໍ່, ຢາ ໝົດອາຍຸບາງຊະນິດເຮັດໃຫ້ລະຄາຍເຄືອງກະເພາະອາຫານຈົນອາດກາຍເປັນພະຍາດກະເພາະອາຫານ ຫລື ແທນທີ່ຈະລະງັບ ແລະ ປິ່ນປົວພະຍາດ ແຕ່ຊຳ້ພັດເຮັດໃຫ້ພະຍາດລຸກລາມຫລາຍຂຶ້ນ, ໂຕຢ່າງຢາບາງຊະນິດເມື່ອເກີດການເສື່ອມຄຸນນະພາບອາດເຮັດໃຫ້ມີໂທດ ແລະ ເປັນໄພແກ່ຮ່າງກາຍ ເຖິງຂັ້ນເຮັດໃຫ້ໝາກໄຂ່ຫລັງວາຍ ແລະ ໝາກໄຂ່ຫລັງອັກເສບໄດ້.

ການສັງເກດຢາໝົດອາຍຸມີຄື : ຢາສ່ວນຫລາຍຈະລະບຸວັນທີຜະລິດ ແລະ ວັນໝົດອາຍຸໄວ້ເທິງສະຫລາກ ຫລື ຊອງຢາຢ່າງຈະແຈ້ງ ໂດຍວັນທີຜະລິດເພິ່ນຈະຂຽນວ່າ Manu.Date ຫລື Mfg.date ຕິດຕາມໂດຍວັນ, ເດືອນ, ປີ ຂອງວັນທີ່ຜະລິດຢາ. ສ່ວນວັນໝົດອາຍຸຈະຂຽນວ່າ : Expiry Date ຫລື Used before ຫລື Expiring ຫລື Use by ແລ້ວຕິດຕາມ ໂດຍວັນ – ເດືອນ – ປີ ຂອງວັນທີ່ຢາໝົດອາຍຸ, ໂຕຢ່າງ : Exp. date 30/07/11 ໝາຍຄວາມວ່າຢາຈະໝົດອາຍຸໃນວັນທີ 30 ກໍລະກົດ ປີ 2011.

ຢາບາງຊະນິດລະບຸໄວ້ພຽງວັນຜະລິດ, ແຕ່ບໍ່ລະບຸວັນໝົດອາຍຸ ໂດຍທົ່ວໄປຫາກເປັນຢານຳ້ທີ່ຍັງບໍ່ໄດ້ເປີດໃຊ້ຈະເກັບໄວ້ໄດ້ 3 ປີ ນັບຈາກວັນຜະລິດ, ແຕ່ຫາກເປີດໃຊ້ແລ້ວກໍຂຶ້ນຢູ່ກັບວ່າມີການເບິ່ງແຍງຮັກສາໄດ້ດີພໍຫລືບໍ່ ເຊັ່ນ : ການໃຊ້ປາກດື່ມຢາແກ້ໄອຈາກແກ້ວ (ບໍ່ຄວນເຮັດ ເພາະຈະບໍ່ຮູ້ປະລິມານຢາທີ່ແນ່ນອນ) ຈະເຮັດໃຫ້ຢາປົນເປື້ອນ ແລະ ເສຍຄຸນໄດ້ໃນເວລາ 2 – 3 ມື້, ແຕ່ຫາກເທໃສ່ບ່ວງ, ປິດຝາຢ່າງດີ ແລະ ເກັບມ້ຽນໄວ້ໃນຕູ້ເຢັນ ປະມານ 3 ເດືອນກໍຄວນເອົາໄປຖິ້ມ. ໃນກໍລະນີທີ່ເປັນຢາເມັດສາມາດເກັບມ້ຽນໄວ້ໄດ້ 5 ປີນັບຈາກວັນທີຜະລິດ.