ຕາວັນເທຄວັນໂດສາຂາ 3 ເປີດຢ່າງເປັນທາງການ
ສະໂມສອນ ເທຄວັນໂດ ສາຂາ 3 ເປີດຢ່າງເປັນທາງການແລ້ວ ເພື່ອຕອບສະໜອງຄວາມຮຽກຮ້ອງຕ້ອງການຂອງສັງຄົມ ແລະ ສົ່ງເສີມຜູ້ທີ່ມີຄວາມຮັກມັກດ້ານກິລາເທຄວັນໂດກ້າວສູ່ການເປັນນັກກິລາທີມຊາດໃນອະນາຄົດ.
ທ່ານນາງ ສຸດທິດາ ພົມມະວົງ ປະທານສະໂມສອນ ເທຄວັນໂດຕາວັນ ໃຫ້ສໍາພາດວ່າ: ພາຍຫລັງທີ່ໄດ້ເປີດສອນເທຄັວນໂດຕາວັນສາຂາທໍາອິດແຕ່ປີ 2010 ສູນກິລາລາວ-ຍີ່ປຸ່ນ ບູໂດເຊັນເຕີ (ບ້ານອານຸ ເມືອງຈັນທະບູລີ, ນ/ວ) ເຊິ່ງເບື້ອງຕົ້ນມີນັກກິລາພຽງແຕ່ 9 ຄົນ ເຊິ່ງມາຮອດປັດຈຸບັນມີນັກກິລາ 100 ກວ່າຄົນ ແລະ ໃນປີ 2018 ໄດ້ເປີດອີກສາຂາໜຶ່ງທີ່ສູນການຄ້າລາວໄອເຕັກ ຊັ້ນ 4. ດັ່ງນັ້ນ ເພື່ອຕອບສະໜອງຄວາມຮຽກຮ້ອງຕ້ອງການຂອງນັກກິລາແລ້ວ ພວກເຮົາຈຶ່ງໄດ້ເປີດສອນອີກສາຂາທີ 3 ຢູ່ບ້ານໜອງທາໃຕ້ ເມືອງຈັນທະບູລີ ຂຶ້ນຢ່າງເປັນທາງການ, ທັງນີ້ກໍເພື່ອຕໍ່ຍອດໃຫ້ແກ່ຜູ້ທີ່ມີຄວາມຮັກມັກກ້າວສູ່ນັກກິລາທີມຊາດໃນອະນາຄົດ.
ສໍາລັບການຝຶກຊ້ອມຂອງສະໂມສອນຕາວັນ ເທຄວັນໂດ ສາຂາ 3 ເປີດສອນທຸກໆວັນຈັນ-ສຸກ ເວລາ 16:30-18:00 ແລະ 18:00-19:30 ໂມງ; ວັນເສົາ-ອາທິດເວລາ 10:00-11:30 13:00-14:30, 14:30-16:00 ໂມງ, 16:30-18:00 ໂມງ ແລະ 18:00-19:30 ໂມງ. ຖ້າທ່ານໃດສົນໃຈສາມາດຕິດຕໍ່ໄດ້ທີ່ເບີ: 020 22112211; 02028440066.
