ວິຕາມິນເດປ້ອງກັນເບົາຫວານຊະນິດທີ 2 ໄດ້ແທ້ບໍ່ ?

ອິນຊູລິນ ເປັນຮໍໂມນທີ່ມີຄວາມສຳຄັນຕໍ່ສຸຂະພາບ ໂດຍການຊ່ວຍດູດຊຶມກລູໂກສທີ່ເຂົ້າສູ່ກະແສເລືອດໄປສູ່ເນື້ອເຍື່ອກ້າມ ຊີ້ນຕ່າງໆ ແລະ ຕັບ ໝາຍຄວາມວ່າອິນຊູລິນຄວບຄຸມວິທີການທີ່ຮ່າງກາຍໃຊ້ ແລະ ສຳຮອງກລູໂກສ. ຜູ້ທີ່ເປັນພະຍາດເບົາຫວານຊະນິດທີ 2 ບໍ່ສາມາດທັງຜະລິດອິນຊູລິນເພື່ອຈັດການກັບປະລິມານກລູໂກສທີ່ກິນເຂົ້າໄປ ຫລື ຮ່າງກາຍບໍ່ໄດ້ຮັບອິນຊູລິນທີ່ຮ່າງກາຍຜະລິດຂຶ້ນມາເອງ ຜົນກໍຄື ເມື່ອບໍ່ສາມາດຄວບຄຸມກລູໂກສໄດ້ປະລິມານກລູໂກສຈະສະສົມເພີ່ມຂຶ້ນໃນກະແສເລືອດ ເຮັດໃຫ້ເກີດເປັນເບົາຫວານ. ຜູ້ທີ່ເປັນເບົາຫວານຊະນິດທີ 2 ອາດມີອາການຕ່າງໆ ເຊັ່ນ : ສາຍຕາບໍ່ດີ, ມີບັນຫາຜິວ ແລະ ຄວາມດັນເລືອດສູງ.

ການເກີດເບົາຫວານຊະນິດທີ 2 ຕ້ອງໃຊ້ເວລາອາການຕ່າງໆ ແລະ ຄວາມຮຸນແຮງເພີ່ມຂຶ້ນຕາມໄລຍະເວລາ ໂດຍປົກກະຕິແລ້ວ ຄົນສ່ວນຫລາຍທີ່ນຳ້ໜັກເກີນມາດຕະຖານມັກກວດພົບວ່າເປັນເບົາຫວານຊະນິດທີ 2.

ເປັນທີ່ຮູ້ຈັກກັນດີວ່າວິຕາມິນເດມີປະໂຫຍດໃນການຜະລິດທາດການຊຽມ ເຊິ່ງໃນທາງກົງກັນຂ້າມ ວິຕາມິນເດຍັງຊ່ວຍກຳຈັດປະລິມານນຳ້ຕານໃນເລືອດໄດ້ນຳ ປະຈຸບັນນັກວິໄຈ ແລະ ນັກວິທະຍາສາດຕັ້ງຂໍ້ສັງເກດກ່ຽວກັບຄວາມສຳພັນລະຫ່ວາງການຮັບວິຕາມິນເດກັບເບົາຫວານຊະນິດທີ 2 ພວກເຂົາສົງໄສວ່າວິຕາມິນເດສາມາດຊ່ວຍຫລຸດໂອກາດ ຫລື ຄວາມຮຸນແຮງຂອງເບົາຫວານຊະນິດທີ 2 ໄດ້ແທ້ບໍ່ ຈົນເຖິງມື້ນີ້ຍັງມີວຽກງານວິໄຈບາງສ່ວນທີ່ລະບຸວ່າ ໄວໜຸ່ມທີ່ມີລະດັບວິຕາມິນເດສູງກ່ວາ ມີຄວາມສ່ຽງໃນການເປັນເບົາຫວານຊະນິດທີ 2ໜ້ອຍກ່ວາເມື່ອປຽບທຽບກັບຜູ້ທີ່ມີປະລິມານວິຕາມິນເດໃນຮ່າງກາຍໜ້ອຍກ່ວາ.

ການເພີ່ມວິຕາມິນເດໃນແຕ່ລະມື້ນັ້ນມີຫລາຍວິທີ ຈາກແສງຕາເວັນ ຖືວ່າເປັນແຫລ່ງວິຕາມິນເດທີ່ໃຫຍ່ທີ່ສຸດ ການຢູ່ກາງແຈ້ງເພື່ອຮັບແສງຕາເວັນໃນຕອນເຊົ້າ ແລະ ຕອນກ່ອນຕາເວັນຈະຕົກດິນ ຊ່ວຍໃຫ້ຮ່າງກາຍຮັບວິຕາມິນເດໄດ້, ແຕ່ແນວໃດກໍຕ້ອງລະວັງຢ່າຕາກແດດກ້າໆຈົນໄໝ້ຜິວໜັງ.

ຈາກອາຫານແມ່ນໄດ້ແກ່ : ໄຂ່ຂາວ, ຕັບງົວ, ໝາກກ້ຽງ, ທັນຍາພືດ, ຊີສ ແລະ ປາທີ່ມີກົດໄຂມັນຈຳເປັນສູງ. ການກິນອາຫານທີ່ມີວິຕາມິນເດຫລາຍສາມາດຊ່ວຍເພີ່ມປະລິມານວິຕາມິນເດໃນຮ່າງກາຍໄດ້.

ຈາກແຫລ່ງອື່ນໆ ເຊັ່ນ : ອາຫານເສີມວິຕາມິນເດ ແລະ ນຳ້ມັນປາ ເປັນອີກໜຶ່ງແຫລ່ງທີ່ໃຫ້ວິຕາມິນເດ. ແນວໃດກໍຕາມ ການກິນອາຫານເສີມຄວນປຶກສາແພດເພື່ອພິຈາລະນາເຖິງຄວາມເໝາະສົມສຳລັບແຕ່ລະຄົນ.