ມຸນແຈອິນ ຈະປະສານຮອຍແຕກໃນປະເທດ ຫລັງຊະນະເລືອກຕັ້ງປະທານາທິບໍດີ ສ.ເກົາຫລີ
ເຊອຸນ 10 ພຶດສະພາ: ທ່ານ ມຸນ ແຈອິນ ຜູ້ນຳຝ່າຍເສລີນິຍົມຢູ່ ສ.ເກົາຫລີ ໄດ້ສະຫລອງໄຊຊະນະໃນການເລືອກຕັ້ງປະທານາທິບໍດີ ທ່າມກາງກຸ່ມຜູ້ສະໜັບສະໜູນໝື່ນກວ່າຄົນ ຢູ່ຖະໜົນໃນນະຄອນຫລວງເຊອຸນ ໂດຍກຳນົດເຂົ້າພິທີສາບານຕົນ ແລະ ເລີ່ມວຽກໃນຖານະປະທານາທິບໍດີຄົນໃໝ່ທັນທີໃນວັນທີ 10 ພຶດສະພານີ້ ໂດຍປະກາດຈະປະສານຮອຍແຕກທີ່ເກີດຂຶ້ນພາຍໃນປະເທດ ທ່າມກາງໄພຄຸກຄາມຈາກ ສປປ ເກົາຫລີ ແລະ ການເປັນພັນທະມິດທີ່ຍັງບໍ່ແນ່ນອນກັບລັດຖະບານອາເມລິກາໃນຍຸກປະທານາທິບໍດີ ໂດນັນ ທຣຳ.
ທ່ານ ມຸນ ແຈອິນ ເຊິ່ງໄດ້ຮັບໄຊຊະນະໃນການເລືອກຕັ້ງທ່າມກາງຄວາມວຸ້ນວາຍທາງການເມືອງຄັ້ງໃຫຍ່ທີ່ສຸດຂອງປະເທດ ແລະ ເປັນຜູ້ນຳສາຍເສລີນິຍົມຄົນທຳອິດໃນຮອບທົດສະວັດ ຈະເລີ່ມວຽກໃນຖານະປະທານາທິບໍດີ ສ.ເກົາຫລີ ທັນທີໃນວັນທີ 10 ພຶດສະພານີ້, ພາຍຫລັງຄະນະກຳມະການການເລືອກຕັ້ງແຫ່ງຊາດປະກາດຢ່າງເປັນທາງການວ່າ: ທ່ານ ມຸນ ແຈອິນ ຊະນະການເລືອກຕັ້ງ. ຄະນະກຳມະການການເລືອກຕັ້ງ ສ.ເກົາຫລີ ໄດ້ສຳເລັດການນັບຄະແນນໃນເວລາ 06:00 ໂມງ ຕາມເວລາທ້ອງຖິ່ນ ແລະ ປະກາດວ່າ: ທ່ານ ມຸນ ແຈອິນ ຊະນະການເລືອກຕັ້ງປະທານາທິບໍດີ ດ້ວຍຄະແນນ 41% ຂຶ້ນນຳທ່ານ ຮົງ ຈຸນໂຍ ນັກການເມືອງສາຍອະນຸລັກນິຍົມ ແລະ ທ່ານ ອັນ ຊອລຊູ ຜູ້ນຳສາຍກາງ ທີ່ໄດ້ 24% ແລະ 21% ຕາມລຳດັບ. ທ່ານ ມຸນ ແຈອິນ ກຳນົດປະກາດລາຍຊື່ຄະນະລັດຖະບານ ແລະ ນາຍົກລັດຖະມົນຕີໃນວັນທີ 10 ພຶດສະພານີ້, ທ່ານຍັງຕ້ອງຜະເຊີນກັບບັນຫາຫລາຍດ້ານ ທັງຄວາມແຕກແຍກໃນສະພາ, ຜະເຊີນບັນຫາກັບຈີນ, ອາເມລິກາ ແລະ ສປປ ເກົາຫລີ ລວມທັງປະຕິຮູບການດຳເນີນກິດຈະການຂອງຕະກຸນທຸລະກິດຍັກໃຫຍ່ຢູ່ ສ.ເກົາຫລີ.
