ຫົວໜ້າຈັດຕັ້ງສູນກາງພັກລົງຊີ້ນຳວຽກງານຢູ່ເມືອງຫາດຊາຍຟອງ
ໃນວັນທີ 2 ຕຸລານີ້, ທ່ານ ຈັນສີ ໂພສີຄຳ ກຳມະການກົມການເມືອງສູນກາງພັກຫົວໜ້າຄະນະຈັດຕັ້ງສູນກາງພັກ, ໄດ້ລົງເຄື່ອນໄຫວຢ້ຽມຢາມຊີ້ນຳວຽກງານກໍ່ສ້າງພັກ-ພະນັກງານຢູ່ເມືອງຫາດຊາຍຟອງນະຄອນຫລວງວຽງຈັນ, ໂດຍການຕ້ອນຮັບຂອງທ່ານຮອງເຈົ້າຄອງນະຄອນຫລວງວຽງຈັນ, ທ່ານເຈົ້າເມືອງຫາດຊາຍຟອງ.
ໂອກາດພົບປະໂອ້ລົມ, ທ່ານ ຈັນສີ ໂພສີຄຳ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດທີ່ເມືອງຍາດມາໄດ້, ພ້ອມດຽວກັນກໍໄດ້ເນັ້ນໃຫ້ເມືອງເອົາໃຈໃສ່ຕື່ມໃນການຜັນຂະຫຍາຍມະຕິ X ຂອງພັກ ແລະ ເອົາໃຈໃສ່ໃນຂົງເຂດວຽກງານປ້ອງກັນຊາດ-ປ້ອງກັນຄວາມສະຫງົບຕາມຊາຍແດນເປັນບັນຫາສຳຄັນ, ການພັດທະນາເສດຖະກິດ-ສັງຄົມ ຕ້ອງປະຈິບັດໃຫ້ສົມຄູ່ ແລະ ຖືກທິດ, ເອົາໃຈໃສ່ໃນການພັດທະນາຊັບພະຍາກອນມະນຸດ. ພ້ອມນີ້, ຍັງໄດ້ເນັ້ນໃຫ້ເມືອງເອົາໃຈໃສ່ວຽກງານກໍ່ສ້າງພັກ-ພະນັກງານໃຫ້ເປັນເອກະພາບຕໍ່ແນວທາງຂອງພັກ ແລະ ແຜນພັດທະນາເສດຖະກິດ-ສັງຄົມຂອງລັດໄດ້ວາງອອກ, ເດັດດ່ຽວສ້າງພັກໃຫ້ປອດໃສໜັກແໜ້ນເຂັ້ມແຂງຢາກໄດ້ແນວນັ້ນຕ້ອງສ້າງສະມາຊິກໃຫ້ເປັນແບບຢ່າງເອົາໃຈໃສ່ສູ້ຊົນຕ້ານປາກົດການຫຍໍ້ທໍ້ໃນຄະນະພັກ, ສະມາຊິກພັກໃຫ້ຫລຸດໜ້ອຍຖອຍລົງ, ສືບຕໍ່ເປີດບັ້ນດຳເນີນຊີວິດການເມືອງເພື່ອຕຳນິສົ່ງຂ່າວກໍ່ສ້າງຊຶ່ງກັນ ແລະ ກັນ ແລະ ກໍເອົາໃຈໃສ່ເພື່ອກະກຽມໃຫ້ແກ່ກອງປະຊຸມໃຫຍ່ 3 ຂັ້ນຂອງພັກ.
ໂອກາດນີ້, ທ່ານ ຈັນສີ ໂພສີຄຳ ພ້ອມຄະນະ ໄດ້ໄປຕິດຕາມເບິ່ງປະຕູນ້ຳຫ້ວຍໝາກຮຽວ, ການຜະລິດປູກໝາກແຕງຫວານຂອງປະຊາຊົນບ້ານສິມມະໂນ ແລະ ພົບປະໂອ້ລົມກັບອຳນາດການປົກຄອງ ແລະ ປະຊາຊົນບ້ານສິມມະໂນເໜືອ ແລະ ເຂົ້າຢ້ຽມຊົມສະຖານທີ່ທ່ອງທ່ຽວສວນວັດທະນະທຳຊຽງຄວນອີກ
ດ້ວຍ.
