ສານໂລກສັ່ງອາເມລິກາຍົກເລີກ ຂວ້ຳບາດອີຣານບາງຢ່າງ
ສານຍຸຕິທຳສາກົນ ຫລື ສານໂລກ ມີຄຳສັ່ງໃຫ້ອາເມລິກາຍົກເລີກມາດຕະການຂວ້ຳບາດອີຣານທີ່ກະທົບຕໍ່ການນຳເຂົ້າສິນຄ້າດ້ານມະນຸດສະທຳ, ສິນຄ້າ ແລະ ບໍລິການທີ່ກ່ຽວຂ້ອງກັບຄວາມປອດໄພການບິນພົນລະເຮືອນ.
ສານໂລກມີຄຳຕັດສິນເບື້ອງຕົ້ນໃນວັນທີ 3 ຕຸລານີ້ວ່າ: ອາເມລິກາຈະຕ້ອງຍົກເລີກອຸປະສັກໃດໆກໍຕາມທີ່ເກີດຈາກການນຳມາດຕະການຂວ້ຳບາດກັບມາໃຊ້ອີກເທື່ອໜຶ່ງຕໍ່ການສົ່ງອອກຢາ ແລະ ອຸປະກອນການແພດ, ອາຫານ ແລະ ຜົນຜະລິດທາງກະສິກຳ, ຊິ້ນສ່ວນ ແລະ ອຸປະກອນທີ່ຈຳເປັນຕໍ່ຄວາມປອດໄພການບິນພົນລະເຮືອນໄປອີຣານ. ປະທານສານໂລກ ເນັ້ນວ່າ: ລະຫວ່າງທີ່ໃຊ້ມາດຕະການຊົ່ວຄາວນີ້, ສານໂລກຈະເດີນໜ້າພິຈາລະນາເລື່ອງທີ່ອີຣານຮ້ອງຮຽນໃນເດືອນກໍລະກົດ ກໍລະນີປະທານາທິບໍດີ ໂດນັລ ທຣຳ ຈະຮື້ຟື້ນມາດຕະການຂວ້ຳບາດອີຣານອີກເທື່ອໜຶ່ງ ພາຍຫລັງອາເມລິກາຖອນຕົວຈາກຂໍ້ຕົກລົງນິວເຄຼຍປີ 2015 ລະຫວ່າງອີຣານກັບມະຫາອຳນາດ, ຂະນະທີ່ອາເມລິກາຍັງສາມາດຄັດຄ້ານການພິຈາລະນາຄະດີໄດ້.
ທ່ານ ໂມຮຳໝັດ ຈາວັດ ຊາຣີຟ ລັດຖະມົນຕີຕ່າງປະເທດອີຣານ ຍ້ອງຍໍຄຳຕັດສິນຂອງສານໂລກວ່າ: ເປັນຄວາມລົ້ມເຫລວອີກເທື່ອໜຶ່ງຂອງອາເມລິກາທີ່ເສບຕິດການຂວ້ຳບາດ ແລະ ໄຊຊະນະຂອງຫລັກນິຕິທຳ, ປະຊາຄົມໂລກຈະຕ້ອງຮ່ວມກັນຕໍ່ຕ້ານລັດທິການກະທຳຝ່າຍດຽວອັນຊົ່ວຮ້າຍຂອງອາເມລິກາ, ຂະນະທີ່ສະຖານີໂທລະພາບຂອງທາງການອີຣານເນັ້ນເຖິງຄຳຕັດສິນຂອງສານໂລກດ້ວຍການໂພດຂໍ້ຄວາມວ່າ: ໄຊຊະນະຂອງອີຣານເໜືອອາເມລິກາໂດຍສານໂລກ.
