ນາງ ອອງຊານ ຊູຈີ ຖືກຖອນສະຖານະ ພົນລະເມືອງກິດຕິມະສັກຂອງການາດາແລ້ວ
ນາງ ອອງຊານ ຊູຈີ ທີ່ປຶກສາແຫ່ງລັດຂອງມຽນມາ ກາຍເປັນບຸກຄົນທຳອິດທີ່ຖືກຖອນສະຖານະພົນລະເມືອງກິດຕິມະສັກຂອງການາດາ ຈາກກໍລະນີທີ່ນາງເມີນເສີຍຕໍ່ການປະຕິບັດຂອງກອງທັບມຽນມາໃນການກວາດລ້າງຊາວມຸສລິມໂຣຮິງຢາ ໃນລັດຍະໄຂ່.
ນາງ ຊູຈີ ເຈົ້າຂອງລາງວັນໂນແບນສາຂາສັນຕິພາບ ຖືກຖອດຖອນສະຖານະພົນລະເຮືອນກິດຕິມະສັກຂອງການາດາຢ່າງເປັນທາງການໃນວັນທີ 2 ຕຸລາ, ພາຍຫລັງວຸດທິສະພາລົງມະຕິຖອດຖອນສະຖານະດັ່ງກ່າວ ເຊິ່ງເປັນການໃຫ້ກຽດໃນທາງສັນຍາລັກໂດຍບໍ່ໄດ້ມີສິດພິເສດໃດໆ. ກ່ອນໜ້ານີ້ ສະພາຜູ້ແທນລາຊະດອນຂອງການາດາໄດ້ລົງມະຕິໃນອາທິດຜ່ານມາ ໃຫ້ຄວາມເຫັນພ້ອມໃນຍັດຕິທີ່ສະເໜີໃຫ້ຖອນສະຖານະພົນລະເມືອງກິດຕິມະສັກທີ່ມອບໃຫ້ນາງ ຊູຈີ ໃນປີ 2007.
ຊື່ສຽງຂອງນາງ ຊູຈີ ໃນເວທີສາກົນເລີ່ມໝົ່ນໝອງຈາກກໍລະນີທີ່ນາງເມີນເສີຍ ບໍ່ຢັບຢັ້ງກອງທັບມຽນມາໃຊ້ປະຕິບັດການກວາດລ້າງຊາວໂຣຮິງຢາດ້ວຍຄວາມຮຸນແຮງ, ສະມາຊິກສະພາຜູ້ແທນລາຊະດອນການາດາເອີ້ນປະຕິບັດການດັ່ງກ່າວວ່າເປັນການລ້າງເຜົ່າພັນ.
