ສະເຫລີມສະຫລອງວັນສ້າງຕັ້ງສາທາລະນະລັດປະຊາຊົນຈີນຄົບຮອບ 69 ປີ
ໃນວັນທີ 1 ຕຸລານີ້, ທີ່ນະຄອນຫລວງວຽງຈັນ, ສະຖານເອກອັກຄະລັດຖະທູດ ສປ ຈີນ ປະຈຳລາວ, ໄດ້ຈັດງານລ້ຽງເພື່ອສະເຫລີມສະຫລອງການສະຖາປະນາ ສາທາລະນະລັດ ປະຊາຊົນຈີນ ຄົບຮອບ 69 ປີ (1 ຕຸລາ 1949-1 ຕຸລາ 2018), ໂດຍການໃຫ້ກຽດເຂົ້າຂອງໂດຍທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ມີທ່ານ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ, ພ້ອມດ້ວຍລັດຖະມົນຕີ, ຮອງລັດຖະມົນຕີ, ທຸຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນຕ່າງໆປະຈໍາລາວເຂົ້າຮ່ວມ.
ໂອກາດດັ່ງກ່າວ, ທ່ານ ຫວາງ ເວີນທ່ຽນ ເອກອັກຄະລັດຖະທູດ ສປຈີນ ປະຈໍາລາວ ກ່າວວ່າ: 69 ປີຜ່ານມາ ແມ່ນມີຄວາມໝາຍສໍາຄັນພິເສດຕໍ່ຊົນຊາດຈີນ, ເຊິ່ງໄດ້ຜ່ານຜ່າການທົດສອບຢ່າງຫລວງຫລາຍ ແລະ ໂດຍພາຍໃຕ້ການຊີ້ນໍາ-ນໍາພາຂອງພັກກອມມູນິດຈີນ. ໃນສະໄໝມໍ່ໆມານີ້, ຈີນໄດ້ບັນລຸການພັດທະນາແບບກ້າວກະໂດດ, ກາຍເປັນປະເທດຮັ່ງມີ ແລະ ເຂັ້ມແຂງ, ຊຶ່ງສະແດງອອກໃຫ້ເຫັນໃນ 6 ເດືອນຕົ້ນປີ 2018 ລວມຍອດຜະລິດຕະພັນພາຍໃນ (GDP) ຂອງຈີນ ເພີ່ມຂຶ້ນ 6,8% ເມື່ອທຽບໃສ່ໄລຍະດຽວກັນຂອງປີຜ່ານມາ, ໃນນັ້ນປະລິມານລາຍຈ່າຍການບໍລິໂພກໄດ້ປະ ກອບສ່ວນ 78,5% ຕໍ່ການເພີ່ມຂຶ້ນຂອງ GDP ແລະ ໃນໜຶ່ງປີຜ່ານມາໄດ້ມີປະຊາຊົນຈີນ 10 ລ້ານກວ່າຄົນຫລຸດພົ້ນອອກຈາກຄວາມທຸກຍາກ, ການເສີມສ້າງໜຶ່ງແລວໜຶ່ງເສັ້ນທາງໄດ້ຮັບການຊຸກຍູ້ຢ່າງຕໍ່ເນື່ອງ ແລະ ມາຮອດປັດຈຸບັນ, ຈີນໄດ້ເຊັນສັນຍາຮ່ວມມືວ່າດ້ວຍໜຶ່ງແລວໜຶ່ງເສັ້ນທາງກັບ 100 ກວ່າປະເທດ ແລະ ອົງການຈັດຕັ້ງສາກົນ.
ສຳລັບສາຍພົວພັນຈີນ-ລາວ ການນໍາສູງສຸດຂອງສອງປະເທດ ຍາມໃດກໍໄດ້ເອົາໃຈໃສ່ ແລະ ໄດ້ຍົກລະດັບເປັນຍຸດທະສາດ ແລະ ໄດ້ບັນລຸຄວາມເຫັນເອກະພາບອັນສໍາຄັນໃນການພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງປະເທດ ແລະ ປັດຈຸບັນ ສາຍພົວພັນຈີນ-ລາວ ໄດ້ກ້າວເຂົ້າສູ່ໄລຍະດີທີ່ສຸດໃນປະຫວັດສາດ.
ປັດຈຸບັນ, ປະເທດຈີນໄດ້ກາຍເປັນປະເທດລົງທຶນຫລາຍທີ່ສຸດ ແລະ ຄູ່ການຄ້າອັນດັບທີສອງຂອງລາວ ຄື: ໃນ 6 ເດືອນຕົ້ນປີ 2018, ປະລິມານການຄ້າລະຫວ່າງຈີນ-ລາວໄດ້ບັນລຸ 1,7 ຕື້ໂດລາສະຫະລັດ, ປະລິມານການລົງທຶນໂດຍກົງຂອງຈີນເຂົ້າລາວບັນລຸໄດ້ 790 ລ້ານໂດລາສະຫະລັດ, ການກໍ່ສ້າງທາງລົດໄຟຈີນ-ລາວ ໄດ້ສໍາເລັດ 20% ຂອງມູນຄ່າການລົງທຶນ, ໂຄງການລົງທຶນກໍ່ສ້າງເຂື່ອນໄຟຟ້າຫລາຍແຫ່ງໃນລາວໄດ້ສໍາເລັດ ແລະ ເລີ່ມຜະລິດພະລັງໄຟຟ້າຕາມລໍາດັບ, ການລົງທຶນກໍ່ສ້າງສາຍສົ່ງໄຟຟ້າໄດ້ເລີ່ມນໍາໃຊ້ແລ້ວ, ແລວເສດຖະກິດຈີນ-ລາວ ໄດ້ດໍາເນີນການກໍ່ສ້າງຢ່າງຕໍ່ເນື່ອງ ແລະ ການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ໄດ້ປະກອບສ່ວນກໍາລັງແຮງໃໝ່ ເຂົ້າໃນການຮ່ວມມືສອງປະເທດ.
ໃນປີ 2017 ໄດ້ມີນັກທ່ອງທ່ຽວຈີນ ທີ່ມາທ່ຽວຢູ່ລາວ ມີເກືອບ 7,6 ແສນເທື່ອຄົນ ແລະ ໃນໄຕມາດທີ 1 ປີນີ້, ນັກທ່ອງທ່ຽວຈີນ ໄດ້ເຂົ້າມາລາວຫລາຍກ່ວາ 2,2 ແສນເທື່ອຄົນ, ທຽບໃສ່ໄລຍະດຽວກັນເພີ່ມຂຶ້ນ 32%.
ນອກຈາກນັ້ນ, ປະຊາຊົນສອງປະເທດ ຈີນ-ລາວ ກໍໄດ້ສືບຕໍ່ຊ່ວຍເຫລືອເຊິ່ງກັນ ແລະ ກັນ, ເຊິ່ງໃນເດືອນກໍລະກົດຜ່ານມາ, ແຂວງອັດຕະປື ຂອງລາວ ໄດ້ເກີດໄພນໍ້າຖ້ວມຢ່າງຮ້າຍແຮງ, ຝ່າຍຈີນ ກໍໄດ້ສົ່ງທີມງານກູ້ໄພໄປເຂດປະສົບໄພໄວທີ່ສຸດເທົ່າທີ່ໄວໄດ້ ແລະ ໄດ້ສະໜອງເຄື່ອງອຸປະກອນຕ່າງໆ ພ້ອມທຶນຮອນກູ້ໄພຕາມຄວາມຮຽກຮ້ອງຕ້ອງການຂອງລັດຖະບານລາວ, ພ້ອມກັນນັ້ນ ວິສາຫະກິດຊາວຈີນຕ່າງດ້າວ ແລະ ຄົນຈີນທີ່ຢູ່ລາວກໍໄດ້ຊ່ວຍບໍລິຈາກເງິນ ແລະ ເຄື່ອງຂອງຢ່າງຫລວງຫລາຍ.
