ລັດຖະບານສັ່ງໃຫ້ເພີ່ມທະວີຄວາມເຂັ້ມງວດປ້ອງກັນນໍາເຂົ້າຜະລິດຕະພັນ ແລະ ໝູ ຈາກ ສປ ຈີນ
ຫ້ອງວ່າການສໍານັກງານນາຍົກລັດຖະມົນຕີ ໄດ້ອອກແຈ້ງການຕາມການຊີ້ນໍາຂອງນາຍົກລັດຖະມົນຕີ ໃຫ້ກະຊວງກະສິກໍາ ແລະ ປ່າໄມ້, ກະຊວງອຸດສາຫະກໍາ ແລະ ການຄ້າ, ກະຊວງສາທາລະນະສຸກ, ນະຄອນຫລວງວຽງຈັນ ແລະ ບັນດາເຈົ້າແຂວງໃນທົ່ວປະເທດ ຕ້ອງມີມາດຕະການເຝົ້າລະວັງ, ປ້ອງກັນ ແລະ ແກ້ໄຂແຕ່ຫົວທີ ເພື່ອບໍ່ໃຫ້ພະຍາດອະຫິວາໝູ ອາຟຣິກາ ແຜ່ລາມເຂົ້າມາໃນ ສ ປປ ລາວ, ພາຍຫລັງເຫັນວ່າພະຍາດດັ່ງກ່າວມີການແຜ່ລະບາດຢູ່ປະເທດຈີນ ແລະ ເມື່ອຕົ້ນເດືອນກັນຍາຜ່ານມານີ້, ທ່ານລັດຖະມົນຕີກະຊວງກະສິກໍາ ແລະ ປ່າໄມ້ ກໍໄດ້ອອກແຈ້ງການໂຈະຊົ່ວຄາວການນຳເຂົ້າໝູຊີ້ນ, ໝູພໍ່ແມ່ພັນ, ໝູນ້ອຍ ແລະ ຜະລິດຕະພັນຊີ້ນໝູທຸກຊະນິດຈາກ ສປ ຈີນ ເຂົ້າມາ ສປປ ລາວ, ພ້ອມທັງໃຫ້ບັນດາແຂວງທີ່ມີຊາຍແດນຕິດຈອດກັບ ສປ ຈີນ ໂຈະນຳເຂົ້າໝູ ແລະ ຜະລິດຕະພັນໝູທຸກຊະນິດ, ໃຫ້ເພີ່ມທະວີມາດຕະການຕິດຕາມກວດກາ ແລະ ບໍ່ອະນຸຍາດໃຫ້ນຳເຂົ້າຜະລິດຕະພັນຊີ້ນໝູທຸກຊະນິດ ເພື່ອມາຈຳໜ່າຍ ຫລື ບໍລິໂພກ ລວມທັງການນຳເຂົ້າຕິດຕົວຜູ້ໂດຍສານ ຫລື ຜູ້ເດີນທາງເຂົ້າມາ ສປປ ລາວ ເພື່ອບໍລິໂພກຢ່າງເດັດຂາດ, ໃນກໍລະນີເຈົ້າໜ້າທີ່ກ່ຽວຂ້ອງກວດພົບເຫັນຜູ້ລະເມີດ ຫລື ລັກລອບນຳເຂົ້າໝູ ຫລື ຜະລິດຕະພັນຊີ້ນໝູທີ່ບໍ່ຖືກຕ້ອງແມ່ນໃຫ້ປະຕິບັດມາດຕະການຕາມລະບຽບກົດໝາຍຢ່າງເຂັ້ມງວດ, ພ້ອມທັງນຳເອົາວັດຖຸທີ່ກວດກາຢຶດໄດ້ໄປທຳລາຍຖິ້ມທັນທີ.
