ກຳປູເຈຍຢຶດເຄື່ອງສຳອາງປອມໄດ້ 68 ໂຕນ
ປະທານຄະນະກຳມະການປາບປາມສິນຄ້າເຖື່ອນກຳປູເຈຍຖະແຫລງວ່າ: ເຄື່ອງສຳອາງປອມທີ່ຢຶດມາໄດ້ປະກອບມີຜະລິດຕະພັນຍ້ອມຜົມ, ຄີມທາຜິວຂາວ ແລະ ຢາສະຜົມ ທີ່ມີມູນຄ່າຫລາຍລ້ານໂດລາສະຫະລັດ. ເຈົ້າໜ້າທີ່ກ່າວວ່າ: ສິນຄ້າເຫລົ່ານີ້ຜະລິດຢູ່ກຳປູເຈຍ, ແຕ່ຕິດກາວ່າຜະລິດຢູ່ຍີ່ປຸ່ນ, ສ.ເກົາຫລີ, ຈີນ, ອາເມລິກາ, ເຢຍລະມັນ ແລະ ໄທ. ບາງຜະລິດຕະພັນໃຊ້ເຄື່ອງໝາຍການຄ້າປອມຂອງບໍລິສັດຊິເຊໂດ້ ຍີ່ຫໍ້ດັງຈາກຍີ່ປຸ່ນ. ເຈົ້າໜ້າທີ່ກຳປູເຈຍຖະແຫລງຕໍ່ນັກຂ່າວວ່າ: ນີ້ເປັນການຢຶດສິນຄ້າປອມໄດ້ຫລາຍເປັນປະຫວັດສາດຂອງກຳປູເຈຍ ໂດຍຈັບກຸມຜູ້ຖືກສົງໄສ 3 ຄົນ ເປັນຊາວຈີນ 2 ຄົນ ໃນການບຸກຄົ້ນສາງຢູ່ນະຄອນຫລວງພະນົມເປັນ ແລະ ແຂວງກັນດາວ ໃນເດືອນມີນາ ແລະ ເມສາ ພາຍຫລັງຕິດຕາມມາຫລາຍເດືອນ ແລະ ເຈົ້າໜ້າທີ່ຈະກວດສອບວ່າສິນຄ້າປອມເຫລົ່ານີ້ເປັນອັນຕະລາຍຕໍ່ສຸຂະພາບ ຫລື ບໍ່, ພາຍຫລັງມີຂ່າວລົງໜັງສືພິມ ແລະ ເຟສບຸກວ່າ: ຜູ້ຍິງບາງຄົນໃຊ້ຄີມທາຜິວຂາວແຕ່ໄດ້ຮັບຜົນຂ້າງຄຽງ ທັງເປັນຜືນແດງຮຸນແຮງ ແລະ ບາງຄົນເຖິງຂັ້ນເສຍຊີວິດ. ຄີມທາໃຫ້ຜິວຂາວເປັນທີ່ນິຍົມຢູ່ກຳປູເຈຍ ເພາະຫລາຍຄົນເຊື່ອວ່າຈະເຮັດໃຫ້ມີຜິວຂາວ ແລະ ເບິ່ງມີລະດັບຕາມແບບຄ່ານິຍົມຄວາມງາມ.
