ອາກາດຮ້ອນແຮງ, ເວົ້າຕື່ມເລື່ອງຄວາມປອດໄພຂອງອາຫານ
ເພື່ອນຜູ້ອ່ານທີ່ຮັກແພງ, ປັດຈຸບັນສະພາບອາກາດຢູ່ປະເທດເຮົາເປັນຊ່ວງໄລຍະຮ້ອນອົບເອົ້າຫລາຍ ອັນເປັນສາເຫດຕົ້ນຕໍເຮັດໃຫ້ອາຫານບູດເໜົ່າໄດ້ງ່າຍ ຖ້າເຮົາເກັບຮັກສາບໍ່ດີ ແລະ ອາດສົ່ງຜົນກະທົບຕໍ່ຜູ້ບໍລິໂພກຢ່າງໜ້າເປັນຫ່ວງ ຖ້າພວກເຮົາຂາດສະຕິໃນການເລືອກຊື້ເລືອກຫາ ແລະ ເລືອກຮັບປະທານອາຫານເຫລົ່ານັ້ນ ເພາະເບິ່ງຄືວ່າຂະແໜງກ່ຽວຂ້ອງ ໂດຍສະເພາະແມ່ນກົມອາຫານ ແລະ ຢາຈະບໍ່ຄ່ອຍສົນໃຈຕໍ່ການຄຸ້ມຄອງກວດກາເຖິງຄວາມປອດໄພຂອງອາຫານພໍເທົ່າໃດ, ເມື່ອພວກເຮົາລົງໄປຕະຫລາດ ພວກທ່ານກໍຈະສັງເກດເຫັນຜູ້ຂາຍອາຫານສຸກ ຫລື ຮ້ານອາຫານແຄມທາງຕ່າງໆເຫລົ່ານັ້ນຈະບໍ່ສົນໃຈໃນການປົກປິດ ຫລື ການເກັບມ້ຽນອາຫານໄວ້ບ່ອນປອດໄພ, ພວກເຂົາປະປ່ອຍໄປເອົາແຕ່ແມງວັນຈະຕອມ, ຂີ້ຝຸ່ນຈະຈັບ ແລະ ອື່ນໆກໍຊ່າງມັນ ເພາະເຂົາເຈົ້າເຮັດໃນຄວາມຊິ້ນເຄີຍ ແລະ ຜ່ານມາກໍບໍ່ມີໃຜມາຕັກເຕືອນ ຫລື ມີລະບຽບການໃດໆ ເພື່ອບັງຄັບໃຫ້ເຂົາເຈົ້າຕ້ອງເຮັດໃນສິ່ງໃດໜຶ່ງ ເພື່ອຄວາມປອດໄພຂອງຜູ້ບໍລິໂພກ ແລະ ເມື່ອລົງໄປບ່ອນຂາຍອາຫານສົດປະເພດຊີ້ນ, ປາ ຫລື ເປັດ-ໄກ່ອື່ນໆ ກໍຍິ່ງຮ້າຍແຮງ ເຊິ່ງຜູ້ປະກອບການເຫລົ່ານັ້ນກໍບໍ່ໄດ້ສົນໃຈນຳຄວາມປອດໄພພໍເທົ່າໃດ ແລະ ອາຫານບາງປະເທດ ເຊັ່ນເຄື່ອງໃນສັດ, ອາຫານທະເລ ແລະ ເຄື່ອງປຸງສຳເລັດຮູບບາງຢ່າງກໍຍັງປົນເປື້ອນໄປດ້ວຍສານກັນບູດ, ກັນເໜົ່າຕ່າງໆ ດັ່ງຟ໋ອກໂມນ, ຂີ້ເຈຍ, ຫີນສົ້ມເຫລົ່ານີ້ລ້ວນແຕ່ເປັນໄພອັນຕະລາຍຕໍ່ສຸຂະພາບຂອງຜູ້ບໍລິໂພກ ທັງໃນໄລຍະສະເພາະໜ້າ ແລະ ຍາວນານ, ແຕ່ແລ້ວພາກສ່ວນກ່ຽວຂ້ອງກໍບໍ່ໄດ້ສົນໃຈນຳການຄວບຄຸມອາຫານເປັນພິດເຫລົ່ານີ້ ແລະ ຕໍ່ສະພາບດັ່ງກ່າວ ຈະເຮັດແນວໃດດີເພື່ອຫລີກເວັ້ນມັນ. ຖ້າເມື່ອໃດຂະແໜງມະຫາພາກບໍ່ໃຫ້ຄວາມສົນໃຈແລ້ວ ກໍມີແຕ່ກະໂຕເຮົາເອງຕ້ອງມີສະຕິລະວັງຕົວສະເໝີໃນການເລືອກບໍລິໂພກອາຫານທີ່ປອດໄພ. ໝາຍຄວາມວ່າ: ບໍ່ຄວນບໍລິໂພກອາຫານທີ່ບໍ່ຮູ້ຕົ້ນກຳເນີດ ແລະ ແຫລ່ງທີ່ມາຂອງມັນ, ບໍ່ຄວນກິນອາຫານດິບ ດັ່ງເລືອດແປງ, ຫລາບດິບ, ກ້ອຍປາດິບ ແລະ ອື່ນໆ ທີ່ຂາດຫລັກອະນາໄມ ແລະ ກໍຕ້ອງໃສ່ໃຈປຸງແຕ່ງ ແລະ ເກັບມ້ຽນອາຫານໄວ້ບ່ອນປອດໄພ ດັ່ງຕູ້ເຢັນ, ແຊ່ແຂງ ຖ້າບໍ່ມີກໍຕ້ອງອຸ່ນ ແລະ ຕົ້ມອາຫານຄືນທຸກຄັ້ງກ່ອນບໍລິໂພກແມ່ນຈະເປັນການດີກວ່າ. ແຕ່ເຖິງຢ່າງໃດ ໃນອະນາຄົດອັນໃກ້ໆນີ້ ພາກສ່ວນກ່ຽວຂ້ອງກໍຄົງຈະໃຫ້ຄວາມສຳຄັນຫລາຍຂຶ້ນໃນຄວາມປອດໄພທາງດ້ານໂພຊະນາການ.
