IMF ເຕືອນທ່າອ່ຽງເສດຖະກິດໂລກຊຸດໂຊມ
ທັງນີ້, ຄຳເຕືອນຂອງຜູ້ອຳນວຍການ IMF ຄັ້ງນີ້ ຖືເປັນການກຳນົດຫົວຂໍ້ ຫລື ວາລະກອງປະຊຸມປະຈຳປີຂອງ IMF ໃນນະຄອນຫລວງຈາກາຕາ ປະເທດອິນໂດເນເຊຍ ໃນເດືອນນີ້.
ທ່ານ ນາງ ຄຣິສຕິນ ລາກາດ ຜູ້ອຳນວຍການກອງທຶນການເງິນສາກົນ (IMF) ເນັ້ນກ່ຽວກັບສະພາບເສດຖະກິດໂລກ ໂດຍລະບຸວ່າ: ການເຕີບໃຫຍ່ຂອງເສດຖະກິດໂລກອາດຢຸດສະງັກ. ພ້ອມເຕືອນວ່າ: ຖ້າວິກິດຄ່າເງິນໃນຕະຫລາດເກີດໃໝ່ຍືດເຍື້ອ ແລະ ລຸກລາມ ອາດເຮັດໃຫ້ກະແສເງິນທຶນໄຫລອອກຈາກຕະຫລາດເກີດໃໝ່ສູງເຖິງ 1 ແສນລ້ານໂດລາສະຫະລັດ, ພາຍຫລັງສອງສາມປີຜ່ານມາ ກະແສເງິນທຶນໄຫລອອກຈາກປະເທດເສດຖະກິດເກີດໃໝ່ແລ້ວປີລະ 240.000 ລ້ານໂດລາ.
ທ່ານ ນາງ ລາກາດ ກ່າວວ່າ: ປະເທດສ່ວນຫລາຍຈະກະຕຸ້ນການເຕີບໃຫຍ່ທາງເສດຖະກິດໄດ້ລຳບາກຂຶ້ນ ເພາະສະຖານະການເສດຖະກິດໂລກເລີ່ມປ່ຽນແປງ ເຊິ່ງລາຍງານຄາດຄະເນເສດຖະກິດໂລກຂອງ IMF ທີ່ຈະໄດ້ຮັບການເຜີຍແຜ່ໃນອາທິດໜ້າ ສະທ້ອນສະພາບເສດຖະກິດທີ່ມີຄວາມສົດໃສໜ້ອຍລົງ ແລະ ປັດໄຈສ່ຽງຕ່າງໆເລີ່ມປາກົດໃນໄລຍະຕົ້ນປີເລີ່ມສົ່ງຜົນກະທົບຕໍ່ສະພາບການເຕີບໃຫຍ່ຂອງເສດຖະກິດຢ່າງແທ້ຈິງ.
