ເປີດສູນໂຄສະນາໂທລະພາບແຫ່ງຊາດ
October 1, 2018 - 10:07 PM
ພິທີເປີດສູນໂຄສະນາໂທລະພາບແຫ່ງຊາດລາວ ໄດ້ມີຂຶ້ນໃນວັນທີ 1 ຕຸລານີ້ ຢູ່ທີ່ບ້ານໂພນໄຊ, ເມືອງໄຊເສດຖານະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານຮອງລັດຖະມົນຕີກະຊວງຖະແຫລງຂ່າວ,ວັດທະນະທໍາ ແລະ ທ່ອງທ່ຽວ, ມີຜູ້ຕາງໜ້າຈາກຄະນະໂຄສະນາອົບຮົມສູນກາງພັກ, ສະຖານທູດຈີນປະຈໍາລາວເຂົ້າຮ່ວມນໍາດ້ວຍ.
ທ່ານອໍານວຍການສະຖານີໂທລະພາບແຫ່ງຊາດ ບຸນເຈົ້າ ພິຈິດ ກ່າວວ່າ: ສູນແຫ່ງນີ້, ເປັນການຮ່ວມມືລະຫວ່າງໂທລະພາບແຫ່ງຊາດ ແລະ ບໍລິສັດ ເອບີ ບໍລິການດ້ານສື່, ເພື່ອປັບປຸງ ແລະ ພັດທະນາດ້ານການຕະຫລາດຂອງໂທລະພາບແຫ່ງຊາດໃຫ້ເຂັ້ມແຂງກວ່າເກົ່າ, ພ້ອມທັງສ້າງລາຍການຕ່າງໆທາງ ໂທລະພາບແຫ່ງຊາດໃຫ້ມີເນື້ອຫາສາລະ ແລະ ມີຫລາຍສີສັນເພື່ອດຶງດູດຜູ້ຊົມໃຫ້ຫລາຍຂຶ້ນ.
