ລາວຫາລືມາດຕະການຄວບຄຸມຢາເສບຕິດ
ກອງປະຊຸມລະດັບສູງຂອງໜ່ວຍງານຄວບຄຸມຢາເສບຕິດປະຈຳປີ 2018 ໄດ້ຈັດຂຶ້ນໃນທ້າຍອາທິດຜ່ານມານີ້, ໂດຍການຮ່ວມມືລະຫວ່າງກະຊວງປ້ອງກັນຄວາມສະຫງົບ, ສະຖານທູດຍີ່ປຸ່ນປະຈຳລາວ ແລະ ອົງການສະຫະປະຊາຊາດເພື່ອຄວບຄຸມຢາເສບຕິດ ແລະ ຕ້ານອາຊະຍາກຳ, ເພື່ອຕີລາຄາຄືນການກວດກາ ແລະ ຄວບຄຸມຢາເສບຕິດຕາມແຜນແມ່ບົດແຫ່ງຊາດ 2016-2020 ເຊິ່ງປະກອບມີໜ້າວຽກໂຄສະນາ-ສຶກສາອົບຮົມ, ການບຳບັດ-ປິ່ນປົວຜູ້ຕິດຢາເສບຕິດ, ການສະກັດກັ້ນ ແລະ ເຝົ້າລະວັງການລັກລອບປູກຝິ່ນຄືນໃໝ່ຂອງປະຊາຊົນໃນບາງທ້ອງຖິ່ນ, ການປະຕິບັດໂຄງການພັດທະນາຊົນນະບົດແທນການປູກຝິ່ນ, ສະກັດກັ້ນສະພາບການລັກລອບຊື້-ຂາຍ-ລຳລຽງ ຂົນສົ່ງຢາເສບຕິດ, ການປະຕິບັດມາດຕະການດ້ານກົດໝາຍ ແລະ ວຽກງານອື່ນໆ, ພ້ອມທັງປຶກສາຫາລື ກ່ຽວກັບມາດຕະການ ແລະ ວິທີການທີ່ເໝາະສົມໃນການແກ້ໄຂບັນຫາຢາເສບຕິດ ເພື່ອແນໃສ່ເຮັດໃຫ້ການຈັດຕັ້ງປະຕິບັດວຽກງານດັ່ງກ່າວໄດ້ຮັບຜົນດີ ແລະ ມີປະສິດທິຜົນກວ່າເກົ່າ.
