ສົງຄາມການຄ້າ ຈີນ-ອາເມລິກາ ເຮັດໃຫ້ ການຜະລິດໃນອາຊີເດືອນກັນຍາອ່ອນຕົວ
ຂະແໜງການຜະລິດໃນອາຊີອ່ອນຕົວລົງໃນເດືອນກັນຍາ ເພາະຫລາຍເສດຖະກິດທີ່ອາໄສການສົ່ງອອກເປັນຫລັກໄດ້ຮັບຄຳສັ່ງຊື້ຫລຸດລົງ ເປັນສັນຍານວ່າ: ຄວາມເຄັ່ງຕຶງທາງການຄ້າ ຈີນ-ອາເມລິກາ ກຳລັງສົ່ງຜົນຕໍ່ຄວາມເຊື່ອໝັ້ນໃນຂະແໜງທຸລະກິດ.
ຣອຍເຕີລາຍງານຜົນການສຳຫລວດທຸລະກິດ ໃນວັນທີ 1 ຕຸລານີ້ວ່າ: ເດືອນກັນຍາຜ່ານມາ, ຂະແໜງການຜະລິດໃນຫວຽດນາມ ແລະ ອິນໂດເນເຊຍອ່ອນຕົວລົງ, ສ່ວນໄຕ້ຫວັນຂະຫຍາຍຕົວໜ້ອຍທີ່ສຸດໃນຮອບກວ່າສອງປີ. ເຊັ່ນດຽວກັບຍີ່ປຸ່ນ ແລະ ສ.ເກົາຫລີ ທີ່ມີຄຳສັ່ງຊື້ຫລຸດລົງ. ຂະນະທີ່ຜົນສຳຫລວດຂອງເອກະຊົນພົບວ່າ: ການຂະຫຍາຍຕົວຂອງໂຮງງານໃນຈີນຊ້າລົງ ທັງທີ່ຂະຫຍາຍຕົວຕໍ່ເນື່ອງ 15 ເດືອນ, ສອດຄ່ອງກັບຜົນສຳຫລວດຂອງທາງການຊີ້ວ່າ: ຂະແໜງການຜະລິດເລີ່ມອ່ອນຕົວ ເພາະໄດ້ຮັບຄຳສັ່ງຊື້ຫລຸດລົງ.
ຣອຍເຕີເບິ່ງວ່າ: ເສດຖະກິດຈີນໃຫຍ່ເປັນອັນດັບສອງຂອງໂລກຈະອ່ອນຕົວລົງຢ່າງຕໍ່ເນື່ອງ ເປັນຜົນຈາກຄວາມຕ້ອງການໃນປະເທດຫລຸດລົງ ແລະ ຖືກອາເມລິກາຮຽກເກັບພາສີຈຳນວນຫລາຍ ເຊິ່ງອາດເຮັດໃຫ້ລັດຖະບານຈີນອອກມາດຕະການກະຕຸ້ນການເຕີບໃຫຍ່ທາງເສດຖະກິດໃນມໍ່ໆນີ້, ແຕ່ບໍລິສັດວິເຄາະແຄປິຕັລອີໂຄໂນມິກຂອງອັງກິດເບິ່ງວ່າ: ເສດຖະກິດໂລກທີ່ຂະຫຍາຍຕົວຊ້າເປັນປັດໄຈກະທົບຄວາມຕ້ອງການສິນຄ້າຈີນ ບໍ່ກ່ຽວກັບເລື່ອງພາສີອາເມລິກາ. ຂະນະທີ່ສະຖາບັນວິໄຈມິຊູໂຮຂອງຍີ່ປຸ່ນເຕືອນວ່າ: ເນື່ອງຈາກບໍລິສັດລະດັບໂລກມີຕ່ອງໂສ້ອຸປະທານກະຈາຍຢູ່ທົ່ວອາຊີເສດຖະກິດສ່ວນຫລາຍໃນພາກພື້ນນີ້ຈຶ່ງສ່ຽງສູງເມື່ອການຄ້າໂລກສະດຸດ ແລະ ເສດຖະກິດຈີນຂະຫຍາຍຕົວຊ້າ ແລະ ຈະໄດ້ຮັບຜົນກະທົບເບື້ອງຕົ້ນຈາກຄວາມຂັດແຍ່ງທາງການຄ້າ ຈີນ-ອາເມລິກາ ຈົນກວ່າບໍລິສັດໃຫຍ່ຈະຍ້າຍຖານການຜະລິດອອກຈາກຈີນສຳເລັດ.
