ເຊີນທ່ຽວງານເທດສະການແຫ່ງສັບປະດາເກົາຫຼີ ໃນຕົ້ນເດືອນຕຸລານີ້ ທີ່ນະຄອນຫຼວງວຽງຈັນ

ໃນວັນທີ 27 ກັນຍາຜ່ານາ, ສະຖານທູດ ສ ເກົາຫຼີ ຮ່ວມກັບກະຊວງກະສິກຳ, ລ້ຽງສັດ ແລະ ອາຫານ, ສະຖາບັນສົ່ງເສີມຜະລິດຕະພັນອາຫານເກົາຫຼີ, ອົງການ KOICA ແລະ ອົງການ KOTRA ປະຈຳລາວ ໄດ້ຈັດງານຖະແຫຼງຂ່າວໃຫ້ຮູ້ວ່າ: ໃນວັັນທີ 5-7 ຕຸລານີ້ ພວກຕົນຈະຈັດງານເທດສະການແຫ່ງສັບປະດາເກົາຫຼີ ຂຶ້ນ ທີ່ສູນການຄ້າວຽງຈັນເຊັນເຕີ ນະຄອນຫຼວງວຽງຈັນ, ເພື່ອສະແດງເຖິງວັດທະນະທຳ, ອາຫານການກິນ ແລະ ສິນຄ້າຂອງ ສ ເກົາຫຼີ, ພ້ອມທັງເປັນການສົ່ງເສີມສາຍພົວພັນຮ່ວມມື ແລະ ສ້າງຄວາມເຂົ້າໃຈ ແລະ ສະໜິດສະໜົມກັນຫຼາຍຂຶ້ນລະຫວ່າງປະຊາຊົນລາວ ແລະ ສ ເກົາຫຼີໃຫ້ເລິກເຊິ່ງກວ່າເກົ່າ.

ໃນງານດັ່ງກ່າວ, ຈະມີຫຼາກຫຼາຍກິດຈະກໍາ ເປັນຕົ້ນແມ່ນ ການວາງສະແດງອາຫານເກົາຫຼີໃຫ້ຊີມ, ແຂ່ງຂັນປຸງແຕ່ງອາຫານເກົາຫຼີ, ສາຍຮູບເງົາ, ວາງສະແດງຮູບພາບກ່ຽວກັບການຮ່ວມມືເພື່ອພັດທະນາ ລະຫວ່າງ ສປປ ລາວ ແລະ ສ ເກົາຫຼີ ຂອງອົງການກອຍກາ (KOICA) ແລະ ກິດຈະກໍາອື່ນໆອີກ. ນອກນີ້, ຍັງຈະມີການວາງສະແດງສິນຄ້າຈາກ 8 ບໍລິສັດເກົາຫຼີ, 5 ບໍລິສັດຮ່ວມມືລະຫວ່າງ ລາວ-ເກົາຫຼີ ແລະ 4 ບໍລິສັດໃນລາວ.