ຄາດຕະກອນຂ້າແຟນສາວຢູ່ບ້ານອີໄລຖືກຈັບແລ້ວ
ໃນເດືອນກຸມພາປີ 2017 ຜ່ານມາ, ມີຍິງສາວຄົນໜຶ່ງຖືກຄາດຕະກໍາຢູ່ແຄມປ່າເຂດບ້ານອີ່ໄລເໜືອ, ເມືອງນາຊາຍທອງນະຄອນຫລວງວຽງຈັນ, ໂດຍຜູ້ເສຍຊີວິດຊື່ນາງ ຍົວ ອາຍຸ 22 ປີຢູ່ບ້ານໂນນຕ້ອງ, ເມືອງໝື່ນແຂວງວຽງຈັນ ແລະ ນັບແຕ່ມື້ເກີດເຫດເຈົ້າໜ້າທີ່ສືບສວນ-ສອບສວນ ນະຄອນຫລວງວຽງຈັນ, ໄດ້ພະຍາຍາມສືບຫາຄາດຕະກອນ ແລະ ຈົນມາຮອດທ້າຍເດືອນສິງຫາ 2018 ເຈົ້າໜ້າທີ່ສາມາດຈັບຕົວຄາດຕະກອນໄດ້ຊື່ທ້າວ ວົງໄຊ ອາຍຸ 25 ປີຢູ່ບ້ານດອນທາດ, ເມືອງຕົ້ນເຜິ້ງແຂວງບໍ່ແກ້ວ, ເຊິ່ງເປັນແຟນຂອງຜູ້ເສຍຊີວິດ, ພາຍຫລັງກໍ່ເຫດໄດ້ໄປລີ້ຊ້ອນຕົວຢູ່ແຂວງໄຊຍະບູລີ.
ຜ່ານການສືບສວນ-ສອບສວນ ຂອງເຈົ້າໜ້າທີ່ທ້າວ ວົງໄຊ ໄດ້ຮັບສາລະພາບວ່າ: ຕົນໄດ້ລົງມືຄາດຕະກໍານາງ ຍົວ ແທ້ ຍ້ອນຄວາມຫຶງຫວງ, ໂດຍໃຊ້ໄມ້ຕີຫລາຍບາດຈົນເສຍຊີວິດ ຈາກນັ້ນໄດ້ເອົາຕົວຫລົບໜີໄປອາໄສຢູ່ກັບພີ່ນ້ອງທີ່ບ້ານເຄິງຫລັກຄຳ, ເມືອງຄອບແຂວງໄຊຍະບູລີ. ຈົນມາຮອດວັນທີ 23 ສິງຫາ 2018 ຈຶ່ງຖືກເຈົ້າໜ້າທີ່ ປກສ ເມືອງຄອບຈັບຕົວສົ່ງໃຫ້ ປກສ ນະຄອນຫລວງວຽງຈັນດຳເນີນຄະດີຕາມກົດໝາຍ.
