WTO ຫລຸດຄາດຄະເນປະລິມານການຄ້າໂລກ
ປັບຫລຸດຄາດຄະເນປະລິມານການຄ້າໂລກໃນປີ 2018 ແລະ ປີ 2019 ໂດຍໃຫ້ເຫດຜົນວ່າ: ມີປັດໄຈສ່ຽງເພີ່ມຂຶ້ນ.
ອົງການການຄ້າໂລກ (WTO) ປັບຫລຸດຄາດຄະເນການຂະຫຍາຍຕົວຂອງການຄ້າໂລກໃນປີ 2018 ແລະ 2019 ເນື່ອງຈາກສະຖານະການການຄ້າທີ່ເຄັ່ງຕຶງຂຶ້ນ ລວມທັງສະພາບຕະຫລາດສິນເຊື່ອທີ່ເຄັ່ງຕຶງຍິ່ງຂຶ້ນໃນຕະຫລາດທີ່ມີຄວາມສຳຄັນ ໂດຍປັບຫລຸດຄາດຄະເນການຂະຫຍາຍຕົວຂອງການຄ້າໂລກປີ 2018 ລົງເຫລືອ 3,9% ຕໍ່າກວ່າຄາດຄະເນທີ່ໄດ້ເຮັດໄວ້ໃນເດືອນເມສາ ໃນລະດັບ 4,4%.
ຂະນະດຽວກັນ, WTO ໄດ້ຫລຸດທ່າອ່ຽງຂອງປີ 2019 ລົງເຫລືອ 3,7% ຈາກລະດັບຄາດຄະເນກ່ອນໜ້ານີ້ 4%, ພ້ອມທັງຕີລາຄາວ່າ: ການຄ້າຈະຍັງຂະຫຍາຍຕົວຕໍ່ໄປ, ແຕ່ໃນລະດັບທີ່ຊ້າກວ່າການຄາດຄະເນໄວ້ກ່ອນໜ້ານີ້.
ເນື່ອງຈາກຄວາມເຄັ່ງຕຶງດ້ານການຄ້າທີ່ສູງຂຶ້ນ ຖືເປັນຄວາມສ່ຽງຫລາຍທີ່ສຸດສຳລັບການຄາດຄະເນ, ແຕ່ການເຂັ້ມງວດນະໂຍບາຍການເງິນ ແລະ ຄວາມປັ່ນປ່ວນດ້ານການເງິນທີ່ກ່ຽວຂ້ອງອາດຈະທຳລາຍການຄ້າ ແລະ ຜົນຜະລິດເຊັ່ນກັນ.
ການຫລຸດຕົວເລກຄາດຄະເນການຂະຫຍາຍຕົວຂອງການຄ້າໂລກຂອງ WTO ມີຂຶ້ນພາຍຫລັງທະນາຄານເພື່ອການພັດທະນາອາຊີ (ADB) ໄດ້ເຜີຍແຜ່ລາຍງານຫລ້າສຸດກ່ຽວກັບທ່າອ່ຽງເສດຖະກິດອາຊີ ໂດຍລະບຸວ່າ: ອັດຕາເຕີບໃຫຍ່ຂອງພາກພື້ນນີ້ຈະຍັງສູງເຖິງ 6% ໃນປີນີ້, ແຕ່ມີທ່າອ່ຽງຊ້າລົງມາຢູ່ 5,8% ໃນປີໜ້າ ເຊິ່ງຖືເປັນການຊ້າລົງຫລາຍທີ່ສຸດນັບແຕ່ປີ 2001 ທີ່ເສດຖະກິດອາຊີຂະຫຍາຍຕົວພຽງ 4,9%.
