ທິບພະຍະປະກັນໄພ ເປີດຫ້ອງການ ສາຂາສະຫວັນນະເຂດ

ບໍລິສັດ ທິບພະຍະ ປະກັນໄພ ຈໍາກັດ ໄດ້ເປີດຫ້ອງການ ສາຂາສະຫວັນນະເຂດ ຢູ່ທີ່ບ້ານໄຊຍະມຸງຄຸນ ນະຄອນໄກສອນ ພົມວິຫານ ໃນວັນທີ 22 ກັນຍານີ້ ໂດຍມີທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ ຮ່ວມກັບທ່ານ ຫໍລະດີ ວໍລະຣາດ ຜູ້ອຳນວຍການໃຫຍ່ ບໍລິສັດ ທິບພະຍະ ປະກັນໄພ ຈໍາກັດ ຕັດແຖບຜ້າ ແລະ ຕີຄ້ອງເປັນສັນຍາລັກເປີດຫ້ອງການສາຂາດັ່ງກ່າວ.

ທ່ານ ຫໍລະດີ ວໍລະຣາດ ກ່າວ​ໃນ​ພິທີວ່າ: ບໍລິສັດ ທິບພະຍະ ປະກັນໄພ ມະຫາຊົນ ຈໍາກັດ ເປັນລັດວິສາຫະກິດຂອງລັດຖະບານໄທ ໂດຍແມ່ນກະຊວງການຄັງໄທຖືຫຸ້ນເປັນສ່ວນໃຫຍ່ ຊຶ່ງປະກອບມີຂາຫຸ້ນເຊັ່ນ: ປທທ,ບໍລິສັດນໍ້າມັນເຊື້ອໄຟໄທ, ທະນາຄານກຸງໄທ, ທະນາຄານອອມສິນ, ກຸງໄທພານິດປະກັນໄພ, ກອງທຶນບໍາເນັດບໍານານຂ້າຣາຊະການ. ນອກນັ້ນ ກໍຍັງມີຊັບສິນຂອງສ່ວນພຣະມະຫາກະສັດຢູ່ນໍາດ້ວຍ ຊຶ່ງເປັນບໍລິສັດທີ່ມີຄວາມໝັ້ນຄົງທາງດ້ານການເງິນ.

ບໍລິສັດ ທິບພະຍະ ປະກັນໄພ ໄດ້ມາລົງທຶນສ້າງຕັ້ງບໍລິສັດ ຢູ່ ສປປ ລາວ ໃນຕົ້ນປີ 2014 ມີສໍານັກໃຫຍ່ຢູ່ນະຄອນຫລວງວຽງຈັນ ມີພະນັກງານປະມານ 60 ຄົນ ຊຶ່ງໃຫ້ການບໍລິການດ້ານປະກັນໄພທຸກປະເພດ ມີທັງປະກັນໄພທົ່ວໄປ ແລະ ປະກັນໄພຊີວິດ ທີ່ໄດ້ຮັບຄວາມໄວ້ວາງໃຈໃນການຮັບປະກັນຄຸ້ມຄອງເຂື່ອນໄຟຟ້າ 7 ເຂື່ອນ ແລະ ໂຮງໄຟຟ້າແສງຕາເວັນອີກ 5 ໂຮງ, ຈາກນີ້ກໍມີອາຄານ, ການຂົນສົ່ງ, ການກໍ່ສ້າງ, ການປະກັນສຸຂະພາບ, ປະກັນຊີວິດ ແລະ ປະກັນລົດກວມ 75% ຂອງເບັ້ຍປະກັນທັງໝົດ.

ເພື່ອເປັນການຮອງຮັບກັບການຂະຫຍາຍຕົວທາງດ້ານເສດຖະກິດ ແລະ ເພື່ອໃຫ້ການບໍລິການລູກຄ້າ ກໍຄືສັງຄົມໄດ້ຢ່າງທົ່ວເຖິງ ບໍລິສັດ ທິບພະຍະ ປະກັນໄພ ມີນະໂຍບາຍແຕ່ງຕັ້ງຕົວແທນຂາຍຢູ່ທຸກແຂວງໃນທົ່ວປະເທດ, ສະເພາະຢູ່ແຂວງສະຫວັນນະເຂດ ໄດ້ສ້າງຕັ້ງຫ້ອງການຂຶ້ນ ທີ່ມີພະນັກງານຂາຍປະກັນໄພ ແລະ ພະນັກງານບໍລິການໃນການແກ້ໄຂອຸປະຕິເຫດ. ນອກນັ້ນ ຍັງມີທິມງານຈາກສໍານັກງານໃຫຍ່ພະແນກປະກັນຊີວິດ, ການຕະຫລາດ, ພະແນກປ່ຽນຊັບສິນ ແລະ ຜູ້ຈັດການພາກສະໜາມ ທີ່ຄອຍໃຫ້ການສະໜັບສະໜູນ ແລະ ຊ່ວຍເຫລືອຢູ່ສະເໝີ ຊຶ່ງມາຮອດປັດຈຸບັນ ບໍລິສັດ ທິບພະຍະ ປະກັນໄພ ມີລູກຄ້າຫລາຍສົມຄວນ, ມີຕົວແທນຫລາຍກວ່າ 60 ຄົນໃນທົ່ວປະເທດ ແລະ ມີປະມານ 10 ຄູ່ຮ່ວມທຸລະກິດ ຊຶ່ງບໍລິສັດມີຫລາຍຜະລິດຕະພັນອອກມາຮັບໃຊ້ສັງຄົມເຊັ່ນ: ປະກັນໄພລົດ, ອັກຄີໄພ, ທີ່ຢູ່ອາ​ໄສ, ປະກັນສຸຂະພາບ, ປະກັນອຸປະຕິເຫດ, ແຮງງານ, ປະກັນຊີວິດ, ປະກັນຂົນສົ່ງສິນຄ້າ, ການກໍ່ສ້າງ, ການເດີນທາງ-ທ່ອງທ່ຽວ ແລະ ປະກັນຂະແໜງອື່ນໆ…

ເພື່ອສ້າງຄວາມສະດວກສະບາຍໃຫ້ກັບລູກຄ້າ ພ້ອມນີ້ ທິບພະຍະ ປະກັນໄພ ໄດ້ຂະຫຍາຍການຄຸ້ມກັນຂອງສັນຍາປະກັນໄພ ເພື່ອເຮັດໃຫ້ການປະກັນໄພຖືກລົງ. ທິບພະຍະ ປະກັນໄພ ໄດ້ມີການປັບປຸງຜະລິດຕະພັນປະກັນໄພເຊັ່ນ: ປະກັນໄພລົດ TIP AEC, ປະກັນໄພດຽວຄຸ້ມຄອງສອງປະເທດ ລາວ-ໄທ ລົດຕໍາຢູ່ລາວໄປສ້ອມແປງຢູ່ໄທ  ຫລື ຕໍາຢູ່ໄທສ້ອມແປງຢູ່ໄທກໍໄດ້, ຊື້ປະກັນໄພລາວແຖມປະກັນໄພໄທຕ້ອງໃຊ້ TIP AEC.