U19 ຍິງ ຢູ່ກຸ່ມເອັຟ ຮ່ວມກັບເຈົ້າພາບ ແຂ່ງຂັນຊີງແຊ້ມອາຊີຮອບຄັດເລືອກ
ນັກກິລາທີມຊາດລາວ ຮຸ່ນອາຍຸບໍ່ເກີນ 19 ປີຍິງ ຫລື U19 ຖືກຈັດຢູ່ກຸ່ມເອັຟຮ່ວມກັບເຈົ້າພາບ ຂອງການແຂ່ງຂັນບານເຕະຍິງຊີງແຊ້ມອາຊີ ຮຸ່ນອາຍຸບໍ່ເກີນ 19 ປີ ຮອບຄັດເລືອກ 2019 ຮອບທີ 1 (AFC U-19 WOMEN’S CHAMPIONSHIP 2019) ທີ່ປະເທດມຽນມາ ຈັດຂຶ້ນທ້າຍເດືອນຕຸລານີ້.
ທ່ານ ວົງມີໄຊ ສຸກບົວຄໍາ ຄູຝຶກນັກກິລາທີມຊາດລາວ U19 ຍິງ ໃຫ້ສໍາພາດວ່າ: ປັດຈຸບັນພວກເຮົາໄດ້ມີຄວາມພ້ອມເກືອບ 90% ແລ້ວ ເພື່ອກຽມເຂົ້າຮ່ວມການແຂ່ງຂັນບານເຕະຍິງຊີງແຊ້ມອາຊີ ຮຸ່ນອາຍຸບໍ່ເກີນ 19 ປີ ຮອບຄັດເລືອກ 2019 ຮອບທີ 1 (AFC U-19 WOMEN’ SCHAMPIONSHIP 2019) ທີ່ປະເທດມຽນມາ ໃນລະຫວ່າງວັນທີ 24-28 ຕຸລາ 2018 ໂດຍທີມຊາດລາວ ຢູ່ຮ່ວມກຸ່ມ F ປະກອບມີ: ມຽນມາ (ເຈົ້າພາບ), ອີຣານ, ປາແລສຕິນ ແລະ ລາວ.
ສຳລັບຕາຕະລາງການແຂ່ງຂັນທີມຊາດລາວ ຈະລົງສະໜາມ 3 ຄັ້ງຄື: ວັນທີ 24 ຕຸລາ ເວລາ 18:00 ໂມງ ພົບກັບ ທີມຊາດມຽນມາ, ວັນທີ 26 ຕຸລາ ເວລາ 15:00 ໂມງ ພົບກັບ ອີຣານ ແລະ ວັນທີ 28 ຕຸລາ ເວລາ 15:00 ໂມງ ພົບກັບ ປາແລສຕິນ ເຊິ່ງການແຂ່ງຂັນທັງ 3 ຄັ້ງແມ່ນຈະລົງແຂ່ງຂັນທີ່ສະໜາມກິລາ Thuwunna Stadium, Yangon.
