ເຟດຂຶ້ນດອກເບ້ຍ 0,25% ຄາດວ່າ ເສດຖະກິດຈະເຕີບໃຫຍ່ອີກຢ່າງໜ້ອຍ 3 ປີ
ທະນາຄານກາງອາເມລິກາ (ເຟດ) ຂຶ້ນອັດຕາດອກເບ້ຍກູ້ຢືມອີກ 0,25% ເປັນ 2,00-2,25% ແລະ ຮັກສາແຜນການເຂັ້ມງວດນະໂຍບາຍການເງິນຢ່າງຕໍ່ເນື່ອງ ເພາະຄາດວ່າເສດຖະກິດອາເມລິກາຈະເຕີບໃຫຍ່ອີກ 3 ປີ.
ເຟດ ຖະແຫລງຫລັງສຳເລັດກອງປະຊຸມນະໂຍບາຍ ໃນວັນທີ 26 ກັນຍາຕາມເວລາອາເມລິກາ, ຄາດການວ່າຈະຂຶ້ນດອກເບ້ຍອີກໃນເດືອນທັນວາປີນີ້, ອີກສາມຄັ້ງໃນປີໜ້າ ແລະ ອີກໜຶ່ງຄັ້ງໃນປີຕໍ່ໄປ ເຊິ່ງຈະເຮັດໃຫ້ອັດຕາດອກເບ້ຍກູ້ຢືມຂ້າມຄືນ ເຊິ່ງເປັນອັດຕາດອກເບ້ຍນະໂຍບາຍໄປຢູ່ທີ່ 3,4% ສູງກວ່າຈຸດທີ່ເຟດຄາດວ່າເປັນຈຸດທີ່ເປັນກາງບໍ່ກະຕຸ້ນ ຫລື ຈຳກັດເສດຖະກິດປະມານ 0,5%. ເຟດຄາດວ່າ: ຈະຮັກສານະໂຍບາຍເຂັ້ມງວດການເງິນໄປຈົນຮອດປີ 2022 ເພາະເສດຖະກິດປີນີ້ຈະຂະຫຍາຍຕົວ 3,1% ຫລາຍກວ່າທີ່ຄາດການ ແລະ ຈະຂະຫຍາຍຕົວປານກາງໄປອີກ 3 ປີ. ຂະນະທີ່ອັດຕາຫວ່າງງານຕໍ່າຢ່າງມີສະຖຽນລະພາບ ແລະ ອັດຕາເງິນເຟີ້ໃກ້ເປົ້າໝາຍ 2%.
ທ່ານ ເຈີໂຣມ ພາວເວລ ປະທານເຟດ ຖະແຫລງຂ່າວຫລັງການອອກຖະແຫລງການວ່າ: ການທີ່ຖະແຫລງການຂອງເຟດຕັດຄຳວ່າ: “ຫລຸດຜ່ອນ” ອອກຈາກຄຳວ່າ: “ນະໂຍບາຍການເງິນ” ພາຍຫລັງໃຊ້ຄຳນີ້ເປັນແນວທາງໃຫ້ແກ່ຕະຫລາດການເງິນ ແລະ ຄົວເຮືອນເກືອບຕະຫລອດທົດສະວັດຜ່ານມາ ບໍ່ໄດ້ເປັນສັນຍານວ່າ: ເຟດຈະປ່ຽນແປງນະໂຍບາຍ, ແຕ່ເປັນສັນຍານວ່າ: ນະໂຍບາຍກຳລັງເປັນໄປຕາມຄາດການຫລາຍຂຶ້ນ.
ສ່ວນປະທານາທິບໍດີ ໂດນັລ ທຣຳ ຖະແຫລງຂ່າວນອກຮອບກອງປະຊຸມສະມັດຊາໃຫຍ່ສະຫະປະຊາຊາດ ວິຈານການຂຶ້ນດອກເບ້ຍຂອງເຟດອີກເທື່ອໜຶ່ງວ່າ: ອາເມລິກາກຳລັງໄປໄດ້ດີ, ແຕ່ໂຊກບໍ່ດີທີ່ເຟດພັດມາຂຶ້ນດອກເບ້ຍ, ທ່ານພ້ອມຈ່າຍໜີ້ ຫລື ເຮັດແນວອື່ນເພື່ອເພີ່ມການຈ້າງງານ ແລະ ຮູ້ສຶກກັງວົນທີ່ເຟດເບິ່ງຄືວ່າຈະມັກຂຶ້ນດອກເບ້ຍ.
