ມົນລະພິດໃນອາກາດທຳລາຍສະໝອງລູກ

     ທີມງານວິໄຈພາຍໃຕ້ການນຳຂອງແພດແບຣດລີ ປີເຕີສັນ ຜູ້ອຳນວຍການສະຖາບັນເພື່ອການພັດທະນາຈິດໃຈ ປະຈຳໂຮງໝໍ ເດັກແຫ່ງລອສແຈງເຈີລິສ ເຜີຍແຜ່ຜົນງານວິໄຈຫລ້າສຸດໃສວາລະສານ ຈາມາ ໄຊເຄຍທຣີ ລະບຸວ່າ: ມົນລະພິດປົກກະຕິທົ່ວໄປບໍ່ວ່າຈະແມ່ນຄັວນຈາກລົດ ຫລື ຄັວນຈາກໂຮງງານ ຕະຫລອດຮອດຄັວນຢາສູບ ສາມາດສ້າງຄວາມເສຍຫາຍໃຫ້ກັບສະໝອງຂອງລູກໃນທ້ອງໄດ້ ເຮັດໃຫ້ຊີ້ນສະໝອງສີຂາວໃນສະໝອງເດັກຫົດນ້ອຍລົງ, ສ້າງຄວາມເສຍຫາຍໃຫ້ແກ່ຂະບວນການພັດທະນາການຂອງເດັກນັບແຕ່ຢູ່ໃນທ້ອງຈົນຕິດໂຕໄປຕະຫລອດຊີວິດ ໂດຍສານພິດທີ່ຢູ່ໃນອາກາດ ເຊິ່ງເກີດຈາກການເຜົາໄໝ້ທີ່ບໍ່ສົມບູນຂອງສານຊີວະພາບ ເຊັ່ນ : ການເຜົາໄໝ້ຂອງເຊື້ອໄຟໃນເຄື່ອງຈັກ ເປັນຕົ້ນ. ໂດຍຈາກການທົດລອງໃນເດັກທີ່ຢູ່ໃນສະ ພາບແວດລ້ອມທີ່ມີລະດັບມົນລະພິດຕ່າງກັນ ແລ້ວສະແກນສະໝອງພົບການສະແກນທີ່ສະແດງໃຫ້ເຫັນວ່າ : ສານຊີ້ນສະໝອງສີ ຂາວໃນພາກສ່ວນກະໂຫລກເບື້ອງຊ້າຍມີປະລິມານຫລຸດລົງເມື່ອປຽບທຽບກັບປະລິມານໃນສະໝອງຂອງເດັກທົ່ວໄປ ສະໝອງ ພາກສ່ວນດັ່ງກ່າວມີໜ້າທີ່ໃນການຄວບຄຸມການຮຽນຮູ້ພາສາ, ການຮັບຮູ້, ເຂົ້າໃຈເລື່ອງຕ່າງໆ ໄປຈົນເຖິງພຶດຕິກຳການສະແດງອອກ,  ຂັ້ນຕອນພັດທະນາການຕ່າງໆ,  ເຮັດໃຫ້ເກີດບັນຫາດ້ານພັດທະນາການບາງເລື່ອງຕາມມາ.

ທີມນັກວິໄຈບໍ່ສາມາດບອກໄດ້ວ່າເປັນຍ້ອນສາເຫດໃດສະໝອງເບື້ອງຊ້າຍຈຶ່ງໄດ້ຮັບຜົນກະທົບຫລາຍກ່ວາ, ແຕ່ຕັ້ງຂໍ້ສົງໄສວ່າເປັນຍ້ອນເດັກນ້ອຍເຫລົ່ານີ້ໄດ້ຮັບຜົນກະທົບຈາກສານພິດໃນອາກາດນັບແຕ່ເລີ່ມຂະບວນການທາງຊີວະເຄມີໃນຂັ້ນຕອນທຳອິດສຸດຂອງການຖືພາ ເຊິ່ງໜ້າຈະສົ່ງຜົນກະທົບໃຫ້ສະໝອງຂອງລູກພັດທະນາອອກມາບໍ່ເທົ່າກັນໜ້ອຍໜຶ່ງລະຫ່ວາງເບື້ອງຊ້າຍກັບເບື້ອງຂວາ. ໂດຍທີມນັກວິໄຈພົບວ່າ : ຍິ່ງລະດັບມົນລະພິດໃນອາກາດທີ່ຜູ້ເປັນແມ່ໄດ້ຮັບສູງເທົ່າໃດ ປະລິມານຂອງຊີ້ນສານສະໝອງສີຂາວ ຍິ່ງໜ້ອຍລົງຫລາຍເທົ່ານັ້ນ ພ້ອມ ກັນນັ້ນເດັກນ້ອຍກໍຍິ່ງມີບັນຫາໃນ ດ້ານພຶດຕິກຳ ແລະ ບັນຫາດ້ານ ພັດທະນາການຫລາຍຂຶ້ນເປັນເງົາຕາມໂຕ. ສິ່ງສຳຄັນກ່ວານັ້ນ ທີມນັກວິໄຈຍັງພົບຕື່ມວ່າຈາກການທົດລອງໃນກຸ່ມໂຕຢ່າງເມື່ອາຍຸ 5 ປີ ສະແດງໃຫ້ເຫັນນຳວ່າມົນລະພິດໃນອາກາດບໍ່ພຽງແຕ່ສົ່ງຜົນກະທົບຕໍ່ສະໝອງຂອງເດັກນັບແຕ່ກ່ອນຈະເກີດເທົ່ານັ້ນ ຫລັງເກີດ ແລ້ວເດັກນ້ອຍທີ່ຢູ່ໃນສະພາບແວດລ້ອມມີມົນລະພິດໃນອາກາດສູງກໍຍິ່ງມີສານສີຂາວໃນສະໝອງໜ້ອຍລົງຕື່ມອີກ ແລະ ມີບັນຫາ ເລື່ອງພຶດຕິກຳ ແລະ ພັດທະນາການຫລາຍຂຶ້ນໄປຕະຫລອດຊີວິດຂອງເດັກນຳອີກ.