ຄະນະຜູ້ແທນສະພາແຫ່ງຊາດລາວເຂົ້າຮ່ວມງານວາງສະແດງສາກົນພາກຕະເວັນຕົກຄັ້ງທີ 17 ທີ່ ສປ ຈີນ
ຄະນະຜູ້ແທນຂັ້ນສູງຂອງສະພາແຫ່ງຊາດລາວນໍາໂດຍ, ທ່ານ ນາງ ສີໃສ ລືເດດມູນສອນ ກຳມະ ການສູນກາງພັກ, ຮອງປະທານສະພາແຫ່ງຊາດ ໄດ້ເຂົ້າຮ່ວມງານວາງສະແດງສາກົນພາກຕະເວັນຕົກ ຄັ້ງທີ 17 ຕາມການເຊື້ອເຊີນ ໃນຖານະເປັນແຂກກິດຕິມາສັກ ຂອງເຈົ້າພາບ, ຊຶ່ງໄດ້ຈັດຂຶ້ນໃນລະຫວ່າງວັນທີ 20-24 ກັນຍາ 2018 ທີ່ແຂວງເຊສວນ ສປ ຈີນ.
ການຈັດງານວາງສະແດງສາກົນຄັ້ງນີ້, ເປັນການຈັດຕັ້ງປະຕິບັດຍຸດທະສາດ ການພັດທະນາພາກຕາເວັນຕົກຂອງປະເທດຈີນ, ຊຶ່ງປີນີ້ ຈັດຂື້ນພາຍໃຕ້ ຄໍາຂວັນທີ່ວ່າ: “ຮ່ວມເປັນເຈົ້າພາບ, ຮ່ວມແບ່ງປັນ ແລະ ທຸກຝ່າຍໄດ້ປະໂຫຍດ” (Co-hosting, sharing and win-win).
ເຂົ້າຮ່ວມໃນງານວາງສະແດງສາກົນຄັ້ງນີ້, ມີ 60.000 ຄົນ ຈາກ 91 ປະເທດ ແລະ ພາກພື້ນ ລວມທັງ ສປປ ລາວ ໃນນີ້ 20.000 ຄົນ ແມ່ນມາຈາກພາຍໃນປະເທດ ແລະ ໄດ້ມີການເຊັນສັນຍາໂຄງການລົງທຶນ ເຖິງ 1008 ໂຄງການ, ມີການວາງສະແດງສິນຄ້າທັງໝົດ 9027 ລາຍການ ຈາກ 76 ປະເທດ. ໃນນັ້ນ, ມີການວາງ ສະແດງຈາກຕ່າງປະເທດ 2347 ລາຍການ, ໂດຍໃຊ້ງົບປະມານໃນການຈັດງານວາງສະແດງສາກົນຄັ້ງນີ້ ສູງເຖິງ 78 ພັນຕື້ກວ່າຢວນ (ສະກຸນເງິນຈີນ).
ໃນວາລະເຂົ້າຮ່ວມງານວາງສະແດງດັ່ງກ່າວ, ທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ ໄດ້ພົບປະກັບ ທ່ານ ຫູ ຊູນຮົວ, ຮອງນາຍົກລັດຖະມົນຕີແຫ່ງ ສປ ຈີນ ແລະ ທ່ານ ຢິນລີ້, ເຈົ້າແຂວງເຊສວນ, ຊຶ່ງທ່ານຮອງປະທານສະພາແຫ່ງຊາດ ກໍ່ໄດ້ສະແດງຄວາມຂອບໃຈ ຕໍ່ການເຊື້ອເຊີນຄະນະຜູ້ແທນຈາກສະພາແຫ່ງຊາດລາວ ມາຮ່ວມງານວາງສະແດງຄັ້ງນີ້ ແລະ ໄດ້ໃຫ້ການຕ້ອນຮັບຢ່າງອົບອຸ່ນ ແລະ ສະໜິດສະໜົມ ຈາກການນຳພັກ-ລັດ ກໍຄື ອຳນາດການປົກຄອງແຂວງເຊສວນ, ພ້ອມຍ້ອງຍໍຊົມເຊີຍ ແລະ ຕີລາຄາສູງຕໍ່ການກະກຽມຈັດງານວາງສະແດງອັນຍິ່ງໃຫຍ່ລະດັບໂລກ ດ້ວຍຜົນສໍາເລັດອັນຈົບງາມ, ໂດຍມີຫລາຍປະເທດ ໃຫ້ຄວາມສົນໃຈເຂົ້າຮ່ວມ, ຊຶ່ງໄດ້ສະທ້ອນໃຫ້ເຫັນເຖິງຜົນສຳເລັດອັນຍິ່ງໃຫຍ່ຮອບດ້ານ ຈາກການຈັດຕັ້ງປະຕິບັດນະໂຍບາຍເປີດປະຕູສູ່ໂລກພາຍນອກ, ໂດຍສະເພາະ ແມ່ນການຈັດຕັ້ງປະຕິບັດຍຸດທະສາດ ການພັດທະນາພາກຕາເວັນຕົກຂອງ ສປ ຈີນ.
ນອກຈາກນີ້, ຄະນະຜູ້ແທນສະພາແຫ່ງຊາດລາວ ຍັງໄດ້ເຄື່ອນໄຫວຢ້ຽມຢາມພື້ນຖານເສດຖະກິດ, ສັງຄົມ ແລະ ວັດທະນະທຳຢູ່ນະຄອນເສິນຕູອີກດ້ວຍ.
