ສົງຄາມການຄ້າ ຈີນ-ອາເມລິກາ ກະທົບທ່າອ່ຽງເສດຖະກິດອາຊີປີໜ້າ
ທະນາຄານພັດທະນາອາຊີ (ADB) ເຕືອນວ່າ: ປີໜ້າເສດຖະກິດອາຊີທີ່ກຳລັງພັດທະນາອາດຂະຫຍາຍຕົວຕໍ່າກວ່າການຄາດຄະເນ ເພາະສົງຄາມການຄ້າ ຈີນ-ອາເມລິກາ ຈະກະທົບປະເທດທີ່ອາໄສການສົ່ງອອກເປັນຫລັກ.
ADB ເຊິ່ງຕັ້ງຢູ່ໃນນະຄອນຫລວງມະນິລາ ອອກລາຍງານທ່າອ່ຽງການພັດທະນາອາຊີໃນວັນທີ 26 ກັນຍານີ້ ຮັກສາການຄາດຄະເນການຂະຫຍາຍຕົວຂອງເສດຖະກິດອາຊີປີນີ້ໄວ້ທີ່ 6,0%, ແຕ່ປັບຫລຸດການຄາດຄະເນຂອງປີໜ້າຈາກ 5,9% ເຫລືອ 5,8% ຖືວ່າຕໍ່າທີ່ສຸດສຳລັບ 45 ປະເທດໃນອາຊີ-ປາຊີຟິກ ນັບແຕ່ປີ 2001 ທີ່ຂະຫຍາຍຕົວ 4,9%. ນັກເສດຖະສາດຂອງ ADB ອະທິບາຍວ່າ: ຄວາມສ່ຽງທາງລົບກຳລັງເພີ່ມຂຶ້ນຫລາຍ ທັງເລື່ອງຜົນກະທົບຈາກສົງຄາມການຄ້າ ຈີນ-ອາເມລິກາ ທີ່ຈະມີຕໍ່ຕ່ອງໂສ້ອຸປະທານໃນພາກພື້ນ, ເລື່ອງກະແສເງິນທຶນໄຫລອອກກະທັນຫັນ ຖ້າທະນາຄານກາງອາເມລິກາ (ເຟດ) ຂຶ້ນອັດຕາດອກເບ້ຍໄວກວ່າກຳນົດ ແລະ ເລື່ອງສະພາບຄ່ອງໂລກຝືດລົງ ເຮັດໃຫ້ຕົ້ນທຶນການກູ້ຢືມແພງຂຶ້ນ.
ຖ້າແຍກເປັນແຕ່ລະອະນຸພາກພື້ນ ແລະ ແຕ່ລະປະເທດ, ADB ຄາດວ່າ: ອາຊີໃຕ້ຈະຂະຫຍາຍຕົວໄວທີ່ສຸດໃນອາຊີ 7,0% ໃນປີນີ້ ແລະ 7,2% ໃນປີໜ້າ, ອາຊີຕາເວັນອອກສຽງໃຕ້ຈະຂະຫຍາຍຕົວ 5,1% ໃນປີນີ້ ເພາະສົ່ງອອກຂະຫຍາຍຕົວປານກາງ, ເງິນເຟີ້ເພີ່ມຂຶ້ນໄວ, ເງິນທຶນໄຫລອອກ, ດຸນການຊຳລະເງິນຫລຸດລົງ. ສ່ວນປີໜ້າຈະຂະຫຍາຍຕົວ 5,2%, ອາຊີຕາເວັນອອກຈະຂະຫຍາຍຕົວ 6,0% ໃນປີນີ້ ແລະ 5,7% ໃນປີໜ້າ, ເສດຖະກິດຈີນຈະຂະຫຍາຍຕົວ 6,6% ໃນປີນີ້ ແລະ 6,3% ໃນປີໜ້າ.
