U16 ຍິງ ຖືກຕ້ອນຮັບຢ່າງສົມກຽດຈາກ ສຕລ
ໃນວັນທີ 25 ກັນຍານີ້, ຄະນະຄູຝຶກ ແລະ ນັກກິລາທີມຊາດຍິງລາວ ຮຸ່ນອາຍຸບໍ່ເກີນ 16 ປີ ໄດ້ເດີນທາງເຖິງສະໜາມບິນສາກົນວັດໄຕ ນໍາໂດຍທ່ານ ນາງ ພອນທິບ ແສງມະນີ ຫົວໜ້າຄູຝຶກທີມຊາດລາວ U16 ແລະ ຕ້ອນຮັບໂດຍ ທ່ານ ພອນປະເສີດ ເພັດຊົມພູ ຕາງໜ້າສະຫະພັນບານເຕະແຫ່ງຊາດລາວ (ສຕລ) ພ້ອມດ້ວຍແຟນບານ, ຜູ້ປົກຄອງ ແລະ ສື່ມວນຊົນ.
ສຳລັບຜົນງານ ທີມຊາດຍິງລາວ ຮຸ່ນອາຍຸບໍ່ເກີນ 16 ປີ ແມ່ນສາມາດສ້າງຜົນງານໄດ້ໂດດເດັ່ນໃນລາຍການແຂ່ງຂັນບານເຕະຍິງ ຊີງແຊ້ມອາຊີ ຮຸ່ນອາຍຸບໍ່ເກີນ 16 ປີ ຮອບຄັດເລືອກ 2019 ເປັນອັນດັບ 1 ຂອງກຸ່ມບີ ຈາກການລົງແຂ່ງຂັນ 4 ນັດ ຊະນະ 3 ນັດ ສະເໝີ 1 ນັດ ມີ 10 ຄະແນນ ຜ່ານເຂົ້າສູ່ຮອບຄັດເລືອກຮອບທີ 2.
ສ່ວນຮອບຄັດເລືອກຮອບທີ 2 ຈະແຂ່ງຂັນໃນລະຫວ່າງວັນທີ 23 ກຸມພາ ຫາ 3 ມີນາ 2019 ມີທັງຫມົດ 8 ທີມທີ່ຜ່ານປະກອບມີ: ສປ ຈີນ, ລາວ, ອີຣານ, ອົດສະຕຣາລີ, ມຽນມາ, ບັງກະລາເທດ, ຫວຽດນາມ ແລະ ຟີລິບປິນ ໂດຍຈະເອົາພຽງ 4 ທີມເຂົ້າຮອບສຸດທ້າຍ, ສ່ວນ 4 ທີມທີ່ຜ່ານເຂົ້າຮອບສຸດທ້າຍແລ້ວມີ ສປປ ເກົາຫລີ (ແຊ້ມເກົ່າ, ສ.ເກົາຫລີ (ຮອງແຊ້ມ), ຍີ່ປຸ່ນ (ອັນດັບ 3) ແລະ ໄທ (ເຈົ້າພາບ).
