ແລ່ນການກຸສົນແຕ່ໃຕ້ຮອດເໜືອ

ໃນວັນທີ 26 ກັນຍານີ້, ນະຄອນຫລວງວຽງຈັນ ໄດ້ມີພິທີຖະແຫລງຂ່າວກິດຈະກຳແລ່ນເພື່ອການກຸສົນ ແຕ່​ໃຕ້ຮອດ​ເໜືອ (ໄລຍະທາງ1.569 ກິໂລແມັດ) ຂຶ້ນ ໂດຍມີທ່ານ ພູໄຊ ເທບພະວົງ ເລຂາທິການສະພາການຄ້າ ແລະ ອຸດສາຫະກຳແຫ່ງຊາດລາວ ພ້ອມດ້ວຍນັກກິລາເຂົ້າຮ່ວມ.

ທ່ານ ຄາໂຫລຄຣາລາ ນັກກິລາແລ່ນ-ລານຈາກປະເທດຟີລິບປິນ ກ່າວວ່າ: ກິດຈະກຳແລ່ນລະດົມທຶນເພື່ອຊ່ວຍເຫລືອໂຮງໝໍແຂວງອັດຕະປື ແລະ ໂຮງໝໍເພື່ອນລາວສໍາລັບເດັກ 7 ຕຸລານີ້ ເຊິ່ງເລີ່ມຕົ້ນແຕ່ສວນໄຊເສດຖາ  ເມືອງສາມັກຄີໄຊ ແຂວງອັດຕະປື ຂຶ້ນຫາເມືອງປາກຊ່ອງ ແຂວງຈໍາປາສັກ ໂດຍຈະສືບຕໍ່ຫານະຄອນຫລວງວຽງຈັນໃນວັນທີ 15 ຕຸລາ ແລະ ວັນທີ 19 ຕຸລາ ຈະຮອດແຂວງຫລວງພະບາງ ແລ້ວສືບຕໍ່ຂຶ້ນຫາແຂວງຜົ້ງສາລີ ໃນວັນທີ 26 ຕຸລານີ້, ນອກຈາກນັກແລ່ນ 4 ຄົນແລ້ວ ຍັງມີບັນດານັກກິລາແລ່ນຮ່ວມນໍາອີກ. ສໍາລັບການແລ່ນລະດົມທຶນຄັ້ງນີ້ ແມ່ນຈະນໍາລາຍໄດ້ເຂົ້າຊື້ອຸປະກອນການແພດໃຫ້ແກ່ໂຮງໝໍແຂວງອັດຕະປື ແລະ ໂຮງໝໍເພື່ອນລາວສໍາລັບເດັກ  ແຂວງຫລວງພະບາງ. ດັ່ງນັ້ນ ທ່ານໃດທີ່ຢາກຮ່ວມບໍລິຈາກແມ່ນສາມາດບໍລິຈາກຕາມໄລຍະທາງທີ່ນັກກິລາແລ່ນຜ່ານໄດ້.