ລາວ-ຫວຽດນາມເພີ່ມທະວີການຮ່ວມມືວຽກງານເສນາທິການໃຫ້ລັດຖະບານ

ໃນວັນທີ 19-23 ກັນຍານີ້, ທ່ານລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີແຫ່ງ ສປປ ລາວ ເພັດ ພົມພິພັກ ໄດ້ໄປຢ້ຽມຢາມ ແລະ ເຄື່ອນໄຫວເຮັດວຽກຢູ່ນະຄອນຍ່າຈ່າງ, ແຂວງແຄັງຮວາ ສສ. ຫວຽດນາມ ແລະ ໄດ້ພົບປະສອງຝ່າຍກັບທ່ານ ມາຍ ຕຽນ ຢຸ້ງ ລັດຖະມົນຕີ, ຫົວໜ້າຫ້ອງວ່າການລັດຖະບານແຫ່ງ ສສ ຫວຽດນາມ, ໂດຍໄດ້ລາຍງານສະພາບພົ້ນເດັ່ນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງສອງຝ່າຍໃຫ້ກັນຊາບ, ພ້ອມທັງໄດ້ຕີລາຄາສູງຕໍ່ການຮ່ວມມືກັນໃນຜ່ານມາ ເປັນຕົ້ນແມ່ນຜົນສໍາເລັດການຈັດກອງປະຊຸມສໍາມະນາແລກປ່ຽນບົດຮຽນໃນວຽກງານເສນາທິການ, ການບໍລິການຮັບໃຊ້ລັດຖະບານ, ຮັບໃຊ້ນາຍົກລັດຖະມົນຕີ ຂອງສອງຫ້ອງວ່າການສໍານັກງານນາຍົກລັດຖະມົນຕີລາວ ແລະ ຫວຽດນາມ. ນອກນີ້, ສອງຝ່າຍໄດ້ເປັນເອກະພາບສືບຕໍ່ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ອັນເປັນມູນເຊື້ອທີ່ສອງພັກ, ສອງລັດ ແລະ ປະຊາຊົນສອງຊາດທີ່ມີມາແຕ່ດົນນານແລ້ວນັ້ນໃຫ້ແໜ້ນແຟ້ນຍິ່ງໆຂຶ້ນ, ພ້ອມທັງສືບຕໍ່ແລກປ່ຽນຄະນະຜູ້ແທນລະດັບຕ່າງໆຂອງສອງຝ່າຍຢ່າງເປັນປົກກະຕິ. ໃນໂອກາດນີ້, ຍັງມີພິທີປະດັບຫລຽນໄຊ ແລະ ມອບໃບຍ້ອງຍໍໃຫ້ກົມກອງ ແລະ ບຸກຄົນຂອງຫ້ອງວ່າການສໍານັກງານນາຍົກ ລັດຖະມົນຕີແຫ່ງ ສປປ ລາວ ແລະ ຫ້ອງວ່າການລັດຖະບານແຫ່ງ ສສ. ຫວຽດນາມ ທີ່ມີຜົນງານເດັ່ນປະກອບສ່ວນເຂົ້າໃນວຽກງານເສນາທິການໃຫ້ລັດຖະບານສອງປະເທດໃນຜ່ານມາ, ພ້ອມນີ້, ຄະນະຜູ້ແທນລາວຍັງໄດ້ພົບປະກັບອໍານາດການປົກຄອງແຂວງແຄັງຮວາ ແລະ ຢ້ຽມຢາມບໍລິສັດ MTV yen sao ຈໍາກັດນໍາດ້ວຍ.