ມູຣິນໂຢ ຕຳນິ ປ໊ອກບາ ເຮັດໃຫ້ ແມນຢູ ເສຍປະຕູ
ໂຊເຊ ມູຣິນໂຢ ຜູ້ຈັດການທີມ ແມນເຊັສເຕີ ຢູໄນເຕັດ ຕຳນິ ປໍ ປ໊ອກບາ ກອງກາງຂອງທີມຢ່າງໜັກ ພາຍຫລັງລາວຫລິ້ນພາດຈົນເຮັດໃຫ້ທີມເສຍປະຕູ ໃນເກມ ພຣີເມຍລີກ ອັງກິດ ນັດທີ່ ແມນຢູ ເປີດສະໜາມ ໂອລ ແທ໊ຟຟອດ ສະເໝີກັບ ວູຟແຮມຕັນ ວັນເດິເຣິ 1-1 ໃນວັນທີ 22 ກັນຍາຜ່ານມາ.
ໃນນາທີ 53 ຂອງນັດດັ່ງກ່າວ ປ໊ອກບາ ໄປພະຍາຍາມຫລິ້ນທ່າຍາກບໍລິເວນກາງສະໜາມ ສົ່ງຜົນລາວເສຍການຄອງບານ ແລະ ເຮັດໃຫ້ ວູຟ ໄດ້ໂອກາດບຸກຈົນນຳໄປສູ່ປະຕູຂອງ ຊູເອົາ ມູຕິນໂຢ.
ທັງນີ້, ເດິຊັນ ລາຍງານວ່າ: ມູຣິນໂຢ ໃຈຮ້າຍຕໍ່ເລື່ອງດັ່ງກ່າວ ຈົນເວົ້າກັບ ປ໊ອກບາ ຕອນຢູ່ໃນຫ້ອງປ່ຽນເຄື່ອງວ່າ ລາວຕ້ອງມີສະມາທິໃນການຫລິ້ນຫລາຍກວ່ານີ້ ເຊິ່ງນັ້ນອາດຈະເປັນສິ່ງທີ່ເຮັດໃຫ້ດາວເຕະຊາວຝຣັ່ງບໍ່ພໍໃຈຄືກັນ ເພາະອະດີດນັກເຕະ ຢູເວນຕຸສ ໃຫ້ສຳພາດໃນທາງຕຳນິແຜນການຫລິ້ນຂອງທີມທີ່ບໍ່ຍອມເປີດເກມບຸກຫລາຍເທົ່າທີ່ຄວນ.
