Luka Modric ຫົວໜ້າທີມຊາດໂຄອາຊີ ຄວ້າລາງວັນນັກເຕະຊາຍດີເດັ່ນໂລກ
ການປະກາດລາງວັນປະຈຳປີ 2018 ຂອງສະຫະພັນບານເຕະນາໆຊາດ ຫຼື FIFA ໃນຄືນວັນທີ 24 ກັນຍາ ທີ່ນະຄອນຫຼວງລອນດອນ ປະເທດອັງກິດ.
ລາງວັນນັກເຕະດີເດັ່ນປະເພດຊາຍເປັນຂອງ Luka Modric ກອງກາງຕົວປັ້ນເກມຈາກ Real Madrid ຫົວໜ້າທີມຊາດໂຄອາຊີ ຊຸດຮອງແຊ້ມໂລກ 2018 ເຈົ້າຂອງລາງວັນນັກເຕະດີເດັ່ນຂອງ World Cup 2018 ແລະ ເອີຣົບປີນີ້. ເຂົ້າຊີງລາງວັນນີ້ເປັນຄັ້ງທຳອິດ ແລະ ຄວ້າລາງວັນນີ້ມາຄອງໄດ້ສຳເລັດ. ເປັນນັກເຕະຊາວໂຄອາຊີຄົນທຳອິດໄດ້ລາງວັນນີ້ ໄດ້ຄະແນນໂຫວດສະເລ່ຍ 29,05%, ອັນດັບ 2 ເປັນຂອງ Cristiano Ronaldo ເຈົ້າຂອງລາງວັນນີ້ຈາກປີຜ່ານມາ 19,08%, ອັນດັບ 3 Mohamed Salah ກອງໜ້າຊາວເອຢິບຈາກ Liverpool 11,23%.
ຂະນະທີ່ລາງວັນຄູຝຶກຊາຍດີເດັ່ນເປັນຂອງ Didier Deschamps ຄູຝຶກທີມຊາດຝຣັ່ງ ໄດ້ແຊ້ມໂລກ 2018 ໄດ້ຄະແນນໂຫວດ 30,52%, ອັນດັບ 2 ເປັນຂອງ Zinedine Zidane ອະດີດຄູຝຶກ Real Madrid ໄດ້ 25,74%, ອັນດັບ 3 Zlatko Dalic ຄູຝຶກທີມຊາດໂຄອາຊີ ຊຸດທີ 2 World Cup 2018.
ນັກເຕະຍິງດີເດັ່ນເປັນຂອງ Marta da Silva ກອງໜ້າຊາວເບຣຊິລ ຂອງສະໂມສອນ Orlando Pride ໃນລີກຍິງຂອງອາເມລິກາ.
ຄູຝຶກທີມຍິງດີເດັ່ນເປັນຂອງ Reynald Pedros ຊາວຝຣັ່ງ ຄູຝຶກຂອງ Olympique Lyon ທີມຍິງໄດ້ແຊ້ມ Uefa Champion League 3 ສະໄໝຊ້ອນ.
