ຄາດຕະກອນໜຸ່ມສາວຖືກເຈົ້າໜ້າທີ່ຈັບຕົວມາດຳເນີນຄະດີໄດ້ແລ້ວ

ຈາກເຫດການສະເທືອນຂວັນທີ່ເກີດຂຶ້ນໃນຄືນວັນທີ 11 ເມສາທີ່ຜ່ານມາ, ກາຍເປັນກະແສຂ່າວທີ່ໂດ່ງດັງໃນສັງຄົມລາວ, ໂດຍສະເພາະແມ່ນຈຸດຈົບຂອງຮັກສາມເສົ້າ, ຊຶ່ງທ່ານ ພັທ ຈັນຫອມ ແກ້ວສຸລະໄຊ ຫົວໜ້າຫ້ອງຕຳຫລວດ ປກສ ນະຄອນຫລວງວຽງຈັນ ກໍໄດ້ຖະແຫລງຕໍ່ສື່ມວນຊົນໃນທ້າຍອາທິດຜ່ານມານີ້ວ່າ: ເຈົ້າໜ້າທີ່ສາມາດກັກຕົວຜູ້ຖືກຫາໄດ້ 2 ຄົນໃນວັນທີ 28 ເມສາຜ່ານມາ, ໃນນັ້ນ ມີທ້າວ ພັດສາຄອນ, ອາຍຸ 24 ປີ, ປັດຈຸບັນພັກເຊົາຢູ່ບ້ານຊຽງດາ, ເມືອງໄຊເສດຖາ ແລະ ນາງ ອ້ອມໃຈ ອາຍຸ 19 ປີ, ນັກສຶກສາ, ພັກເຊົາຢູ່ເຂດດົງໂດກ, ເມືອງໄຊທານີ, ຊຶ່ງທັງສອງໄດ້ເປັນຜູ້ຕ້ອງສົງໄສຂ້າທ້າວ ສຸລິ ຍັນ (ໃຫຍ່), ອາຍຸ 26 ປີ, ອາຊີບຄ້າຂາຍ ຢູ່ຮ້ານຂາຍລົດແຫ່ງໜຶ່ງ ເຂດບ້ານຊ້າງຄູ້, ເມືອງໄຊທານີ. ຜ່ານການສືບສວນ-ສອບສວນ ນາງ ອ້ອມໃຈ ໄດ້ຮັບສາລະພາບຕໍ່ເຈົ້າໜ້າທີ່ວ່າ: ໄດ້ຮ່ວມກັບທ້າວ ພັດສາຄອນ ລົງມືຂ້າທ້າວ ສຸລິຍັນ ຢ່າງແທ້ຈິງ ແລ້ວນຳເອົາສົບ, ພ້ອມລົດຂອງຜູ້ຕາຍໄປຈູດເຜົາຖີ້ມລົງເຫວຢູ່ເຂດເມືອງຫີນເຫີບຢ່າງເລືອດເຢັນ.

ທ້າວ ພັດສາຄອນ ໄດ້ຮັບສາລະພາບວ່າ: ເວລາປະມານ 1:30 ໂມງຂອງວັນທີ 11 ເມສາຜ່ານມາ, ຜູ້ກ່ຽວໄດ້ຜິດຖຽງ ແລະ ຕໍ່ສູ້ກັບທ້າວໃຫຍ່, ຈາກນັ້ນ ຕົນໄດ້ເອົາດິນບ໋ອກປູພື້ນ 6 ລ່ຽມຕີເອີກ ທ້າວໃຫຍ່ລົ້ມລົງ ແລະ ໃນຂະນະຕີກັນຢູ່ນັ້ນ ນາງອ້ອມໃຈ ໄດ້ຈັບເອົາດິນບ໋ອກປູພື້ນຕີໃສ່ຫົວທ້າວໃຫຍ່ອີກ 3 ຄັ້ງ, ຈາກນັ້ນ ຕົນກໍໄດ້ເອົາມີດທີ່ຕົກຢູ່ບໍລິເວນດັ່ງກ່າວມາແທງເອີກ ແລະ ຄໍຫລາຍບາດ, ເຮັດໃຫ້ທ້າວ ໃຫຍ່ ເສຍຊີວິດຄາທີ່, ຍ້ອນຄວາມຢ້ານກົວ ຈຶ່ງໄດ້ນຳເອົາສົບຂອງທ້າວໃຫຍ່ ຂຶ້ນລົດຕູ້ໄປທາງເລກ 13 ເໜືອ, ເມື່ອໄປຮອດບ້ານຫີນເຫີບ ເຫັນວ່າເຂດດັ່ງກ່າວເປັນທາງປ່ຽວບໍ່ມີຄົນ ແລະ ຍັງເປັນເຫວຊັນນຳອີກ, ຈຶ່ງໄດ້ນຳເອົາສົບຂອງທ້າວໃຫຍ່ໄປຝັງໄວ້ ແລະ ຈູດເຜົາລົດຄັນດັ່ງກ່າວ ພ້ອມທັງຊຸກລົງເຫວ ເພື່ອອຳພາງຄະດີ. ຫລັງຈາກນັ້ນກໍກັບບ້ານ.

ນາງ ອ້ອມໃຈ ໃຫ້ຮູ້ວ່າ: ຕົນ ແລະ ທ້າວ ພັດສາຄອນ ເປັນແຟນກັນເປັນເວລາ 5 ປີແລ້ວ, ຈາກນັ້ນ ຕົນໄດ້ມາຮູ້ຈັກກັບທ້າວ ໃຫຍ່ ໃນຖານະຊູ້ສາວ ຈົນສະໜິດແໜ້ນເປັນເວລາ 3 ເດືອນກ່ອນເກີດເຫດ, ແຕ່ທ້າວ ໃຫຍ່ ມີນິໃສຫຶງຫວງ, ໂມໂຫງ່າຍ, ພ້ອມທັງມີການຄູ່ຂ້າ, ຄູ່ຕີຕົນເອງຫລາຍຄັ້ງ ແລະ ໃນວັນເກີດເຫດທ້າວໃຫຍ່ໄດ້ຊວນຕົນເອງໄປທ່ຽວ ແຕ່ໄດ້ປະຕິເສດ, ຈຶ່ງເຮັດທ້າວໃຫຍ່ໂມໂຫຂູ່ຈະຂ້າຕົນເອງ ແລະ ຄອບຄົວ, ເມື່ອເປັນແນວນັ້ນ ຕົນຈຶ່ງໄປຫາທ້າວ ພັດສາຄອນ ເພື່ອຂໍຄວາມຊ່ວຍເຫລືອ, ຫລັງຈາກນັ້ນ ທ້າວໃຫຍ່ ກໍໄດ້ນຳໄປຫາຕົນຢູ່ທີ່ພັກຂອງທ້າວ ພັດສາຄອນ, ຊຶ່ງເຮັດໃຫ້ທັງສອງເກີດມີປາກສຽງ ແລະ ຕໍ່ສູ້ກັນຢ່າງຮຸນແຮງ, ຈົນພາໃຫ້ເກີດການເສຍຊີວິດດັ່ງກ່າວ.