ລັດຖະບານອອກແຈ້ງການໄຫວ້ອາໄລລະດັບຊາດຕໍ່ການເສຍຊີວີດຂອງສະຫາຍປະທານປະເທດຫວຽດນາມ ເຈີນ ດາຍ ກວາງ

ຫ້ອງວ່າການສໍານັກງານນາຍົກລັດຖະມົນຕີ, ໄດ້ອອກແຈ້ງການເຖິງບັນດາລັດຖະມົນຕີ, ຫົວໜ້າອົງການລັດທຽບເທົ່າ, ເຈົ້າຄອງນະຄອນຫລວງວຽງຈັນ ແລະ ບັນດາເຈົ້າແຂວງໃນທົ່ວປະເທດ ກ່ຽວກັບການຈັດໄຫວ້ອາໄລລະດັບຊາດຕໍ່ການເສຍຊີວິດຂອງສະຫາຍ ເຈີນ ດາຍ ກວາງ ກໍາມະການກົມການເມືອງສູນກາງພັກ, ປະທານປະເທດແຫ່ງສາທາລະນະລັດ ສັງຄົມນິຍົມຫວຽດນາມ ວ່າ: ສະຫາຍ ເຈີນ ດາຍ ກວາງ ເປັນເພື່ອນມິດທີ່ໃກ້ຊິດ ແລະ ສະໜິດສະໜົມທີ່ສຸດຂອງພັກ, ລັດ ແລະ ປະຊາຊົນລາວບັນດາເຜົ່າ, ສະນັ້ນ ຈົ່ງໃຫ້ບັນດາກະຊວງ, ອົງການ, ນະຄອນຫລວງວຽງຈັນ ແລະ ບັນດາແຂວງໃນທົ່ວປະເທດ ຈັດຄະນະໄປວາງພວງມາລາ ແລະ ຂຽນປື້ມໄວ້ອາໄລ ຢູ່ໃນສະຖານເອກອັກຄະລັດຖະທູດ ສສ ຫວຽດນາມທີ່ນະຄອນຫລວງວຽງຈັນ ແລະ ສະຖານກົງສູນໃຫຍ່ຂອງ ສສ ຫວຽດນາມ ປະຈໍາຢູ່ແຕ່ລະພາກໃນວັນທີ 26-27 ກັນຍາ 2018 ພາກເຊົ້າເລີ່ມແຕ່ເວລາ 9:00-11:45 ໂມງ ແລະ ພາກບ່າຍເລີ່ມແຕ່ 14:00-16:30 ໂມງ, ພ້ອມນັ້ນ ກໍໃຫ້ສໍານັກງານຂອງພັກ, ລັດ ແລະ ກໍາລັງປ້ອງກັນຊາດ, ກໍາລັງປ້ອງກັນຄວາມສະຫງົບ, ອົງການຈັດຕັ້ງມະຫາຊົນທັງສູນກາງ ແລະ ທ້ອງຖິ່ນ ເອົາທຸງລົງເຄິ່ງເສົາ ເລີ່ມແຕ່ເວລາ 6:00 ໂມງຂອງວັນທີ 26 ກັນຍາ 2018 ຫາເວລາ 18:00 ໂມງຂອງວັນທີ 27 ກັນຍາ ແລະ ໃນໄລຍະດັ່ງກ່າວແມ່ນໃຫ້ງົດການຈັດກິດຈະກໍາມ່ວນຊື່ນທີ່ເປັນລັກສະນະມວນຊົນ.