U16 ລາວ ຜ່ານເຂົ້າຮອບ 2 ຫລັງສະເໝີ ອິນເດຍ 1-1
ນັກກິລາທີມຊາດລາວ ລຸ້ນອາຍຸບໍ່ເກີນ 16 ປີ ຍິງ ຫລື U16 ຜ່ານເຂົ້າຮອບຄັດເລືອກຮອບ 2 ຫລັງສາມາດສະເໝີທີມຊາດອິນເດຍ ໄດ້ 1-1 ໃນວັນທີ 23 ກັນຍາຜ່ານມານີ້ ຂອງການແຂ່ງຂັນບານເຕະຍິງ ຊີງແຊ້ມອາຊີ ລຸ້ນອາຍຸບໍ່ເກີນ 16 ປີ ຮອບຄັດເລືອກ 2019 AFC U-16 WOMEN’S CHAMPIONSHIP 2019 ທີ່ປະເທດມົງໂກລີ ໃນລະຫວ່າງວັນທີ 15-23 ກັນຍາ 2018.
ການແຂ່ງຂັນບານເຕະຍິງ ຊີງແຊ້ມອາຊີ ລຸ້ນອາຍຸບໍ່ເກີນ 16 ປີ ຮອບຄັດເລືອກ 2019 AFC U-16 WOMEN’S CHAMPIONSHIP 2019 ທີ່ປະເທດມົງໂກລີ ທີມຊາດລາວ ຢູ່ຮ່ວມກຸ່ມບີ ປະກອບມີ: ອິນເດຍ, ຮົງກົງ, ປາກິດສະຖານ ແລະ ມົງໂກລີ (ເຈົ້າພາບ).
ການແຂ່ງຂັນໃນຮອບຄັດເລືອກ ທີມຊາດລາວ ໄດ້ລົງສະໜາມ 4 ຄັ້ງ ສາມາດເອົາຊະນະ 3 ຄັ້ງ ສະເໝີ 1 ຄັ້ງ ລວມມີ 10 ຄະແນນ ເປັນອັນດັບທີ 1 ຂອງກຸ່ມຜ່ານເຂົ້າຮອບຄັດເລືອກຄັ້ງທີ 2 ຈະແຂ່ງຂັນໃນລະຫວ່າງວັນທີ 23 ກຸມພາ ຫາ 3 ມີນາ 2019 ມີທັງຫມົດ 8 ທີມ ໂດຍຈະຄັດເລືອກເອົາພຽງ 4 ທີມເຂົ້າຮອບສຸດທ້າຍເທົ່ານັ້ນ.
ສ່ວນ 4 ທີມທີ່ຜ່ານເຂົ້າຮອບສຸດທ້າຍແລ້ວມີ ສປປ ເກົາຫລີ (ແຊ້ມເກົ່າ), ສ.ເກົາຫລີ (ຮອງແຊ້ມ), ຍີ່ປຸ່ນ ແລະ ໄທ (ເຈົ້າພາບ).
