ລັອດເຕີເລຍລາວກຽມຂະຫຍາຍສາຂາອີກ 2 ແຫ່ງໃນປີນີ້
ປີນີ້ຮ້ານອາຫານລັອດເຕີເລຍລາວພວມມີແຜນຂະຫຍາຍສາຂາຂອງຕົນຕື່ມອີກ 2 ແຫ່ງໃນນະຄອນຫລວງວຽງຈັນເພື່ອໃຫ້ຮອງຮັບການບໍລິການລູກຄ້າກວ້າງຂວາງຫລາຍຂຶ້ນ, ພາຍຫລັງມີຜົນຕອບຮັບດີຈາກສັງຄົມ.
ທ່ານ ຈັກກະພົງ ວັງຕະພັນ ຫົວໜ້າໜ່ວຍທຸລະກິດລັອດເຕີເລຍລາວ ໃຫ້ຮູ້ວ່າ: ຮ້ານລັອດເຕີເລຍເປັນຮ້ານອາຫານສາກົນທີ່ໃຫ້ບໍລິການອາຫານປະເພດແຮມເບີເກີ, ຈືນຊີ້ນໄກ່ ທີ່ມີຕົ້ນກໍາເນີດຢູ່ສາທາລະນະລັດເກົາຫລີ, ຊຶ່ງປັດຈຸບັນມີຫລາຍກວ່າ 1 ພັນສາຂາ ແລະ ໄດ້ຂະຫຍາຍອີກຫລາຍຮ້ອຍສາຂາຢູ່ບັນດາປະເທດໃນອາຊີ, ຖືໄດ້ວ່າເປັນເຄື່ອງໝາຍການຄ້າໜຶ່ງທີ່ມີຊື່ສຽງ ແລະ ໄດ້ຮັບຄວາມນິຍົມຫລາຍຢູ່ອາຊີກໍຄືໃນໂລກ.
ທ່ານ ຈັກກະພົງ ກ່າວວ່າ: ຮ້ານລັອດເຕີເລຍລາວເກີດຂຶ້ນຈາກການຫລິງເຫັນໂອກາດທາງດ້ານທຸລະກິດທີ່ສົດໃສຂອງປະທານ ໂຊກໄຊ ສົມໃຈນຶກ ປະທານ ກຸ່ມບໍລິສັດໂຊກໄຊໃນຂະນະໄປທ່ອງທ່ຽວຢູ່ປະເທດ ສ.ເກົາຫລີເມື່ອ 2-3 ປີກ່ອນໜ້ານີ້, ເຊິ່ງໄດ້ເຫັນວ່າມີຜູ້ຄົນເຂົ້າໄປຊື້ອາຫານຢູ່ຮ້ານອາຫານດັ່ງກ່າວເປັນຈໍານວນຫລາຍ ແລະ ການບໍລິການກໍມີຄວາມວ່ອງໄວ, ອາຫານສະອາດ, ລົດຊາດດີ ແລະ ບັນຍາກາດພາຍໃນຮ້ານກໍມີການຕົບແຕ່ງຢ່າງມີສີສັນທັນສະໃໝສວຍງາມ, ຈຶ່ງເຮັດໃຫ້ທ່ານປະທານຕັດສີນໃຈຮ່ວມມືກັບບໍລິສັດດັ່ງກ່າວມາເປີດບໍລິການຢູ່ລາວ ແລະ ເປັນທຸລະກິດປະເພດໜຶ່ງຂອງກຸ່ມບໍລິສັດໂຊກໄຊ ແລະ ໄດ້ເປີດໃຫ້ບໍລິການນັບແຕ່ປີ 2016 ເປັນຕົ້ນມາ, ໂດຍສາຂາທໍາອິດຕັ້ງຢູ່ສີ່ແຍກໄຟແດງບ້ານສີບຸນເຮືອງ, ເມືອງຈັນທະບູລີ ແລະ ສາຂາ 2 ເປີດຂຶ້ນໃນຕົ້ນປີ 2017 ຢູ່ບ້ານຊ້າງຄູ້, ເມືອງໄຊທານີ, ນະຄອນຫລວງວຽງຈັນ.
ທ່ານ ຈັກກະພົງ ກ່າວວ່າ: ປັດຈຸບັນຮ້ານອາຫານພວກເຮົາມີອາຫານປະເພດເບີເກີ, ຈືນຊີ້ນໄກ່ ແລະ ເຄື່ອງດື່ມຫລາຍກວ່າ 30 ລາຍການໃນລາຄາເລີ່ມຕົ້ນແຕ່ 5.000-90.000 ກີບ. ສ່ວນວັດຖຸດີບທີ່ເອົາມາປຸງແຕ່ງ 70% ແມ່ນຢູ່ພາຍໃນ ແລະ 30% ແມ່ນໄດ້ນໍາເຂົ້າຈາກຕ່າງປະເທດ, ມີພະນັກງານບໍລິການທີ່ເປັນຄົນລາວທັງໝົດປະມານ 40 ກວ່າຄົນ, ທັງເປັນການຊ່ວຍສ້າງວຽກເຮັດງານທໍາໃຫ້ຊາວໜຸ່ມຢູ່ທ້ອງຖິ່ນ ແລະ ທັງເປັນການສົ່ງເສີມການຊົມໃຊ້ສີນຄ້າພາຍໃນອີກດ້ວຍ ແລະ ເພື່ອຄວາມຍືນຍົງຍາມໃດຮ້ານລັອດເຕີເລຍກໍເນັ້ນຄຸນນະພາບຂອງສີນຄ້າ, ໂດຍສະເພາະວັດຖຸດິບທີ່ນໍາມາປຸງແຕ່ງຕ້ອງມີຄວາມສົດ, ສະອາດ ແລະ ໄດ້ມາດຕະຖານລົດຊາດແຊບຕາມຕົ້ນຕໍາລັບຄືຢູ່ ສ.ເກົາຫລີ ກໍຄືຮ້ານລັອດເຕີເລຍໃນທົ່ວໂລກ. ປັດຈຸບັນລູກຄ້າຂອງພວກເຮົາແມ່ນມີທຸກລະດັບນັບແຕ່ນັກຮຽນ-ນັກສຶກໄປຈົນຮອດພະນັກງານ ແລະ ນັບມື້ມີຈໍານວນເພີ່ມຂຶ້ນ, ໂດຍສະເພາະມື້ພັກວັນເສົາ-ອາທິດແມ່ນມີລູກຄ້າມາໃຊ້ບໍລິການເປັນຈໍານວນຫລາຍ ທັງແບບເປັນກຸ່ມ ແລະ ຄອບຄົວ, ຊຶ່ງນອກຈາກລູກຄ້າຈະໄດ້ຮັບປະທານອາຫານທີ່ມີຄຸນນະພາບແລ້ວ, ທາງຮ້ານຍັງມີບໍລິການອີນເຕີເນັດ ແລະ ມີເຄື່ອງຫລີ້ນຫລາຍຊະນິດສໍາລັບເດັກນ້ອຍທີ່ມານໍາຜູ້ປົກຄອງອີກດ້ວຍ.
ທ່ານ ຈັກກະພົງ ກ່າວວ່າ: ໃນປີນີ້ຈະຂະຫຍາຍສາຂາຕື່ມອີກສອງແຫ່ງຢູ່ຕະຫລາດເຊົ້າຊອບປິງມໍ ແລະ ອີກແຫ່ງໃນໃຈກາງຕົວເມືອງເພື່ອຮອງຮັບການບໍລິການລູກຄ້າທີ່ນັບມື້ເພີ່ມຂຶ້ນໄດ້ທົ່ວເຖິງ.
ຮ້ານລັອດເຕີເລຍລາວເປີດໃຫ້ບໍລິການທຸກມື້ແຕ່ 10 ໂມງເຊົ້າຫາ 10 ໂມງແລງ.
