11 ຂໍ້ຄົງຄ້າງທີ່ພວກເຮົາຕ້ອງໄດ້ບຸກບືນແກ້ໄຂ
ໂດຍ: ທິດກໍ່າ
ດັ່ງທ່ານນາຍົກລັດຖະມົນຕີ ທອງລຸນ ສີສຸລິດ ລາຍງານຕໍ່ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດຊຸດທີ 8 ກ່ຽວກັບການປະຕິບັດແຜນວຽກຈຸດສຸມໃນໄລຍະ 6 ເດືອນຜ່ານມາວ່າ: ນອກຈາກມີຜົນສໍາເລັດໃນຫລາຍວຽກງານສໍາຄັນແລ້ວກໍຍັງມີຫລາຍບັນຫາທີ່ລັດຖະບານຕ້ອງໄດ້ບຸກບືນ ແລະ ຜ່ານຜ່າແກ້ໄຂເຊັ່ນ: ອັນທີໜຶ່ງ: ເສດຖະກິດມະຫາພາກຍັງມີຄວາມບອບບາງ, ການຂາດດູນລະຫວ່າງລາຍຮັບກັບລາຍຈ່າຍງົບປະມານຍັງບໍ່ທັນໄດ້ຕາມຄາດໝາຍ ເຊິ່ງຜ່ານການຕີລາຄາການປະຕິບັດງົບປະມານງວດ 1 ແມ່ນໄດ້ພຽງປະມານ 78% ຂອງແຜນ, ທັງນີ້ກໍຍ້ອນຫລາຍປັດໄຈ ເປັນຕົ້ນພື້ນຖານເສດຖະກິດຂອງພວກເຮົາຍັງບໍ່ທັນຂະຫຍາຍຕົວແຂງແຮງ, ບັນດານະໂຍບາຍ ແລະ ມາດຕະການຈັດເກັບລາຍຮັບທີ່ວາງອອກຍັງຢູ່ໃນໄລຍະເລີ່ມຕົ້ນຈັດຕັ້ງປະຕິບັດ, ການເກັບກໍາສໍາຫລວດຖານລາຍຮັບ ແລະ ການນໍາໃຊ້ລະບົບທີ່ທັນສະໄໝເຂົ້າໃນວຽກນີ້ຍັງຕ້ອງໃຊ້ເວລາໄປອີກໄລຍະໜຶ່ງ. ສອງ: ການປະຕິບັດກົດໝາຍ ແລະ ລະບຽບການ ເຖິງວ່າໄດ້ມີຄວາມພະຍາຍາມ ແລະ ເຂັ້ມງວດຫລາຍຂຶ້ນແຕ່ການແກ້ໄຂໃຫ້ຂາດຕົວຕໍ່ການສົມຮູ້ຮ່ວມຄິດເພື່ອການກະທໍາຜິດກົດໝາຍ ແລະ ລະບຽບການຍັງມີປາກົດການເກີດຂຶ້ນ ໂດຍສະເພາະການລັກລອບສົ່ງອອກ ແລະ ນໍາເຂົ້າສິນຄ້າທີ່ບໍ່ຖືກລະບຽບຍັງປາກົດມີຢູ່ເຊັ່ນ: ນໍ້າມັນ, ພາຫະນະ ແລະ ສິນຄ້າປະເພດອື່ນໆ ເຊິ່ງລັດຖະບານໄດ້ກວດເຫັນ ແລະ ມີມາດຕະການປ້ອງກັນ ພ້ອມທັງມີການລົງເລິກກວດກາສືບສວນ-ສອບສວນ ເພື່ອປະຕິບັດມາດຕະການຕໍ່ຜູ້ກະທໍາຜິດ. ສາມ: ລັດຖະບານໄດ້ຖືການເບີກຈ່າຍເງິນເດືອນໃຫ້ພະນັກງານລັດຖະກອນເປັນວຽກສໍາຄັນ, ເຖິງວ່າມາຮອດດຽວນີ້ໄດ້ແກ້ໄຂໄປສ່ວນໃຫຍ່ແລ້ວກໍຕາມ, ແຕ່ບາງໜ່ວຍງານຢູ່ສູນກາງ ແລະ ເຂດຫ່າງໄກຍັງບໍ່ທັນຮັບປະກັນຕາມເວລາທີ່ໄດ້ກໍານົດເທື່ອ. ສີ່: ການຜະລິດສິນຄ້າ ແລະ ບໍລິການພາຍໃນຍັງມີຕົ້ນທຶນສູງເມື່ອທຽບໃສ່ປະເທດອ້ອມຂ້າງເຮັດໃຫ້ຄວາມອາດສາມາດໃນການແຂ່ງຂັນຍັງຕໍ່າ ຍ້ອນພວກເຮົາຍັງອີງໃສ່ການນໍາເຂົ້າເປັນສ່ວນຫລາຍ, ການນໍາໃຊ້ເຄື່ອງມື ແລະ ເຕັກນິກການຜະລິດຍັງບໍ່ທັນສະໄໝ. ການຄຸ້ມຄອງລາຄາສິນຄ້າໃນທ້ອງຕະຫລາດຍັງບໍ່ທັນມີມາດຕະການທີ່ເປັນລະບົບຄົບຊຸດ ແລະ ຍັງບໍ່ທັນປະຕິບັດໄດ້ຢ່າງມີປະສິດທິຜົນ ເຮັດໃຫ້ຄ່າຄອງຊີບພາຍໃນສືບຕໍ່ສູງ ແລະ ກະທົບຕໍ່ການດໍາລົງຊີວິດຂອງພະນັກງານ ແລະ ປະຊາຊົນ. ການສົ່ງເສີມ ແລະ ອໍານວຍໃຫ້ທຸລະກິດຂະໜາດນ້ອຍ ແລະ ກາງຍັງບໍ່ທັນເປັນຮູບປະທໍາເທົ່າທີ່ຄວນ. ຫ້າ: ການປັບປຸງບັນດາລັດວິສາຫະກິດຖືເປັນວຽກສໍາຄັນ, ແຕ່ໃນພາກປະຕິບັດຍັງຊັກຊ້າ ຍ້ອນບັນຫາບົ່ມຊ້ອນໄດ້ສະສົມມາດົນ, ຂາດຂໍ້ມູນທີ່ຈະແຈ້ງເຮັດໃຫ້ການຄົ້ນຄວ້າ ແລະ ພິຈາລະນາຫລົບໄປຫລົບມາຫລາຍເທື່ອ. ບັນດາວິສາຫະກິດຂອງລັດຍັງສືບຕໍ່ພົບຄວາມຫຍຸ້ງຍາກ, ຂາດສະພາບຄ່ອງ ແລະ ຂາດປະສິດທິຜົນ ເຊິ່ງລັດຖະບານຈະໄດ້ສືບຕໍ່ເອົາໃຈໃສ່ປັບປຸງແກ້ໄຂຕໍ່ໄປ. ຫົກ: ການປະຕິບັດພາລະບົດບາດໜ້າທີ່ ແລະ ການປະສານງານຂອງບັນດາຂະແໜງການແລະ ທ້ອງຖິ່ນຍັງຊັກຊ້າບໍ່ທັນກົມກຽວເທົ່າທີ່ຄວນ, ບາງຄັ້ງຍັງຂາດຄວາມເປັນເຈົ້າການ ແລະ ເອື່ອຍອີງລໍຖ້າແຕ່ຄໍາສັ່ງ ເຮັດໃຫ້ການປັບປຸງແກ້ໄຂບັນຫາທີ່ຂຶ້ນກັບຄວາມຮັບຜິດຊອບຂອງຕົນເອງຊັກຊ້າແກ່ຍາວ. ເຈັດ: ການບໍລິການເພື່ອອໍານວຍຄວາມສະດວກໃຫ້ແກ່ການລົງທຶນ ແລະ ອະນຸຍາດດໍາເນີນທຸລະກິດຂອງພາຍໃນ ແລະ ຕ່າງປະເທດ ຫາກໍໄດ້ເລີ່ມປະຕິບັດກົນໄກປະຕູດຽວໄລຍະທໍາອິດ, ແຕ່ຍັງຈະໄດ້ສືບຕໍ່ປັບປຸງແກ້ໄຂຂອດການປະສານງານ ແລະ ການພິຈາລະນາໃຫ້ມີຄວາມວ່ອງໄວ, ໂປ່ງໃສ ແລະ ຮອບດ້ານຮັດກຸມ ເພື່ອອໍານວຍຄວາມສະດວກ, ຊຸກຍູ້ສົ່ງເສີມ ແລະ ດຶງດູດໃຫ້ມີການລົງທຶນຂອງພາຍໃນແລະ ຕ່າງປະເທດຫລາຍຂຶ້ນ ເພື່ອເປັນການກະຕຸ້ນເສດຖະກິດຂອງປະເທດ. ແປດ: ການປະສານງານລະຫວ່າງລັດຖະບານ ແລະ ສະພາແຫ່ງຊາດມີບາດກ້າວດີຂຶ້ນ, ແຕ່ບາງຂະແໜງການສູນກາງບໍ່ໄດ້ເອົາໃຈໃສ່ເທົ່າທີ່ຄວນຕໍ່ການປັບລະບົບຂອງຕົນໃຫ້ກົມກຽວກັບບັນດາມະຕິຂອງສະພາແຫ່ງຊາດ ຫລື ອໍານາດການປົກຄອງທ້ອງຖິ່ນກັບສະພາທ້ອງຖິ່ນຍັງບໍ່ທັນເຂົ້າແກັບເຂົ້າເກຍກັນປານໃດ ຈຶ່ງເປັນອຸປະສັກໃຫ້ແກ່ການຕິດຕາມ, ກວດກາ ແລະ ກວດສອບໃຫ້ໄປລວງດຽວກັນ. ເກົ້າ: ການຕິດຕາມ, ຊຸກຍູ້ ແລະ ຕີລາຄາການຈັດຕັ້ງປະຕິບັດບັນດາໂຄງການລົງທຶນຂະໜາດໃຫຍ່ຍັງບໍ່ທັນເປັນລະບົບດີ, ຍັງຂາດການສະຫລຸບລາຍງານຄວາມຄືບໜ້າທີ່ແທດເຖິງ ເຮັດໃຫ້ການຈັດຕັ້ງປະຕິບັດມີຄວາມລ່າຊ້າ ແລະ ບໍ່ໄປຕາມແຜນ, ບາງຄັ້ງກໍເກີດມີຊ່ອງຫວ່າງໃຫ້ແກ່ການສວຍໂອກາດຫລົບຫລີກການປະຕິບັດກົດໝາຍ ແລະ ລະບຽບການເຊັ່ນ: ການລັກລອບນໍາເຂົ້າວັດຖຸດິບ, ວັດສະດຸກໍ່ສ້າງ, ພາຫະນະ, ອຸປະກອນເຄື່ອງມື, ນໍ້າມັນ ແລະ ອື່ນໆທີ່ເຮັດໃຫ້ລັດສູນເສຍລາຍຮັບເປັນຈໍານວນຫລວງຫລາຍ. ສິບ: ການປະຕິບັດນະໂຍບາຍ ກໍຄືກົດໝາຍທີ່ດິນ ເຫັນວ່າຍັງມີຫລາຍຊ່ອງຫວ່າງທີ່ຈະນໍາໄປສູ່ຄວາມສັບສົນ, ລັດຖະບານເຫັນວ່າເປັນບັນຫາຮີບດ່ວນທີ່ຈະຕ້ອງສືບຕໍ່ແກ້ໄຂ, ສ່ວນການແກ້ໄຂຕົວຈິງຍັງເປັນພຽງແຕ່ເປັນບາດກ້າວເບື້ອງຕົ້ນເທົ່ານັ້ນ. ສິບເອັດ: ການຄຸ້ມຄອງຈັດລະບຽບ ແລະ ແກ້ໄຂປາກົດການຫຍໍ້ທໍ້ທາງສັງຄົມ ເຖິງວ່າໄດ້ດໍາເນີນຢ່າງເອົາຈິງເອົາຈັງເພື່ອປ້ອງກັນ ແລະ ແກ້ໄຂ ເປັນຕົ້ນບັນຫາຢາເສບຕິດ, ການຄ້າຂາຍ ແລະ ດໍາເນີນທຸລະກິດຜິດກົດໝາຍ, ຂີ້ລັກງັດແງະ, ການພະນັນ, ການຈະລາຈອນແອອັດ ແລະ ອື່ນໆ, ແຕ່ກໍຍັງມີຫລາຍບັນຫາທີ່ປະຊາຊົນ ກໍຄືສັງຄົມໄດ້ຮຽກຮ້ອງໃຫ້ລັດຖະບານຕ້ອງໄດ້ສືບຕໍ່ເອົາໃຈໃສ່ແກ້ໄຂ ເປັນຕົ້ນປາກົດການສໍ້ລາດບັງຫລວງຂອງພະນັກງານ, ສະພາບຫລິ້ນກິນຟຸມເຟືອຍ, ການເຊື່ອມຖອຍທາງດ້ານວັດທະນະທໍາ ແລະ ຮີດຄອງປະເພນີອັນດີງາມຂອງຊາດ, ການເຊື່ອຖືງົມງວາຍ ແລະ ອື່ນໆ.
ທັງໝົດທີ່ໄດ້ກ່າວມາຂ້າງເທິງນີ້ແມ່ນຂໍ້ຄົງຄ້າງພື້ນຖານຈໍານວນໜຶ່ງທີ່ລັດຖະບານຈະຕ້ອງສຸມໃສ່ແກ້ໄຂຢ່າງເອົາຈິງເອົາຈັງ ແລະ ເຊື່ອໝັ້ນວ່າດ້ວຍການສະໜັບສະໜູນ ແລະ ຮ່ວມໄມ້ຮ່ວມມືທີ່ດີຂອງທຸກຝ່າຍ, ດ້ວຍການຕໍານິສົ່ງຂ່າວ, ການໃຫ້ຄໍາສະເໜີ ແລະ ຄໍາແນະນໍາທີ່ສ້າງສັນ ນັບທັງການໃຫ້ກໍາລັງໃຈຂອງພະນັກງານ ແລະ ປະຊາຊົນດ້ວຍຄວາມສາມັກຄີເປັນຈິດໜຶ່ງໃຈດຽວກັນ ພວກເຮົາຈະສາມາດແກ້ໄຂຜ່ານຜ່າຄວາມຫຍຸ້ງຍາກນາໆປະການດ້ວຍຜົນສໍາເລັດ.
ຕາມທິດກໍ່າຄິດ, ເພື່ອບັນລຸ ແລະ ແກ້ໄຂຂໍ້ຄົງຄ້າງທີ່ໄດ້ກ່າວມານັ້ນ, ກ່ອນອື່ນແມ່ນຫົວຈັກຢູ່ແຕ່ລະຂັ້ນຕ້ອງເປັນຫລັກ ແລະ ເປັນແບບຢ່າງນໍາໜ້າຢ່າງຈິງຈັງ. ຖ້າຫົວຈັກຫາກເປັນເຈົ້າການນໍາພາເຮັດນໍາພາໄປໃນທຸກຂົງເຂດວຽກງານຢ່າງເດັດຂາດແລ້ວມັນຕ້ອງໄດ້ຮັບຜົນສໍາເລັດຢ່າງແນ່ນອນ. ເທົ່າທີ່ຜ່ານມາຕາມທີ່ເຫັນຕົວຈິງມັນເປັນນໍາຫົວຈັກຢູ່ແຕ່ລະຂັ້ນເປັນຜູ້ພາເພ.
