ອາຍຸທີ່ເໝາະສົມຕໍ່ການຊື້ສະມາດໂຟນໃຫ້ລູກໃຊ້
ເມື່ອເວົ້າເຖິງເຕັກໂນໂລຊີ ແນ່ນອນວ່າ ທ່ານ ບິລ ເກດ ແມ່ນອັບດັບທຳອິດຂອງວົງການ ແລ້ວຈາກວິໄສທັດຂອງຜູ້ຊ່ຽວຊານຜູ້ນີ້ ຄິດວ່າຄວນໃຫ້ລູກໃຊ້ໂທລະສັບເມື່ອໃດ ຈາກການສຳພາດຫລ້າສຸດເລື່ອງຄວນໃຫ້ລູກຫລິ້ນໂທລະສັບເມື່ອໃດ ? ລາວກໍໃຫ້ຄວາມຄິດເຫັນວ່າ ຄວນໃຫ້ເດັກນ້ອຍຫລິ້ນໂທລະສັບເມື່ອອາຍຸ 14 ປີຂຶ້ນໄປ. ມາເບິ່ງກັນວ່າ ທ່ານ ບິລ ເກດ ແລະ ນາງ ເມລິນດາ ມີເຄັດລັບການລ້ຽງລູກໃນຍຸກເຕັກໂນໂລຊີກ້າວໜ້ານີ້ແນວໃດ.
– ຫລັການໃນການລ້ຽງລູກຂອງ ທ່ານ ບິລ ເກດ ແລະ ນາງ ເມລິນດາ :
- ບໍ່ອະນຸຍາດໃຫ້ລູກໆທັງ 3 ຄົນຫລິ້ນໂທລະສັບຈົນກ່ວາພວກເຂົາຈະມີອາຍຸ 14 ປີ.
- ກຳນົດເວລາຫລິ້ນໂທລະສັບ, ທຸກຄົນຕ້ອງມີເວລາເຮັດກິດຈະກຳອື່ນໆຮ່ວມກັບຄອບຄົວ.
- ບໍ່ອະນຸຍາດໃຫ້ຫລິ້ນໂທລະສັບຂະນະກິນອາຫານ.
- ກຳນົດເວລາເຊົາຫລິ້ນໂທລະສັບ ລູກໆຕ້ອງເຂົ້ານອນເມື່ອເຖິງເວລາ.
– ການໃຊ້ໂທລະສັບຫລາຍເກີນໄປຈະສົ່ງຜົນແນວໃດກັບລູກແດ່ ?
- ມີໂອກາດໃຫ້ລູກກ້າວສູ່ດ້ານມືດໃນໂລກອອນລາຍໄດ້ຫລາຍຂຶ້ນ ບໍ່ວ່າຈະແມ່ນການຫລອກລວງ, ການປ້ອຍດ່າ, ຢອກລໍ້ໃນໂລກອອນລາຍ ແລະ ເກມອອນລາຍທີ່ອັນຕະລາຍ ແລະ ຮຸນແຮງ.
- ສົ່ງຜົນຕໍ່ພັດທະນາການທາງສະໝອງຂອງເດັກນ້ອຍ.
- ສົ່ງຜົນໃຫ້ລູກກຽດຄ້ານ ໂຕຢ່າງເຊັ່ນ : ເມື່ອລູກຟັງແມ່ເລົ່ານິທານ ລູກຕ້ອງໃຊ້ຈິນຕະນາການຄິດເຖິງເລື່ອງລາວທີ່ແມ່ເລົ່າ, ແຕ່ຫາກລູກເບິ່ງນິທານຈາກໂທລະສັບ ຫລື ແທັບເລັດ ລູກບໍ່ຕ້ອງໃຊ້ຈິນຕະນາການເລີຍ ເພາະເຫັນຮູບພາບ ແລະ ໄດ້ຍິນສຽງຈາກແທັບເລັດໝົດແລ້ວ.
- ສົ່ງຜົນຕໍ່ໍ່ພັດທະນາການດ້ານການເຂົ້າສັງຄົມ ແລະ ສຸຂະພາບ ເຮັດໃຫ້ເດັກມີໝູ່ໜ້ອຍ ແລະ ເຂົ້າກັບໝູ່ໄດ້ຍາກ.
- ສົ່ງຜົນໃຫ້ລູກເສບຕິດໂລກອອນລາຍ ຈົນສົ່ງຜົນຮ້າຍໄດ້ໃນອະນາຄົດ.
ແຕ່ແນວໃດ ພໍ່ແມ່ກໍຢ່າຟ້າວເປັນກັງວົນໄປວ່າໂທລະສັບ ຫລື ແທັບເລັດຈະມີແຕ່ຜົນຮ້າຍ ເພາະກໍຍັງມີແອັບພລິເຄເຊິນຫລາຍອັນທີ່ມີປະໂຫຍດ ນຳສະເໜີ ເກມ, ເພງ ຫລື ນິທານທີ່ເປັນປະໂຫຍດຕໍ່ພັດທະນາການຂອງລູກຢູ່ ພຽງແຕ່ພໍ່ແມ່ຕ້ອງເລືອກສື່ອອນລາຍ, ສ້າງກົດໃຫ້ລູກໃຊ້ສື່ອອນລາຍທີ່ມີເນື້ອໃນທີ່ດີ ແລະ ເວລາໃຊ້ງານທີ່ເໝາະສົມ ພຽງເທົ່ານີ້ ທຸກຄົນໃນເຮືອນກໍສາມາດໃຊ້ສື່ອອນລາຍໄດ້ຢ່າງມີປະໂຫຍດ ແລະ ປອດໄພຍິ່ງຂຶ້ນ.
