ລັດຖະບານລາວມອບຫລຽນກາມິດຕະພາບ ໃຫ້ຜູ້ຕາງໜ້າອົງການອະນາໄມໂລກປະຈຳລາວ
ໃນວັນທີ 20 ກັນຍານີ້, ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດໄດ້ຕາງໜ້າລັດຖະບານລາວປະດັບຫລຽນກາມິດຕະພາບໃຫ້ທ່ານນາງ ຈູລຽດ ຟຣາຍໂຊ (Dr. Juliet Fleischl), ຜູ້ຕາງໜ້າອົງການອະນາໄມໂລກ (WHO) ປະຈຳລາວ, ເພື່ອເປັນການຍ້ອງຍໍຊົມເຊີຍຜົນງານໃນໂອກາດສຳເລັດການປະຕິບັດໜ້າທີ່ຢູ່ ສປປ ລາວ.
ທ່ານ ສະເຫລີມໄຊ ກົມມະສິດ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສຳເລັດໃນການປະຕິບັດໜ້າທີ່ວຽກງານໃນໄລຍະຜ່ານມາຂອງທ່ານນາງ ຈູລຽດ ຟຣາຍໂຊ ທີ່ໄດ້ເສີມຂະຫຍາຍການພົວພັນຮ່ວມມື ແລະ ຊ່ວຍເຫລືອໃນດ້ານວຽກງານສາທາລະນະສຸກຢູ່ລາວ. ການປະດັບຫລຽນກາມິດຕະພາບໃນຄັ້ງນີ້, ເປັນການຈາລຶກຜົນງານການປະກອບສ່ວນໃນການສ້າງສາພັດທະນາຢູ່ ສປປ ລາວ.
ພ້ອມດຽວກັນ, ທ່ານນາງ ຈູລຽດ ຟຣາຍໂຊ ກໍໄດ້ສະແດງຄວາມຂອບໃຈຕໍ່ການຮ່ວມມື ແລະ ສະໜັບສະໜູນຂອງລັດຖະບານລາວຕະຫລອດໄລຍະການປະຕິບັດໜ້າທີ່ຂອງທ່ານໃນໄລ 4 ປີຜ່ານມາ, ພ້ອມທັງຢືນຢັນຈະສືບຕໍ່ໃຫ້ການຊ່ວຍເຫລືອ ແລະ ສະໜັບສະໜູນການຮ່ວມມືລະຫວ່າງ ສປປ ລາວ ກັບອົງການ WHO ໃຫ້ຫລາຍຂຶ້ນ.
